Kepayang tauka buah kepayang suah amat kena pansa dalam jerita Iban.

Chunto iya,

1. “mang ari kepayang rendam sepagi” kena ngambarka pemerani tauka pemutus ati orang siku-siku. Ayat Chunto; “Igat nya anang tundi-tundi kita, laban iya nyaing muting geraji, tajam nyemilu tisi, mang ari kepayang rendam sepagi” ka Apai Endu nangkan bala amebiak ka udu ka nundi Igat Luang.
2. kepayang – bulu manuk, kesuah agi iya manuk indu.
3. minyak kepayang – dalam jerita Surong Gunting ulih ngumpul minyak kepayang ka disuhka aki iya Sengalang Burong, maya iya bai apai iya Menggin nitihka Dara Tinchin Temaga ngagai menua Sengalang Burung di Tansang Kenyalang.
4. Skim Kepayang – skim tauka projek ka balang ngapa, ketegal ka nadai R&D ka betul.  Ayat Chunto; Projek skim sabun (kelapa sawit) SALCRA kami di Ulu Krian tak puntan baka skim kepayang.
5. Buah kepayang – enti udah diproses, nadai agi mang, nyamai amat enti diguring gulai pusu, belachan enggau chabi.
6. Baka kepayang ka ngadaka dilah – jaku sempama kena ngambarka orang, kelebih agi tuai ka semina nemu bejau ngarah tauka ngasuh sereta mantaika idea, tang maya ngereja iya enda enggau tang semina meda aja.
7. Menteri Kepayang -jaku sempama baru tau kena nerangka orangka ngumbai diri selalu betul lalu enggai ningaka penemu orang bukai, kelebih agi enti orang nya biak tauka baruh agi pangkat ari iya. Ayat Chunto; “Apai igat tak enggai nerima penemu orang, baka menteri kepayang. Ngumbai iya aja betul”. ka jaku putap sida iya serumah.
8. Mabuk kepayang – orang ti mabuk pengerindu, benung bechinta.
9. Kantuk kepayang – daun kepayang puda tau kena ngulai kasam.
10. Enti agi bisi kita tau nambah……