Mimpi Jabu apai Umping.

MIMPI JABU APAI  UMPING

Ditulis Benedict Sandin

Nyadi Jabu apai Umping tu semina tau kayau tang iya enda tau serang baka Dana Bayang, Linggir tauka Aji. Jabu ada di Bangat, Skrang. Sida menyadi ka lelaki, Tugang, Rekan, Ngadan apai Rembi enggau Gelayan sama berani sama kebal magang. Jabu suah bendar nulung Rajah ngalus ka menua. Deduai iya Ngadan meh nyadi tuai ka pesuruh Raja mujuk sida Nanang nundukka perintah maya ngayau Sadok ketiga kali. Jabu bisi mimpi, lalu mimpi iya baka tu:

Nyadi sakali asai sepi iya, iya asaika merau nguluka sungai, nyau ka lama iya udah mudik, endur iya rembus ba ai, asai lubuk asai letung, besai bendar tak sega. Lebuh iya dia, peda iya mayuh bendar sungai mati ari nya, bisi ai sungai nya biru, bisi mansau (merah), bisi chiru, bisi gadung, bisi kuning enggau bisi ga chura bukai. Nyau kepuas iya kalat-kalat enda nemu ni ai ke dipudik, iya pan mudik ai ka kuning. Nyau ka lama udah iya mudik ai sungai nya endur iya meda orang siku mandi, ti mai iya niki ke rumah. Iya pan lalu nanchangka perau, udah nya lalu enggau orang nya niki.

Datai di rumah, ba ruai orang ke pala tangga, orang pan lalu unduk ka iya, iya enggai laban ka saut iya, madah ka diri deka ka Gelong. Orang madah ngagai iya rumah nya ukai rumah orang Gelong tang enggi orang Linsing Kuning. Tusah deh ati iya ensepi diri salah rumah ditiki. Lebuh iya rindang irau ka nya, alai indu siku pansut an bilik ngasuh iya tama, iya lalu tama ka bilik.

Lebuh iya duduk enggau indu di bilik, iya minta pangaruh ngambi ka diri tau serang. “Enda kami ditu tau ngasuh nuan tau serang Jabu,” pia ka indu, “laban rumah tu rumah Linsing Kuning. “Ngasuh nuan raja baru kami tau,” ko indu nganu iya. Iya madahka diri enggai raja, laban pangraja iya udah chukup. Nyau kepuas iya ka ngumbuk minta diri tau serang ari indu, indu madah ngagai iya, iya samina naka tau kayau, laban rumah nya ukai rurnah orang Panggau Libau tauka orang Gelong.

Indu madah ngagai iya, laban iya udah datai di Linsing Kuning, baka pangraja sida ga utai ulih Jabu ila. Jabu senganging enggai, tang agi minta diri tau serang. Lebuh seduai betalatka nya, Jabu tedani lalu nemu nya mimpi.

Mimpi Jabu tu amat, iya semina suah bendar matak kayau anak. Nyadi ba pemulih utai iya bulih bendar, tang lebuh utai udah rnayh, rumah iya deka bendar angus, laban iya madah ngagai indu nya, iya enggai raja.

Ditusui Busok anak Gerijih, Entanak, Betong.