Indai aku siku orang PEMULA? Amat tusah endur orang bukai pechaya tang nya amat nyadi.Indai aku sigi orang PEMULA.
Sepemanjai umur aku enda kurang 8 kali indai ngemulaka aku.
Lalu cherita tu maya aku agi mit.Aku ukai ari peturun orang ti pemisi.Makai enggau ngirup endang nadai menyana.Empa aja ni utai ka bisi
PEMULA INDAI KETERUBAH
Kami sebilik endang suah lapar.Kadang kadang semina belauk garam enggau budu.Laban aku ka agi mit endang suah ringat.Suah aku nyabak laban deka makai asi enggau lauk ti mayuh baka orang.Tang indai pintar bula.Lebuh maya makai indai suai meri asi iya ngagai aku.Sambil meri asi diri ngagai aku iya lalu bejaku
“Makai meh anak.Indai enda lapar”
PEMULA INDAI KEDUA
Lebuh aku mansang besai, indai rindu nginti ba sungai belakang rumah.Enti bulih ikan besai iya suah gaga ati laban ulih meri kami pemakai ka manah agi.Lebuh ka makai indai suah dipeda nyeput isi ikan ari tulang lebih pemakai aku.Ati aku lalu berasai sinu meda iya ngeruping isi ari tulang ikan laluh empa aku.Lalu aku meri iya isi ikan ti bedau diempa ngagai indai.Tang iya lalu jampat nulak jari aku.Iya lalu bejaku
“Empa meh anak.Nyawa aku enda tentu ka makai ikan”
PEMULA INDAI KETIGA
Maya aku nyau besai lalu besekula.Indai suah ngaga kuih ka dijual.Dikena maju ka aku.Ari nya meh aku bulih duit ke belanja dikena sekula.Maya pun 1:30 pagi dia aku dani ari peninduk.Aku agi meda indai benung kiruh begagaka ruti semina diterang api kelita.Suah aku meda iya ka rebah dibaie mata iya kelalu ngantuk.Aku lalu bejaku “Indai, umbas nya.Tinduk dulu.Pagila nuan nyau ke kebun ga”
Indai semina tuchum merening aku lalu nyaut
“Tinduk meh anak.Bedau tentu ngantuk mata aku tu’
PEMULA INDAI KEEMPAT
Hari siti maya pengujung peresa aku, indai enda bejual kuih baka selama.Lebuh lucing sekula bemunyi nandaka maya peresa udah abis.Indai jampat jampat datai nyambut aku ka pansut ari sekula.Kami duai lalu duduk ba kantin sekula.Iya lalu nuang ai kupi ka aku.Aku meda mua iya basah laban peluh sambil nelan liur.Aku lalu nyua ai kupi ka dituang indai ngagai iya.Tang indai enggai lalu bejaku
” Irup meh anak.Indai enda aus”
PEMULA INDAI KELIMA
Udah apai midang ketegal sakit pengudah berapa bulan aku ada.Indai meh nyadi apai.Semua pengawa dikereja iya siku magang laban enggai meda aku lepi.Tang nama daya tulang siku indai.Pengidup kami duai suah ke tusah.Meda pengidup kami duai tusah datai siku lelaki deka mantu penusah kami.Tang indai enggai enda ngasuh iya nulung.Bala aya enggau ibu aku suah mesan ngasuh indai aku belaki baru ngambika ulih nulung iya ngidupka aku.Ati indai chukup kering sereta liat enggai nerima jaku orang.Aku nemu nama kebuah indai baka nya.Iya enggai bebagi pengasih, penyayau enggau perindu diri ngagai orang kelimpah ari aku ti benama anak.Ku indai
“Aku enda begunaka pengasih enggau penyayau ari orang bukai”
PEMULA INDAI KEENAM
Pengudah aku abis sekula, aku lalu kereja jauh ngejang ari indai.Indai pan nyau tuai.Aku ngasuh indai diau di rumah aja.Enda ibuh agi gawa ngiga belanja.Indai enggai.Agi majak bejual utai tanam sebelah pasar ka belanja diri.Aku suah meri belanja dikena iya di menua.Indai enggai nerima lalu suah ngirum duit nya pulai baru ngagai aku.
Ku iya
“Anang ngenusah diri anak.Aku agi bisi belanja”
PEMULA INDAI KETUJUH
Pengidup aku nyau nyamai pengudahka gawa begaji besar.Duit gaji aku endang suah aku simpan belama.Enggau duit ti bisi ati aku ingin deka maie indai raun ngagai menua bukai.Ba ati aku, tu meh maya aku malas semua penusah ti suah disepi iya suba.Sepemanjai umur iya diabis enggau pemerinsa.Aku ka meda mua indai penuh enggau pengaga, tuchum sereta ketawa.Lepas ari semua pemerinsa.Tang ati indai liat enda baka ati indai orang bukai.Iya enggai ngenusahka aku.
Ku iya
“Enda ibuh anak.Simpan meh duit nya dikena nuan dudi hari.Agi pan aku enda teleba tinggal ba menua orang”
PEMULA INDAI KELAPAN
Nyau taun beganti taun, indai jauh amat berupai tuai.Nyadi ari siti aku nerima berita indai sakit kanser rekung ti balat.Lalu deka diputung enggau lengkas.Maya nya aku gawa ba menua tasik diasuh kompani.Aku lalu pulai enggau jampat ka meda indai ti ke sayau.Maya nya aku meda indai nyau lemi tulang.Enggau gaya diri udah chukup tuai, indai meda mua aku penuh enggau pengelengau.Indai meri aku tuchum taja ngenatka tiap inchi pemedis ti benung makai dalam tubuh iya.
Aku meda enggau mata diri empu pemedis ka makai tubuh indai.Datai ke tubuh iya lemi sereta kurus.Aku meda mua indai sambil air mata enda berasai neritik labuh.Aku nyium jari iya, aku nyium kuyu enggau kening indai.Maya nya ati chukup merinsa sereta sinu meda pendiau indai baka nya.
Tang indai agi tuchum meda aku, lalu bejaku
“Anang nyabak anak….indai enda sakit”
Pengudah iya madahka pemula diri ti kelapan tadi, indai ti ku sayau lalu nutup mata iya kepenudi.Nadai enchelak agi.
Ari semua 8 pemula iya,chukup mayuh nyimpan reti pengasih ti besai ngagai aku benama anak.
Tentu kita sekeda agi untung.Agi bisi apai indai.Agi ulih nyium sereta merap sida maya betemu.Lebuh kita jauh ari sida ulih ga talipun madahka “Apai/indai, aku sayau ka kita”
Tang aku enda ngaga baka nya suba.Nesal chukup nesal sereta besalah taja aku amat sayau ka indai aku.Mimit nadai meh aku bejaku telai ba pending indai madah”Aku sayau ka nuan indai”. Datai ba iya ngapuska seput diri ke penudi.
Indai, ampun ka meh penyalah aku.Aku sayau ka nuan indai.
” SELAMAT HARI PENGADA INDAI 2020″
Palan Pengingat Kitai 