Bansa Beketan – Batang Krian.

Bansa Beketan enggau Batang Krian.

Datai ba maya tubuh Guling nyadi tuai Beketan Paku, iya ngemai anembiak iya rari melunggang ngulu Rimbas lalu diau ditinting Tibak Sirat. Ari Tibak Sirat sida mupuk mindah ka bukit Tebalu di Ulu Budu pati Krian. Ari  nya baru sida bisi angkat ka Tabujang ngulai Seru di ulu Awik.

Nyadi, menyadi Gambang menyadi Guling mega ngemai bala anembiak iya angkat ari Bukit Saban Tinggi dalam Paku pindah ke Teluk Jerai, ari nya baru ka tinting Girau antara Krian enggau Saratok. Angkat iya an Girau lalu pindah ngulai bansa Seru diau di Bukit Engkalat, dalam Krian.

Nyadi sida ka diau di Bukit Tabujang tadi mindah baru lalu diau di Sugai pati Julau.  Sida tu ke penudi Beketan diau semak Iban, sepengudah rumah Beketan ka betuaika Apai Siba dialahka Linggir Mali Lebu.

Nyadi laban menua Batang Krian apin diuan mayuh Iban nya alai Beketan agi berani ngayau kitai Iban.  Nyadi bala Baketan sakali ngalahka rumah orang Karangan dalam Krian.  Beketan tu datai ari Sugai, Julau. Pemanjai rumah nya ka sapuluh pintu aja. Iya kira dinihari alai bala Baketan nuntung ngalahka rumah sida. Bala Baketan ngibun sida serumah  ba mua pintu, nganti orang pansut ka ruai mansang bekindu ba bedilang. Barang sapa orang pansut lalu dibunuh sida ba mua pintu. Udah iban mayuh parai dibunuh sida nya baru han tekerebak tawas.

Udah sida munuh Iban, Baketan pulai nurun tangga ngalih pala tangga. Nyadi, laban Iban siku ka benama Jilap diau ngaga pelabuh nungking ba tebelayar orang pala tangga nemu bala Beketan bisi nyerang iya lalu bela1ai baruh tangga.  Iya seruran ngerurok berari munuh Baketan. Skali iya ngerejang datai ka dua tiga Baketan mati, laban enda nyadang orang bisi ngeruruk ngena sangkuh. Ari semua sida serumah semina Jilap siku ngelaban munsuh.

Nyadi orang ka dalam rumah barang ti belalai enda mati, laban Baketan takut tama ke bilik ngiga sida. Pia mega barang sapa sida muai din ka tanah nya ka idup. Laban Baketan enda meda sida. Sakumbang Baketan ka munuh orang di rumah, sida enda nemu bisi orang diau ba pelabuh an luar rumah panjai, nya kabuah Baketan mega mayuh bendar parai ka dengah Jilap. Lebuh rumah Temenggung Tandok alah laban OK Janting ari Banting di Nanga Melupa semina Jilap aja nitihka lalu munuh munsuh sebuah perau ka pulai menang ngayau nya.