Penatai 1: Ngiga kaban belayan

Penatai: Nyangka bisi bala kaban mansa lalu tau betusut ngiga kaban diri

Aki umbuh kami Ijok tu endang tuai (Tuai Rumah) ngiring anembiak di  Sekundong, Paku Ili.  Nyadi batu bedilang niang aki Ijok tu menya endang mengkang bedau di Skundong sampaika saritu ba tembawai sida iya menya (tang aku enda nemu dini enda tembawai tu ka bendar semina nampung cherita orang ka tuai: Ngagai kita di Skundong; bisi ka nadai kala ninga Tembawai Ijok). Parai Ijok pengawa jadi tuai lalu diganti anak iya Ulak (aki ichit kami). Ba tubuh Ulak iya matak sekeda bala anembiak pindah ari Skundong lalu nitihka orang pindah ngagai batang Sblak udah menua nyau kurang siga Seru.  Sida antara bala Iban ka dulu mungkal berimba menua ka dikumbai Supok dalam Batang Sblak.

Sida Ulak ka pindah tu dipelabaka jauh dudi ari bala ka betuaika Bir ka mungkal Batang Sebetan. Nyadi Ulak bebini ke Sebetan ngambi Imbau lalu beranakka Gundi seduai Lua. Imbau mati beranak. Mati Imbau Ulak lalu jadi enggau Lemai anak Jingan seduai Uyan, ari  Nanga Telik, Ulu Krian, Saratok. Gundi bebini ngambi Ensin ari Teluk Mulung, Bintangor lalu beranakka sida apai aku enam iku diri menyadi.

Di Sebetan sida berumah di Lubuk Muding, ari ili rumah orang Sungai Klampai ka diatu sereta ari ulu siti ari tembawai sida ka dikumbai Sungai Tapa.

Angkat ari Lubuk Muding sida berumah ba Sungai Tapa, angkat ari nya lalu berumah di Sungai Teka (enti enda salah pengingat apai). Ari nya sida Ulak lalu berumah di Sungai Klampai, dataika sari tu. Nyau tuai Ulak, pengawa nyadi tuai lalu diganti anak iya Gundi.  Tang laban Gundi udu pegi lalu bebini ninggalka menua, nya alai iya enda tetampungka pengawa enggau bilik penaik apai iya Ulak.  Nya alai pengawa jadi tuai lalu dipegai orang bukai.  Dato’ Seri Edmund Langgu ak Saga antara sekeda orang beberita ka datai ari Rumah Ulak di Sebetan.  Udah mati Ulak, laban ka nadai orang ngintu, apai aku lalu diiru orang kenyau ari mit.  Nya alai iya enda diau di Sebetan.

Menyadi Gundi tu Lua ka belaki ngambi Sagoh lalu beranakka lima iku.  Pendiau sida tu di Batu Empat, Sebetan, Saratok. Lua tu endang tukang sabak, nemu nyabak nerengka. Anak Lua, Jelemin mega nemu tusut sereta nemu enggau orang nimang jalong.

Menyadi indai sida Apai, Ensin  ka ditemu iyanya Gima, Tiong enggau Kelambu, siku agi enda tentu dikingatka. Bala peturun sida tu di Bintangor, Mukah enggau Pasin.

Bala sida Apai semenyadi endang ada di Lubuk Muding, Sebetan magang. Iya ka tuai belaki  jadi jadi enggau Teluk Mulong, Bintangor lalu beranak tiga iku.  Pendiau sidanya diatu  di  Bintangor enggau Sungai Aup di Sibu.