Jaku Pengelalu


SELAMAT DATAI NGAGAI / SELAMAT DATANG KE / WELCOME TO WEBLOG  IBAN UNIVERSAL (@TINJAU PENGIDUP)

Nyadi aku tu………

Baka paku sulur gelung
Baka tubu sulur rebung
Baka kulat sulur tuchung
Baka tengang tampung bulang
Baka ijuk tampung penduk
Baka wi tampung tali
Baka rutan tampung danan

Pechah periuk tanah ganti periuk besi

Charik labung batik ganti labung Betawi

Parai orang ka tuai ganti tubuh kami

Padam bulan ganti mata hari…………………

VISI

Tuju Blog  Iban Universal tu digaga endang:

  1. Ngambika bisi sama enggau blog/weblog Iban ka bukai  alai endur bekunsika sebarang runding enggau  penemu kena ngemansangka Iban.
  2. Ngangkatka pengerindu enggau penemu kitai dalam Jaku Iban; Nuju Jaku Iban ti standard.
  3. Ngangkatka pengerindu enggau pengangkun kitai ka sejarah enggau penatai bansa Iban.
  4. Ngangkatka penemu kitai dalam adat asal, pengawa rama, main asal enggau leka main Iban.
  5. Ningkatka penyerakup  enggau pemanah kaul ati kitai sebansa.
  6. Blog tu mega tau alai kena aku mulaika pengingat ngiga kaban lama lalu ka bekelala enggau kaban baru.
  7. Bejuraika singkang pemansang bansa kitai dalam semengat 1Malaysia lalu nuju Tinjau Pemansang 2020.

MISI

Ngiga, mansik, nyidi sebarang pekara ka bekaul enggau Iban ari orang siku-siku, bup, media elektrik enggau elektronik lalu mantaika ditu ngambika bisi dibacha lalu dipejuraika ngambika tau manah agi.

PESAN PENGARANG

Penemu enggau pekara ka dibantaika ditu ukai ketegal deka ngayanka pemandai, pengelandik, jauh agi ka deka mandangka pemisi diri tang semua tu endang ketegal pengerindu ka jaku bansa kitai lalu deka bekunsika sekeda runding enggau anak penemu ka bisi mengga mit nya.  Nya alai aku ngarapka sebarang response ari kita ka bisi mansa ruai siber aku tu.

Nya alai aku ngarapka temuai….

Anang kelalu muji sarang burung kanji

Taja iya tuchi kapas magang

Lalu anang mega ketawaka sarang burung puna

Meda iya tak semina ensara rangkang

Tingkah anang dibantah laban iya endang tebiang……

Reti nya, endang mayuh pekara tau ka ulah, perangai enggau gamal orang siku-siku ka bebida dipeda kitai tang anang kelalu bekenangka iya, kelalu muji tauka mantah. Enti iya manah, dipeda manah. Enti jai dipeda jai, laban sarang dua bansa burung nya tadi amat iya jauh bida tang tuju iya sama. Tajapan sarang burung puna semina rangkang ulih meh iya betelu, beranak betelesak. Disimpul enggau jaku pandak, anang dulu muji tauka mantah siku-siku orang tauka utai bepelasarka gamal luar aja.

Dikelala bunga ari kayu

Dikelala buah ari langgu

Dikelala basa ari penyiru

Dikelala bansa ari jaku

Bejalai betungkatka adat

Tinduk bepanggalka pengingat…………..

Enti sema pekara ka dibantaika ditu bisi ngemediska ati kita, aku minta ampun.  Iya ka manah ambika chuan, ka teladan. Iya ka jai tau buai ke tisi.

Nya alai tak rindu bendar ga tu punggal,

Bayam kita ti bejalai niti penyurai ruai siber enggi aku tu,

Meda sida ke tuai udah kepai-kepai nyan setunggul menira 1Malaysia,

Meda sida ke indu betegunu ngena ngepan baju kebaya,

Sida ke lelaki udah betekenji nyingkang sereta,

Bala nembiak nyau udu pengeragak-ragak mangkung tawak

Ngambi nyawa wuk empeliau dara.

Nya alai enggai enda nanya,

Kita ti bejalai tu dih punggal,

Ngiga burik kesa tauka banda pipit antu,

Bejalai pia aja, tauka endang meruan tuju?

Minta kita nyara meh tu,

Ari ni panyun bedaun, senggang betunjang, nibung bepandung?

Enti utai tu semina inang kamba inang selua,

Manah iyar ke tisi buang ke lubang,

Tang enti iya inang Keling Bungai Nuing, Laja Bungai Jawa,

Ngambi kitai sama empu, sama emparu.

Nyadi … kami ti bejalai betubuh mayuh tu,

Ukai bejalai ngapa, bejalai pia,

Tang kami tu bisi padah bisi kebuah,

Madahka petara udah datai, udah sangkai,

Sida iya mai ubat serangkap genap,

Mai pengaruh gembar tubuh,

Ngasuh bumai kitai bulih padi,

Ngasuh bedagang menang bebeli,

Ngasuh gerai nyamai

Lantang senang nguan menua.

Geliga:

Nya alai tu, baka nya ga Punggal,

Tak berasai gaga aku meda bala kita,

Ke betatam mayuh bebala,

Deka niki ngagai penyurai rumah raya,

Enggi kami di Sekula Sera Gunting reremba,

Tang aku tu enggai enda bejaku seleka dua,

Laban udah dipaduka sida ti empu pengawa pun kereja,

Nyebut geliga jaku tangkan.

Nyadi enti kita bisi mai sunti mai teguli,

Anang sekali-kali kita mai iya niki,

Ngagai peretang rumah lelenggi enggi kami ditu,

Uji anjung kita ngagai menyaung tuchung Bukit Garu tinggi,

Endur mayuh jelu engkuli,

Ngambika jelu engkuli tak tejelepi parai teduduk.

Enti kita bisi mai penungkam gayung dalam,

Nya pen enda mih tau dibai niki ngagai peretang

Rumah nyapan enggi kami ditu,

Uji anjung kita jauh-jauh ngagai menyaung tuchung Bukit Kayu Malam,

Endur mayuh jelu jugam,

Ngambika bala jelu jugam abis lesi bebadi laya danjan,

Badu nyengkuran ngerumbak sampuk.

Pia mega, enti kita bisi mai emperegam bisu kumpang beduju,

Anang mih kita mai niki ngagai peretang penyarang

Rumah merundu enggi kami ditu,

Uji anjung kita ngagai ulu langgai Kantu,

Ngambika kayu temesu di ulu langgai Kantu tak punggu mati puchuk.

Baka nya mega, enti kita bisi ngembuan ambar mati ngeli antu gerasi,

Anang sekali-kali kita mai niki ngagai peretang rumah menchegi kami tu,

Uji anjung kita ngagai menyaung tuchung Bukit Seligi,

Kena munuh jani jelu babi,

Ngambika jani jelu babi nadai agi neriang ubi tisi panduk.

Nya alai pemerani, anang sekali-kali ditusi,

Laban iya tau ngasuh bedengki mungkal laya.

Dengah enda tau dipadah,

Laban iya tau muka kubah bungai pemula.

Pengeraja anang dicherita,

Laban kemaya tu pengeraja ukai semina ulih ari tuah.

Nya alai enti pangan diri nadai ruti, anang ngelanyah,

Nyangka Tambi nadai hari begaga ripang.

Enti pangan nadai gula, anang serebana,

Nyangka China nadai daya alah beperang.

Enti pangan nadai asi, anang ngeransi,

Nya ga tanda umai kudi padi banggang.

Enti pangan nadai penganan, anang rawan,

Nyangka Iban kiruh beranyam garung gitang.

4 responses

  1. rindu amat ulih nemu sejarah bansa diri lebuh macha blog nn tu. syabas & arap ke lebih mayuh agi kitai sebansa ti bisi tepeda ke blog nn tu ambi lebih ngelekai

  2. Apoo cukup manah jaku d…

  3. Cukup manah blog tok

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: