Iban enggau Mualang 1


NGENANG BANSA IBAN ENGGAU MUALANG

Dalam jerita Pengingat Tuai ka dikeluarka radio RTM kala dijeritaka bansa dayak Chengkang, tang aku enda teingatka nama jerita tu suba.  Aku semina ingatka bansa sida tu kelia makai mensia.  Diatu naka ka ditemu nadai bansa Chengkang di Kalimantan. Dalam Internet mega nadai ditemu bansa chengkang bisi di Kalimantan. Kabuah pia, nyangka bansa sida tu udah pupus baka bansa Seru tauka nama bansa sida tu ukai dikumbai Chengkang di Kalimantan. Tang dalam sejarah penatai enggau kayau Iban, bisi nyebut bansa Chengkang. Benedict Sandin dalam bup iya madahka maya kitai Iban ka pindah ari Kayung lalu ngulai bansa Mualang di Batang Sekayam dia bansa Mualang madahka bala Iban menua ka ari ulu sidanya diempu bansa Dayak Chengkang, lalu menua ke ulu ari nya nyentuk ke Balai Kerangan, diempu Dayak Sebaru. Lalu semua tanah arim ulu nya enggi Dayak Remun.  Bansa ka bisi kaul enggau Iban sereta agi meruan datai ka diatu iyanya bansa Mualang.

Nyadi kenang tu deka ngemai kitai beratika penyemak enggau penyauh bida antara bansa Iban enggau bansa Mualang ari segi demografi, gamal fizikal, jaku, sejarah penatai enggau tusun pendiau.

DEMOGRAFI

Ari segi demografi asal bansa dua bengkah tu semina ditemu di Pulau Borneo aja. Nitihka statistik ari palan web Joshua Project kira-kira 276,000 bansa Iban nguan menua Kalimantan Barat di Indonesia enggau 763,000 Iban di seluruh sitak menua Sarawak di Malaysia, tang bansa Mualang nadai di Sarawak. Nyadi Ibanik tu gempung bansa dayak ka besai lalu bansa Mualang tu pechah ari bansa Dayak Ibanik. Penyampau bansa Mualang lebih kurang 15000 nguan menua Sekadau enggau Sintang di Kalimantan Barat, Indonesia.  Majoriti bansa Mualang bisi di.

  1. Belitang Ili, Sekadau
  2. Belitang, Sekadau
  3. Belitang Ulu, Sekadau
  4. Sepauk, Sintang enggau endur ka semak nya

GAMAL FIZIKAL

Ari segi  fizikal gamal bansa Mualang befizikal mongoloid sama enggau Iban, mua segala, kulit burak tauka kuning lensat, mata sipit mimit, bebuok lurus, bisi mega bebuok geletang sereta begamal relatif enda tinggi.

PERANGAI

Kelimpah ari nya, sebaka enggau Iban orang Mualang mega manah ati begulai enggau bansa bukai nya alai mayuh Bansa Batak ari pulau Sumatera enggau Melayu ari Pulau Jawa datai ngiga jereki di menua Mualang. Pia mega di menua Sarawak, bansa Iban sigi deka bepangan sereta enda rangka menua enggau bansa bukai.

JAKU

Ari segi jaku, bansa Iban enggau  Mualang enda jauh bida.  Bida iya semina ba guna urup i enggau e, i enggau y, ambika banding: kediri disebut Kedire, rari didebut rare, lalu pulai nyadi pulay. Kelimpah ari nya munyi sebut r sida iya tilur.

SEJARAH PENATAI

Ari segi sejarah penatai, asal bansa Mualang tu semak amat enggau Iban.  Lebih kurang  2000 taun ti udah lalu, pendiau bansa Iban enggau Mualang bekait rapat enggau Tembawai Bejuah. Dalam jerita Mualang di sebut Temawang Tampun Juah, iyanya siti endur ka betanah ami di ulu sungai Sekayam kena di Sanggau, Kapuas tauka diatu siti tempat  di ulu kampung Segomun, Kecamatan Noyan tauka Nanga Nuyan dalam sejarah Iban.

  • Orang Panggau

Sebaka enggau Iban, bansa Mualang mega ngingat ka sejarah penatai sida begulai enggau orang Panggau Libau, tang dalam pengingat bansa Mualang disebut Pangau Banyau

  • Tembawai Bejuah tauka Tampun Juah

Tembawai Bejuah tauka Tampun Juah dalam pengingat bansa Mualang endang alai semua aki ini bansa Dayak Ibanik (Ibanic group) idup segulai sejalai  dulu kelia. Nitihka sejarah Mualang sebedau diau di Tampun Juah raban bansa dayak Ibanik Pangau Banyau tauka Panggau Libau ka kitai Iban diau di Bukit Kujau enggau Bukit Ayau, di Ulu Kapuas, ari nya pindah ke Ai Berurung, Balai Bidai, Tinting Lalang Kuning nya baru diau di Tampun Juah, dalam maya ka pindah tu dia aki ini Ibanik kitai bepecah lalu nurunka mayuh raban bansa Dayak di menua tu. Nitihka sejarah bansa Mualang di Tampun Juah tu meh aki ini kitai bulih pengelantang enggau penyenang.  Maya nya kelia bisi tiga puluh buah Rumah Panjai lalu setiap rumah panjai bisi kira-kira 30 pintu. Sida tu kelia idup likun, begempung nadai laya.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: