13 Bengkah Mimpi Tuai Iban- Mimpi Minggat


MIMPI MINGGAT APAI RUNAI

Diubah ari karang asal ditulis ulih Benedict Sandin

Nyadi Minggat tu siku tuai Iban Paku ke nguluka anembiak pindah mungkal Batang Awik, pati kiba Krian. Iya tau serang, lalu suah bendar nyerang ngarika bala Rajah. Nambahka iya tau serang, Minggat mega pemegi, pemulih tajau, datai ka parai di Panai, Sumatra, seberai tiban Nanga San.

Nyadi sakali sepi Minggat dalam mimpi, iya asai ka bejalai. Lebuh iya bejalai iya betemu enggau orang siku ke ngasuh iya bebini indu nama Jara. Lebuh orang nya nyebut Jara, kenaya indu nya pan bisi ga dipeda iya. Dani iya pagi, ati iya irau bendar ka mimpi diri, laban dalam Batang Paku rambau nya, nadai indu benama Jara. Lalu pia mega maya nya, Jara di Suri, Rimbas, pan bisi ga mimpi, diasuh orang belaki lelaki nama Minggat.

Nyau kepuas Minggat ke tusah ati ka mimpi diri, han siti iya bejaku enggau apai iya Lua, madahka diri bisi ati deka nemuai, seraya ke lalu ngiga manuk sabung. Apai iya pan ngasoh, iya pan lalu nurun ga ka Rimbas.

Seari-ari nya iya bejalai alah datai di Suri pati Rimbas, antara enggau Paku. Ba rumah orang Suri iya lalu niki. Rumah puang bendar dipeda iya, laban maya nya, maya orang gawa umai. Datai iya di tengah rumah iya lalu duduk, laban dia apai tuai siku bisi nuduk ka iya. Apin lama udah iya duduk, alai apai tuai ngangau:

“0 Jara, anjung baku ari bilik,” ko iya. Ninga nya tekenyit bendar ati Minggat, ko ati iya, “Mujur bendar pejalai aku tu kau.” Udah nya pansut Jara, dara, suman bendar baka kelemayang indu ke dipeda Minggat dalam mimpi iya suba. Baku lalu diengkah iya di ruai, iya lalu pulai ka bilik baru.

Hari pan nyau lemai, alai Minggat nurun mandi ka ai. Udah pulai iya mandi, iya duduk baru enggau apai Jara di ruai. Apin bengat lama seduai udah berandau, alai Jara ngumbai rnakai. Udah tembu makai, baka selama mega, orang serumah nya bela datai magang ngulu temuai, indu enggau lelaki sampal bendar datai dia.

Nyau terentak datai magang orang ka ngulu iya, orang nanya ka nama iya, enggau nama panemuai iya ngagai rumah sida. Minggat madah ka diri datai an Karangan Pinggai dalam Paku, lalu kabuah iya kia padah ka iya pejalai lantang ngiga manuk sabung.

Ninga iya nyebut narna diri Minggat, peda iya Jara nelai indu siku ke duduk berimbai enggau iya, madah ka diri bisi udah ngambi lelaki nama nya mimpi. “Tak baka gamal iya nya, gamal lelaki ka diambi aku mimpi,” ko Jara nelai indu siku ka semak iya.

Ninga Jara nelai indu ke benimbai enggau iya duduk, ati Minggat berunding bendar. Iya belemati ka pangamat mimpi diri. Udah nya sekumbang iya ke berandau enggau orang, ati iya nyau enda ulih bai iya lama berandau. Iya madah ka sida, diri lelak bendar bekau bejalai sahari nya.

Ninga iya madah ka diri 1elak, orang ti ngulu, pulai magang ngagai ruai ngagai bilik diri. Sereta udah pulai orang, alai apai Jara lalu ngadu ka endur Minggat tinduk ba pantar sida. Udah tembu nya alai apai Jara pulai ka bilik, tang lebuh iya tama Minggat meda ka sakali ka iya nambit pintu enggau enda. Meda iya enda nambit pintu Minggat lantang ati, iya tama ka bilik semina enda tak nyereta apai Jara, mansang ngayap ngagai Jara ke sadau.

Datai iya ba peninduk Jara di sadau, iya lalu ngerak iya. Dani Jara lalu nanya ka sapa orang ke ngayap? Iya madah ka diri Minggat. Seduai pan lalu berandau. Nyau kepuas seduai berandau alai Minggat madah ka diri deka bebini Jara, laban ko iya, antu udah madah ngagai iya dalam mimpi ngasoh iya jadi enggau indu nama Jara. Ninga jaku Minggat, Jara pan lalu madah ka diri bisi mimpi, diasuh antu deka belaki ditepat lelaki nama Minggat. Seduai sama arapka mimpi pangan. Nyau ka lama seduai udah bejaku, Minggat pan enda berasai lalu tinduk. Apin lama iya udah tinduk, endur iya meda bintang tak baka ke diaraka di kebung langit. Dani iya, malik peda agi ga bisi bintang. “Ni atap kita,” ko iya nanya Jara. “Dia meh atap,” ko Jara. “Nama nyin bintang ayan deh?” ko Minggat. Seduai lalu sama bediri ngama atap, lalu atap pan bisi ga kena pegai seduai. Sereta seduai tepegai ka atap bintang lesap ari peda seduai.

Alit bendar ati seduai meda utai nyelai baka nya. Seduai pan lalu sama tinduk baru. Lebuh tinduk tu, Minggat bemimpi baru asai ka betemu enggau orang ka betemu enggau iya dalam mimpi suba. Ko orang nya nganu iya, “Tu meh indu ka diasuhaku ambi nuan ka bini. Baka seduai ka engkadah bintang tadi, baka nya ga orang engkadah rita anak telesak seduai.” Minggat pan lalu dani.

Nyadi malam iya ka baru udah jadi enggau Jara, Minggat bisi mimpi baru munyi tu:

Iya asai ka engkadah ka langit. Lebuh iya engkadah peda iya bintang tak ngenjing baka ka di-ara, ngenjing terang langit laban bintang. Benung iya ngemataka bintang dinga iya bisi orang ngangau ka iya munyi tu: “Baka nya ga nuan Minggat, ngemayuh bintang nya orang nitih ka nuan ila.”

Udah iya mimpi nya, malam nya iya tinduk baru. Lebuh iya tinduk tu, iya asai ke mimpi bejalai niti jalai besai bendar. Nyau ka lama udah iya bejalai, endur iya asai ke niki bukit. Datai di tuchung bukit, peda iya bisi rumah orang sabuah dia, iya pan lalu niki ka rumah. Datai di rumah, iya lalu asuh orang duduk. Lebuh iya duduk, peda iya mayuh bendar orang. Semua orang ke dipeda iya mai iya pansut ke tanju, iya pan lalu pansut enggau sida.

Datai di tanju, ka apai tuai siku, “Peda nuan asap nyin Minggat.”  “Asap utai apa nya?” ko iya nanya. “Eh, nyin asap rumah munsuh tunu Dana, nyin asap tunu Linggir, nyin enggi Rentap, nyin ka jauh enggi Imba seduai Ngumbang,” ka apai tuai. “Ni asap aku deh?” ka iya. “Nya enggi nuan ka baru menyadi, nya meh gaya asap kita ka tau serang,” ko apai tuai.

Apai tuai lalu madah ka iya, laban iya meda bintang ayan ngenjing merera di langit, datai ka lima serak peturun iya ila agi didinga orang berita. Iya madah ka rumah ke ditiki iya nya Panggau Libau, menua luchak lunyau, kena biau jila isang orang ka berani. Udah nya Minggat pan lalu dani. Sereta dani iya dinga kijang ngenjing rauk-rauk bemunyi nunga ke luan bilik.

  • Ditusui Mujah anak Mambang dalam taun 1951.

15 responses

  1. Kunchit Langit | Reply

    Unggal,

    Asai ke nemu aku tusut serta penatai sida Penghulu Minggat tu, serta lebih agi anak iya (Munan Penghulu Dalam) ke jadi enggau Subang anak Tambong seduai layang, ari peturun Rentap empu mega. Ila aku mantai ka tusut sida iya, tang anang enggai audit tusut nya awak ka ia silik serta menuku agi di temu kitai.

    1. Bala Munan bisi agi idup. Puyang anak Layang agi diau si Rh. Juna(Tamoh) di Sg. Aup, Sibu. Agi mayuh bala Layang agi idup.

      1. Au manah terima kasih…bala petunggal aku mega di Sg Aup dia….ari nya bisi kia merantu menyadi apai enggau petunggal aku

  2. Josie Lamenda | Reply

    Ku mega bebesai terima kasih nuju kita…Baka kami k nembiak empai nemu cherita k ditusui aki inik….Rebak kami pan mega nyau rindu agi bepeda ka cherita ka mya hari tok..Ba penemu ku…Cukup manah Cherita tuai tok ditusui tauka ditulis..awakka rebak kami tok nemu ini penatai cherita tuai baka mimpi,jaku dalam,leka main,penatai iban,adat asal iban,reti jaku gau tusun jaku ka bukai…te empai ag dtemu kami…Kami arap jaku iban tok enda lenyau k dudi hari ila tang mekang dipinggai teguh ka kitai anak bansa iban..

    Temengah gak hati ku…..ketegal ngembuan penemu..”tajapan empai penuh guni ti disimpan padi..empai abis padi diketau sebidang…empai datai ba menua orang…empai gak bulih penemu ka dalam.. ”

    Ku arap rebak kemaya hari tok anang enga bebasa k adat asal,penatai kitai…pia mega gau semua utai k bekaul gau adat diri..ngembuan penemu k besai amat berega ari ngembuan duit bejuta-juta..

    Ari ku,

    Josie Lamenda,

  3. mat ak andam | Reply

    minta myuh agi cerita tuai rindu aku macha ea..tq

  4. nayan joseph | Reply

    puas aku btati ka jlai tusui crita 2,rindu aku macha…pma muka internet msti aku limpang xlma macha crita tuai iban.

  5. 12 bengkah mmpi ya kebendar iya🙂 ditulis benedict sandin .

  6. lama endar udah nadai betambah cherita tuai ditu. enti agi bisi tambah baru ga cherita nuan punggal.

    1. nadai tentu ari unggal. Terima kasih

  7. Godfrey Nandong | Reply

    tabi basa ngagai nuan aya..enti bisi ari aya..ulih nuan nyambung cerita 13 bengkah mimpi tuai iban..laban aku meda dia semina bisi 8 bengkah mimpi tuai iban asai aku..

  8. Rindu macha jerita tuai.arap nulis cerita ke panjai agi.laban agi ka macha nyau ambis ga..:)

  9. Aku sigi amat rindu ka jerita tuai kelia, laban bansa kitai Iban kelia enda sebaka diatu.

  10. Jenifer Edwin | Reply

    Agi idup agi ngelaban,
    Agi idup agi ngarang.

  11. sandah ak bajing | Reply

    cukup manah cerita minggat apai runai tu…agi rindu macha udah ga ambis…enti bisi cerita enggi cula ka besumbar begarak tampak berita,tarang mandang menua.aku minta kitak ngeluar ka..aku peturun cula

    1. bisi giga ditu

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: