Orang Bugau tauka Masyarakat Adat Dayak Bugau ngembuan Adat Benama Ketemenggungan Bugau. Pelilih menua Ketemengungan Bugau tu di Kecamatan Ketungau Hulu, Kabupaten Sintang garis antara menua Indonesia – Malaysia di Kalimantan. Menua tu semina diserara Bukit Kelingkang, bukit ka ngembuan mayuh sejarah penatai Dayak di sempadan, enggau mega sejarah Gerakan PARAKU maya konfrantasi suba.
Tusut Dayak Bugau, turun menurun ari mensia enggau orang Buah Kana (Panggau Libau-Gelong):
- Ambun Menyawan x Menyulo Pusat beranak ke:
- Buwi Nasi
- Pulang Gana
- Pulang Belawan
- Putung Kempat
- Pati Landa
- Pati Rangkang
- Bejit Manai
- Pulang Belawan nurunka
/
Pucung Telu
/
Gerunung Emas
/
Gerunung Emas =Balai Gambang, Tampik Merang
/
Balai Gambang x Tikai Bidang =Keling, Seginda Bujang (Apai Salui@Alui),
/
Keling x Kumang = Gerumung Emas
Seginda Bujang x Enselgit Dara Hengembat = Salui@Alui
(8) Tampik Merang x Gunto Ninggang = Embuyan, Kumang, Telu’ Burung, Dara Mendung.
Kenu ku pengingat Bugau laban bansa sida bisi kaul enggau orang Buah Kana (Orang Panggau-Gelong ka kitai Iban) nya alai sida kena tinggang penusah baka
1 Bah besai maya sida diau di Bukit Bugau Punjung Limau Gurunung;
2 Serang antu tai
3 Diserang ikan Kenyulung di Tembawai Nibung
4 Serang tekura maya sida berumah di Tembawai Tampun Juah
5 Kemarau tiga taun
Udah kena penusah tu baru sida beserara enggau orang Buah Kana (Panggau Libau) sida Keling, Laja, Pungga, Kumang, Telu Burung Lulung, Ijan, enggau mayuh sida ka bukai. Sida ka beserara tu di Tembawai Tampun Juah.
Kenu ka pengingat Bugau kitai mensia enggau orang Buah Kana (Panggau-Gelong ka kitai Iban), dipinta milih ai anyut tauka ai letong ka enda rarat, mensia milih ai anyut laban enggai teempaka daki diri empu. Orang Buah Kana milih ai enda anyut, nya alai sida iya enda tau mati. Lebuh milih buku enggau ruas buluh, mensia milih buku nya alai kitai enda ulih meda orang Buah Kana. Tang, laban orang Buah Kana memilih ruas buluh nya alai sida ulih meda kitai mensia.
Nitihka sejarah bansa Bugau kira-kira 500 taun ka udah lalu, Demung Jambi bebinika Jinah ari bansa dayak Sebaru di Sekapat. Demung Jambi tu nyaing muting geraji, tajam nyemilu tisi, berani ati mutus kempang. Lebuh Demung Jambi ninga rita bisi bukit siti ka enda ulih ampuh bah enti sema bah ngampuhka serata dunya tu iya lalu nyikap diri ngena sumpit enggau duku sereta pemakai ka cukup. Asal nama Bugau nitihka ari munyi burung Pung Kapung (Tempa; bekaki pandak, bulu iya becura cokelat, baka burung menaul). ‘Bukit Bugau Landau Wak’ pia ku munyi burung Pung Kapung nya, bukit enggau sungai dia dikumbai Bugau lalu genturung pendiau dia disebut Landau enggau Wak sepan. Ninga nya Demung Jambi lalu ngaga nama bukit nya Bukit Bugau.
Bisi mega pengingat Bugau nyeritaka nama kabuah ikan tuman nadai di menua Bugau? Kenu ku pengingat Bugau tu laban maya jelu tau bejaku baka mensia burung Pung Kapung enggau ikan tuman bisi sempekat enda tau makai buah enggau mandi ai ba bungkung kayu, sapa ngelanggar sempekat mesti mati. Nya alai dataika sari tu burung Pung Kapung di Bukit Bugau semina dipeda ayan maya musin buah tang ikan tuman nadai ditemu di sungai-sungai sebelah pelilih menua Bugau.
Di pelilih menua Sintang sepemanjai Batang Ketungau enggau pati sungai ka mit-mit bansa Bugau endang bisi tusun pendiau ka meruan. Tu endang berindik ari pendiau dayak Bugau ka bepegai teguh ba adat enggau daya idup aki ini sida ka meruan dititi ditali sida kenyau ari kelia. Kenyau ari ada ke dunya tu, cara ngidupka ka diri ba dunya tu dataika maya pemati sida iya endang becuanka adat bansa Bugau. Ba penemu Bugau, bumai betanam ukai semina kena ngeluarka pemakai tang endang adat pengidup.
Dalam semua pengawa, Dayak Bugau endang beburung, sekeda burung ka diguna sida, baka burung Papau (Kelabu Papau), Embudeh, Jampung, Kutuk, Tupung, Beragai, Nendak, enggau Beriak. Ari bansa burung, munyi burung enggau chara penerbai burung endang bisi reti tauka padah ka jai tauka manah maya sida nurun ngayau, pegi bejalai, manggul, berikan enggau ngasu berburu. Sebaka enggau kitai Iban, Dayak Bugau mega bisi cara kediri ngitung bulan kena sida iya nusun pengawa besari-sari enggau bumai betaun. Tu bepun ari siti cerita siku lelaki ka nginti malam ari. Maya ka nginti iya ninga indu nyabak, taja pan indu nya enda dipeda iya, tang sabak iya terang didinga. “ Nuan entauk endak lerak nak, nuan nadai diau ke bulan tulak. Nuan entauk endak mati nak, nuan nadai diau ke bulan mali. Nuan entauk endak luluh nak, nuan nadai diau ke bulan tumbuh. Nuan anak asi, nuan anak pidi endang peransang bujang”.
Kenyau ari tu Dayak Bugau belabuh ngena bulan maya sida ka ngepunka pengawa bumai betaun, Tu sekeda timang bulan bansa Dayak Bugau:
(1) Kedang Mansang = Bulan setengan mansang;
(2) Murid Galeh = Bulan ka kembung;
(3) Nutup Kerungan;
(4) Kandung;
(5) Muntianak = Malam keterubah udah Murid Galeh;
(6) Munti Indai = Malam kedua;
(7) Tulak = Malam ketiga (bulan pernama kembung pegari);
(8) Lindung Tiang = Belabuh surut sepengudah Tulak 1;
(9) Keleman Bubuk = Belabuh surut sepengudah tulak 2;
(10) Keleman Nunu = Belabuh surut spengudah tulak 3;
(11) Rumpang =Belabuh surut sepengudah tulak 6;
(12) Lerak =Belabuh surut sepengudah tulak 5;
(13) Pasak =Belabuh surut sepengudah tulak 4;
(14) Rumpah (tengan surut) =Belabuh surut sepengudah tulak 7.
Kelimpah ari tu, nama-nama bintang Dayak Bugau disebut Bintang Banyar; Bintang Rang; Bintang Tiga; Bintang Tangkung Peredah; Bintang Ujung Melanjan. Bugau mega bisi pantang, maya bulan Tulak tidak sida iya mesti diau enggaika bebadi. Maya Bulan Keleman Bubuk sida enda tau ngetau tauka ngambi benih utai tanam, enggaika benih diempa bubuk; Maya Bulan Keleman Nunu sida enda tau kerja umai, enggaika ari berunggu ujan sebedau sida nunu umai.
Aku beratika gaya idup enggau sejarah Iban-Bugau tau dikumbai sebaka.
Palan Pengingat Kitai 