MIMPI GARRAN LEMBANG BATU
Ditulis Benedict Sandin
Nyadi Garran ke beensumbar Lembang Batu tu tuai di Batang Paku, Saribas, ke nganti mentua iya Linggir “Mali Lebu”. Garran tau kayau, iya nyadi tuai ari taun 1878 ngagai 1900. Nyadi sakali Garran bisi mimpi lebuh iya nampuk di Bukit Saban. Mimpi iya bakatu:
Nyadi taun nya umai sida ngelingi bukit Saban. Lemai hari udah tembu nunu tugung kebak maya nugal, dua iku orang enggau iya tinduk ba tuchung Bukit Saban. Siku sida gali an baruh, siku ba tengah enda berapa jauh an iya ke di baruh, lalu Garran empu datas agi enda jauh ari tuchung bukit.
Sida tiga pan baru udah lela mata, alai datai utai nyelai bendar guru-guru mesai tibang, tinggi ari puchuk sibau raras, ngerisingka ngeli mansang ngagai sida tiga. Seduai ka an baruh agi, meda utai nya mansang kia lalu rari enda bapai enda bindai. Nyadi Garran natka diri, sereta udah abis auh seduai ka rari, utai nya pan lalu ayas.
Enda lama udah ayas utai ka dulu, peda iya datai ga ular bulih mesai giling idas datai nilat iya. Udah ular nya nilat-nilat iya, ular lalu nyeliah, nyau rari. Udah rari ular, iya pan lalu tinduk baru. Lebuh iya tinduk tu, asai ka malik, meda rumah orang tak atas iya. Iya nyau asai ka gali enda jauh an baroh ujung tanju orang. Peda iya orang mayuh bendar bediri ba tanju. Ko siku orang bejaku dinga iya, “Alau pungga enggau batang melintang jalai baroh tanju kitai nyin.” Udah nya dinga iya nurun orang siku rejat-rejat niti rumah lalu nurun ka tanah. Datai iya ba iya ke gali, endur orang nya madah ka diri bisi mai beliung, tang enda ingat peredah.
Udah pulai orang nya datai ga siku peda iya kia. Datai dia, ka orang nya dinga iya, “Ukai tu batang, nama tu tak Garran. Aram niki ka rumah ka Garran,” ka orang nya. Iya lalu asai ka enggau orang nya niki ke rumah. Datai seduai ba ruai orang ti ka tiga pintu an pala tangga, endur iya meda indu dua iko nindang berua ba wa di pantar. Sereta seduai meda iya, seduai lalu mai iya sama berua. Iya lalu enggau seduai berua. Tembu sida tiga berua, alai indu nya mai iya pansut ka tanju. Datai di tanju peda iya tak besebun langit baka mala nunu. “Nama main langit besebun?” ko tanya iya. “Badu enda besebun meh langit Garran, nya ga asap rumah munsuh kena tunu orang ke tau kayau, tau serang,” ko indu nganu iya. Indu siku lalu nunjuk ka ngena jan iya asap siti-siti. “Nyin asap ka semak, enggi Minggat ka benung melap nyadi. Nyin ka baru udah padam enggi aya nuan Linggir, nyin enggi Tarang ke muak an ulu, ka kanan nyin enggi Nanang,” ko indu. Iya lalu nanya ka asap rumah munsuh tunu iya. “Nya ka enda bangat balat ba lebak ke semak, enggi nuan, laban nuan samina naka tau kayau,” ko indu.
Tembu nya indu lalu madah ka nama diri Indai Ulop ke digela Indai Abang. “Enti nuan ngayau mulau Garran, anang enda rnadah ngagai aku, kangau ka kami ditu,” ko indu. Indu nya madah ngagai iya, lima kali iya matak bala, manuk sabung iya enda turis taji. Garran lalu dani hari pan tekerebak tawas.
Nya-alai udah nya, enti Garran mansang nguluka anembiak iya ngayau tau ka mansang ngabang, iya seruran ngangau ka Jndai Abang berari-ari, ka suah nyerupa nulung iya sekumbang iya agi idup. Iya tiga kali matak kayau.
Ditusui Tuai Rumah Libau anak Pangulu Garran dalam taun 1952.
MIMPI PENGHULU DALAM MUNAN
Ditulis Benedict Sandin
Nyadi Munan anak Minggat tu ada dalani Batang Paku, Saribas. Lebuh agi biak iya di-bai apai iya pindah ka Awik, pati Krian. Ari Awik iya bebini ngambi Subang, uchu Rentap (Sadok) ke udah pindah ari Skrang ke Entabai, udah Saduk nunduk dalam taun 1861. Nyadi Munan berani lalu tau serang. Ari Entabai iya pindah ka Sibu, alai iya diasuh Perintah mangku penggawa nyadi Penghulu Dalam. Sekumbang iya nyadi Pangulu Dalam, iya suah bendar diasuh Perintah ngaluska menua Ulu Rajang enggau Ulu Batang Ai. Apin iya tau serang, Munan bisi mimpi dua bengkah tu:
Nyadi dalam mimpi iya, Munan asai ke bejalai niki bukit nengah serimbing tingkah batu. Nyau ka lama iya udah bejalai, malik iya meda sakayu semambu tumbuh semak iya, tinggi bendar, puchuk nadai agi dipeda di langit din.
“Alau Munan, tarit enggau semambu nya,” ka jaku orang dinga iya, “mayuh bendar orang udah nguji narit, tang lalu nadai udah ulih. Sekeda semina naka merurut ditarit sida,” ka orang nya dinga iya.
Iya madah ka diri enggai narit. “Indah orang bukai ka udah deh enda tetarit.” ka saut iya. Orang iya keras bendar ngasuh iya narit. Angkat iya lalu iarit panapat-inat. Sereta ditarit iya, dinga tak begugu angit munyi guntur kejang ari ka jai. “Nyah Munan! dinga nuan guru langit bekau tarit nuan. Baka nya mega orang takut ka nama nuan ila, baka sida ke takut ninga guru langit nya,” Ka orang nya dinga iya. Iya pan lalu tedani, lalu nemu nya mimpi.
Nyadi kadua kali Munan bisi mimpi, nya malam keterubah iya begulai enggau bini iya Subang. Nyadi dalam mimpi iya. iya asai ke niki rumah orang ka sepintu-sepintu. Rumah nya peda iya bisi tangga ari setak-setak.
Lebuh iya niki ari setak, Subang pan niki ga ari etak ti alai seduai lalu betemu ha tengah ruai. Seduai lalu didudukka orang ke empu ruai. Munan lalu luduk tang Subang tama ka bilik.
Nyau ka lama Munan berandau enggau orang ke empu ruai, orang lalu nunjuk ka tampun sereta lalu ngasuh iya nesa (ngitung/ngira) penyampau antu pala dia. Ditesa iya pala. Lebuh pala nyau ka abis tesa iya endur orang nya nanya ka panyampau. Iya madah ka diri enda teingatka agi. Tiga kali iya berundang nesa, tiga kali ga seruran enda ingat berari-ari. Ko orang nganu iya, “Naka ka ulih tesa nuan nya meh Munan, panyampau pala ulih nuan ila.”
Udah tembu nya alai orang mai iya tama ka bilik. Datai seduai diri orang nya lalu ngasuh iya niap tajau ke tak ngenjing nyidir ha 1uar bilik. Ditiap iya tajau, tang nyau deka abis tiap, endor iya enda teingatka panyampau agi. Iya berundang niap tiga kali, tang enda ingat ka panyampau berari-ari. Udah tembu iya niap, ko jaku orang, “Naka panyampau ka ulih tiap nuan nya meh naka panyampau tajau ulih nuan Munan.”
Tembu nya, alai orang mai iya niki ka sadau. Datai seduai di sadau orang lalu nelenga ka telenga atap lalu ngasoh iya malik. “Peda nuan Munan,” ko orang nya, “semua menua ke besebun ka kiba enggau ka kanan nadai enda nundukka pala diri ngagai nuan ila.” Udah tembu nya, alai iya dibai orang nya nurun, lalu pansut ka ruai ke baru. An ruai iya lalu dibai orang nurun ke tanah. Datai iya di tanah, peda iya tali pesara panjai bendar melulur ari langit, pun tali nya nadai nemu endur iya tepanggai. Orang lalu ngasuh iya narit tali. Ditarit iya peda tak ngenjing merupuh tali nya merurut ke tanah. Meda tali nya udah mayuh endar rupuh ditarit iya, orang nya ngasuh iya badu, enggai ka nadai agi ke ditarit orang bukai ila. Nyadi orang nya lalu madahka iya, mayuh ga orang udah matak tali nya, tang nadai udah tebatakka ngemanjai enggi iya. “Nya alai laban batak nuan panjai ari enggi orang bukai ke udah, baka nya mega onang ke udah, nadai tealah ka nama enggau rita nuan ila,” Ka orang nya madahka iya. Iya pan lalu dani lalu nemu nya mimpi.
Ditusui Mujah anak Mambang, Paku, seduai Umpi anak Rantai, Awik.
Palan Pengingat Kitai 