Rentap: Semina siku aja!


LIBAU ‘PANGGAU DARA, RENTAP TANAH KUDI MENUA’

Penatai Raja Berani.

? x ? (nadai ditemu).

Ningkan x Imbong = Rentap, Jarop, Ringgit, Lepo enggau Serini.

Rentap x Sawai =Tambong, Ensimai (anak Ringgit).

Tambog x Layang = Subang

Subang x Penghulu Dalam Munan =Lembai , Umi (anak iru), Niut

Umi x Saga = Saripah.

Saripah x Manggah = (1) Munan, (2) Lucking, (3) Lemok, (4) Melina, (5)John.

Penerang: (Sida ka endang peturun Rentap ni enda nemu agi dalam pekara tu)

(1) Munan mati di Singapura dibunuh sedadu Jipun maya Perang Dunya II (nadai penerang ka silik agi nerangka hal tu).

(2) Lucking nyadi polis, mati maya bejalaika pengawa.

(3) Lemok gawa enggau mission di Bintangor (umur iya 46 taun dalam taun 1967).

(4) Melina nyadi pegawai Kastam.

(5) John nyadi pengajar.

TUSUT penatai Rentap ti ditemu enda dalam baka tusut tuai-tuai serang (war leader) ari Saribas, baka sida Orang Kaya Pemancha Dana Bayang, Linggir Mali Lebu tauka Minggat, enggi sida nya ulih ditusut kitai 20 peturun ari pun iya. Nyadi penatai Rentap bakatu, Ningkan bebini ngambi Imbong beranakka Rentap, Jarop, Ringgit, Lepo enggau Serini. Nyadi Rentap, Jarop enggau Ringgit tu diau di Skrang, Lepo pindah ke Sungai Ngemah, pati Batang Rajang, lalu adi sida iya Serini pindah nitihka laki iya ke Sungai Muput di Batang Anap, Bintulu. Rentap bebini ngambi Sawai, tauka dua bali nama iya Berinjan beranakka Tambong seduai Ensimai. Tambong belaki ngambi Layang, seduai iya nadai anak lalu ngiru Subang. Subang belaki ngambi Penghulu Dalam Munan anak Penghulu Minggat apai Runai ari Awik, di Krian, Saratok.

Menantu Rentap, Layang laki Tambong tu meh ka bedengah Tuan Allan Lee maya ka besatup ba Lintang Batang semak Nanga Skrang. Penghulu Dalam Munan ka jadi enggau uchu Tentap, Subang, mega raja berani sereta tau serang. Munan tu dipaduka Raja Charles Brooke ngaluska munsuh Kayan-Kenyah di Ulu Belaga enggau Ngumbang seduai Bantin di Ulu Batang Ai ka angkat ngelaban perintah Brooke.

Apai Munan, Penghulu Minggat apai Runai mega raja berani Iban ka pemadu beberita udah Linggir Mali Lebu ari Paku. Minggat tajapan nyau tuai sama enggau Chulo ‘Tarang’ mantu perintah Brooke ngaluska bala Kayan-Kenyah enggau bansa Kejaman di Ulu Belaga. Menyadi Minggat ka benama Enchana ‘Letan’ parai maya ka betempuh ngelaban Iban Katibas. Kenu ka jerita, penatai apai indai Rentap tu ari Ulu Kapuas di Kelimantan Barat, Indonesia ka dikuasa perintah Belanda. Udah Rentap ada sida iya sebilik lalu nitihka bala Iban bukai pindah ke menua Sarawak lalu diau di Ulu Skrang.

Enti nitihka jerita ka ditulis Benedict Sandin anak Rentap seduai Sawai semina Tambong siku aja tang kenu ka bala tiris pantis Rentap di Ulu Entabai seduai iya bisi anak benama Ensimai Enti sema utai ka ditulis Benedict Sandin tu betul tiris pantis Rentap ka bendar nadai agi laban anak Rentap, Tambong seduai laki iya Layang nadai anak. Nama Rentap tu iya ka asal iyanya Libau, udah ka bedengah maya ka ngayau diuluka Orang Kaya Rabong ari Skrang tauka Orang Kaya Pemancha Dana ‘Bayang’ Libau diberi ensumbar ‘Libau Panggau Dara, Rentap Tanah Kudi Menua’. Udah nya nama iya ka Libau lalu beberita agi disebut orang Rentap. Rentap tu mega ‘tau serang, tau kayau, tau mulau baka raja berani Saribas enggau Skrang ka bukai.

Bisi sekali, kenu ka jerita Rentap nguluka Iban Skrang nitihka 0. K. P. Dana ‘Bayang’ nyerang genturung pendiau Laut enggau Cina ba pasar Pontianak. Rentap ti ending nyadi ‘tuai serang’ Dana ‘Bayang’ tak enda bebah-bah engkechit ke dalam perau Laut Pontianak ka benung ngansakka iya ke tengah tasik, enda chechamang iya lalu mepat semua munsuh dalam perau nya. Maya tu meh Rentap bulih keris ka beulu emas ka dirampas iya ari anak menyadi Sultan Pontianak. Udahka beberapa kali nitihka Dana ‘Bayang’ pengujung iya Rentap lalu matak kayau kediri, iya nyadi tuai kayau. Bisi sekali iya matak kayau nguluka Iban Saribas enggau Skrang nyerang kapal Sultan Pontianak enggau kapal perang Belanda. Maya nya sisa iya ngerampas dua batang meriam temaga enggau sekeda agi barang bukai ka berega ambika perpasan.

Enti nitihka jerita Iban, orang ka tu serang tu ukai semina bisi pemerani, kering tauka landik ngatur kayau, tang ka suah agi sida tu endang tiris pantis orang ka tau kayau tau mulau tauka ari sumpah antu, ari kenyap, ari mimpi. Enggi Rentap kebuah iya tau serang kitai enda tentu nemu, laban nadai kala ninga orang nusui mimpi iya ka nyelai baka sida Dana Bayang, Linggir Mali Lebu, Minggat tauka Chulo Tarang.

 

Keterubah Besatup Enggau ‘Raja Ribai’

Udah nyirika diri nyadi Raja Sarawak dalam taun 1842, James Brooke lalu deka ngalahka Iban Saribas. Semina ari berapa aja alai Iban Saribas lalu alah. Orang Kaya Pemancha Dana ‘Bayang’ enggau bala anak iya alah di Padeh, Linggir ‘Mali Lebu’ enggau Iban Paku alah di Kerangan Pinggai bala anak niang Orang Kaya Antau ‘Linggang Nengeri’ seduai Orang Kaya Gun ‘Mangku Bumi’ mega alah di Nanga Tawai tebing Batang Rimbas.

Udah semua kubau Iban di Saribas alah, dia James Brooke lalu ngemai bala sedadu perintah Sarawak nyerang Iban Skrang ka betuaika Libau ‘Rentap’. Ninga rita Raja Raja Putih ka nyerang, Rentap nyendiaka bala ngetanka menua ari serang orang putih ka digembar bala Iban Sebuyau, Bidayuh, Selakau enggau Laut Sarawak. Ninga bala raja deka nuntung dia Rentap lalu ngemai bala iya ngenan ba Kerangan Peris endur ka enda tentu jauh ari Nanga Skrang. ‘Tuai serang’ Iban Skrang bukai ka sama bela ngenan enggau Rentap maya nya, iyanya Orang Kaya Gasing, Sabok ‘Gila Berani’, Sandom, Linggi apai Belabut, enggau Bulan ‘Genaya’. Bala Rentap besedia ngemai batu ka umbas pemesai, beruak enggau seligi nibung kelimpah ari ilang enggau terabai. Maya bala raja mansa, bala Rentap enenggaug udah sedia. Sida iya lalu nerais manjung sambil numbuk ngena buluh, nibung, nikau ngena batu. Bala James Brooke lalu dikepit sida ari sepiak-sepiak tebing sungai.

Maya ka bamuk tu bala Rentap, udah munuh siku bansa ribai, iyanya Tuan Steward. Pala iya sempat ditabanka bala Iban, nyadi Tuang Steward tu dipelabaka bansa orang putih keterubah iya nyadi ka dengah kitai Iban. Tuai Laut Sarawak, Dato’ Patinggi Ali enggau bala iya seperau 26 iku mega parai maya ka betempun nya. Udah ka menang di Kerangan Peris Rentap lalu ngemai bala mulaika diri ke Ulu Skrang ngemai pala Tuang Steward. Nya meh keterubah Rentap besatup enggau bansa orang kulit burak. Tu mega ngepunka Rentap ukai semina begedi tang meda mua orang putih pan iya enggai nyentukka iya mati. Tang enda lama udah perang di Kerangan Penis tu bala tuai-tuai Iban di ili Skrang Orang Kaya Gasing, Sandom enggau Linggi nyerah diri sereta aum juak enggau Rentap lalu ngalih nyukung James Brooke. Semina tinggal Rentap seduai Bulan Genaya enggau bala Iban Ulu Skrang agi mengkang angkat ngelaban Raja. Tang enda lama udah nya Bulan Genaya ninggalka Rentap lalu ngalih nyukung Raja James Brooke.

Besatup Ba Ujut Maro (Beting Maru).

Sebedau ka besatup enggau bala James Brooke ba Beting Maru tu, iya ka bendar, Rentap sama-sama enggau Linggir Mali Lebu, Aji apai Limpa enggau Abang Apong tuai Laut Spaoh baru pulai ngayau Melanau di Igan, Matu enggau Paloh di Nanga Rajang. Udah Melanau alah sida iya beguai-guai deka ngalahka Sarikei, tang enda ulih Laut enggau Melanau di Sarikei udah sedia.

Meda Sarikei enda ulih dialahka, Rentap lalu nguluka bala iya nikal lalu deka ngalahka Bidayuh di Duri dalam Batang Sadong iya ka suba kala udah dialahka Iban enggau Laut Saribas enggau Skrang ti betuaika Orang Kaya Pemancha Dana ‘Bayang’ begulai enggau Datuk Patinggi Udin ari Rantau Anak di Bemua. Tang enda mukai-mukai malamnya maya sida iya meraka Nanga Kalaka (Batang Krian), semak Beting Maru dia deh perau-perau sida ditembak ‘sekunyir’ (kapal wap tauka ‘steamer’) bala raja Sarawak ending sedia ngipa sida iya dia. Maya tu meh Rentap nunjukka pemerani sereta pengering iya. Iya nadai kakang-kakang matak bala iya ngelanggar sebuah kapal perang James Brooke ti ngempang Nanga Saribas. Ukai semina nya, kira-kira 80 buah perau pengayau Iban Balau enggau Sebuyau serta Laut Sarawak mega sama ngipa sida ba Nanga Saribas.

Keterubah kapal bala James Brooke semina ngenan aja, meda bala Rentap nyau semak sesemak kapal James Brooke lalu ngansakka sida iya enggau enjin kapal perang. Kenu ka orang tuai menya injin tau belanda. beratus-ratus iku bala Rentap mati lemas diasakka kemudi kapal tauka dipantap bala Iban Balau enggau Sebuyau ka betuai ka Orang Kaya Temenggong Jugah ari Lundu seduai Orang Kaya Janting ari Lingga ti ngempang Nanga Saribas.

Nasit amat Rentap enggau bala tuai ka bukai, baka Linggir, Abang Apong enggau Aji enda bebadi laban sempat ngerarika diri bekayuh masuk Batang Saribas. Kenu ka jerita, pengelama sida ka besatup ba Beting Maru itu kira-kira bisi lima jam.

Tiga hari udahka besatup ba Beting Maru tu, ‘bala Raja’ lalu besatup sekali agi enggau bala Linggir ‘Mali Lebu’ di Nanga Peka, Paku, Saribas. Aji enggau bala iya mulaika diri ke Padeh. Rentap enggau enggau bala iya mulaika diri ke Ulu Skrang lalu nirika kubau ba Nanga Tabat di tatai Bukit Sadok ba entigis Ulu Saribas enggau Ulu Skrang. Ari tu sida iya ngemataka Sungai Lang sereta suah ngelancharka kayau anak nyerang Laut enggau Iban ili Batang Lupar enggau Batang Saribas iya ka nyadi munsuh Rentap laban sida udah nundukka raja.

Tuan Allan Lee Mati di Nanga Skrang; Rentap Nambahka Ensumbar.

Udah Perang Beting Maru, James Brooke lalu mendirikan kubaunya ba sekeda nanga sungai ka nyadi penama enggau pemansut Iban ngayau ba sekayu menua Bagi Kedua. Perintah nirika kubau keterubah mebal Nanga Skrang udahnya lalu nirika kubau di Nanga Lingga. Tuju Kubau-kubau tu endang kena nagang Rentap enggau bala iya ari Ulu Skrang mantu Iban Saribas nyerang Iban bukai, Iban Balau enggau Sebuyau di sepemanjai Batang Lupar. Kubau di Lingga dijaga Tuan Allan Lee enggau dibantu bala Balau, Kubau James di Skrang dijaga Tuan Brereton enggau dibantu oleh orang Iban Skrang ili ka betuaika oleh Orang Kaya Gasing enggau Linggi apai Belabut

Rentap ringat amat meda nanga sungai iya ka endang jalai sida iya selama jeman tu udah di sekat perintah, laban nadai agi jalai iya ke Batang Lupar enggau pesisir pantai Sarawak. Ketegal tu Rentap lalu ngemai bala iya nyerang kubau Nanga Skrang ka baru tembu. Tang taja pia berita sida iya ka deka nyerang kubau nya jampat amat ditemu Tuan William Brereton di Nanga Skrang, Nya alai iya lalu minta tulung Tuan Tuan Allan Lee ka nyaga kubau di Nanga Lingga. Datai mehj Tuan Lee ngemai bala Iban Balau ngenan enggau Tuan Breton di Nanga Skrang.

Perau Rentap enggau bala iya pan datai lalu nuju ke kubau, meda bakanya ladu dibedil bala sida Tuan Allan Lee enggau William Brereton. Rentap enggau bala pengayau iya lalu tekenyit sereta lalu ngetu. Sida lalu beguai-guai nikal ke ulu ka agi lalu ngenan din.

 

Tuan Brereton enda puas bertimbak ari jauh nya alai sida iya lalu ngansakka bala Rentap ke ulu kin. Allan Lee enggau bala iya ngagai Rentap enggau bala iya ke hulu. Di ulu din bala rentap endang udah besedia ngeramka ba endur ka dikumbai Lintang Batang.

Meda bala Tuan Brereton enggau Allan Lee mansang ke ulu Rentap enggau bala iya pan mansutka diri ari endur ka belalai lalu deka ngelanggar munsuh, maya perau Allan Lee enggau Brereton bepansa enggau perau Rentap dia Layang menantu Rentap pun menumbuk Allan Lee enggau suar Allan Lee lalu rebah, maya nya meh Layang engkechit mumpung pala Allan Lee. Tang nadai ga orang ka tuai-tuai nyeritaka ulih ka enda pala Allan Lee diambi Rentap enggau bala iya.

Meda Tuan Allan Lee udah parai Tuan Brereton lalu ngemai bala iya undur mulaika diri ke Nanga Skrang, Rentap enggau bala iya lalu mulaika diri ke Ulu Sungai Lang.

 

Meda Rentap enggau bala iya rari, dia Orang Kaya Gasing ka begedika Rentap, nadai berunding dulu enggau Tuan Brereton lalu nguluka bala iya ngagai Rentap ke Ulu Skrang, tang sida enda tegagaika Rentap. Pengujung iya Orang Kaya Gasing enggau bala iya lalu nunu lebih 20 buah rumah panjai Iban Ulu Skrang ka ngelama tu selalu nyukung Rentap. Gaga amat James Brooke meda ulah Gasing baka nya.

Udah ka besatup ba Lintang Batang ari ulu Nanga Skrang dia Rentap lalu nambahkan ensumbar iya munyi tu.

“Rentap Tanah, Rentap Menua,

Tuan Lee mati enda berega

Tuan Brereton tau masukka kain,

Enda teanjungka bala,

Rita Layang terang mandang Ai Rupa

Abang Aing badu agi mendingka Raja,

Undup abis melut leka mata,

Balau bekerangau sebelah kerapa.

 

Betempuh di Sungai Lang.

Pemarai Tuan Allan Lee di Lintang Batang, semak Nanga Skrang udah ninggika nama Rentap ba bala anembiak iya enggau bala tuai serang ka semak menua nya. Ketegal Nanga Skrang udahditutup Kubau James, nadai agimeh jalai Rentap ngayau mubsuh-mubsuhnya di ili Batang Lupar enggau Batang Saribas, Nya alai diatu Rentap lalu nyerang Iban Ulu Ai, sida ka tuai nadai nyebut nama laya Rentap enggau Iban Ulu Ai.

Kenu ka jerita maya Rentap ka nyerang Iban Ulu Ai sida iya kala bertempuh enggau Iban Ulu Ai ka betuaika Menggong anak Gunggang yang bergelar ‘Gerasi’ di Nanga Mengiling, ke ulu mimit ari Nanga Jela. Gunggang ‘Gerasi’, tu apai Menggong tu mega tuai kayau Iban Uli Ai ka kering sereta beberita maya nya kelia. Kenu ka jerita alah Menggong tu laban, iya mega parai dibunuh Rentap .

Pengawa Rentap ka nyerang Iban Ulu Ai di Nanga Mengiling enggau pemarai Tuan Allan Lee di Nanga Skrang Rentap ngasuh Raja James Brooke semakin pedis ati ngagai Rentap. Ari Kuching, James Brooke datai ke Skrang lalu nganjung berita ke Sungai Lang di Ulu Skrang untuk memujuk Rentap bebaik enggau lalu nyerah diri ke Kubau di Skrang, Tang ka Rentap seagi iya idup anangka bebaik meda mua orang putih pan iya endang enggai.

 

Meda Rentap kering ati agi ka ngelaban perintah James Brooke lalu nagtur bala pengayau betuaika anak menyadi iya, Tuan Muda Charles Brooke enggau Johnson Brooke enggau beratus-ratus orang Iban enggau Laut nyerang Rentap di Ulu Sungai Lang. Rentap enggau bala iya alah, iya empu bisi telih ba pah kena timbak bala raja, tang taja pia iya sempat ngerarika diri ke tuchung Bukit Sadok.Enda lama udah Rentap ka alah di Sungai Lang, Tuan Brereton penguasa Kubau James di Nanga Skrang pan mati laban penyakit pedis perut

Rentap Nan di Bukit Sadok.

Kenu ka jerita, maya nya menya ka penemu bala Iban Rentap di Bukit Sadok endang enda ulih alah belama iya laban ari mimpi bala Iban ka semak endur nya, laban Bukit Sadok endang dijaga, dikemataka orang Panggau Libau’ ti nulung Rentap sereta mega nulung Iban bukai ka sama berkubau di Bukit Sadok. Baka ka ngamatka mimpi, kayau bala Raja ti keterubah deka ngalahka Bukit Sadok semina baling ngapa. Kenu ka jerita udah lapan ari niki Bukit Sadok, datai ba tuchung bukit, maya sida belabuh deka nyerang kubau Rentap dia deh enda mukai-mukai ari lalu kudi, ujan enggau kabut, ari nyau petang nadai dipeda menua. Kudi tu nyadi dua tiga ari. Meda bakanya Tuan Muda lalu ngemai bala iya nurun ke kaki Bukit Sadok, tambah mega Abang Aing, Senior Native Officer ari KubU Alice di Simanggang ka nguluka bala Laut balat amat bebadi kena belat bala Rentap enggau batu. Tu mega ngujungka iya parai

Kenu ka jerita ujan enggau kabutnya endang diasuh orang Panggau kena ngelindung bala Rentap. Datai bala raja di pangkalan, dia sida meda mayuh perau udah rarat laban bah besai

Meda bala raja nurun bukit Rentap lalu manjung sereta bejaku “Semina Iban ulih munuh Iban, kita orang putih enda tetikika bukit tu, lalu enda telabankan kami di darat” kata Rentap “Bai meh semua meriam nuan an menua Al Ngelan nyin (England), kami enda takut ka nuan, aku tu meh Rentap Raja Ulu” Pia ka Rentap.

Setaun udah tu dia Tuan Muda Charles Brooke enggau James Brooke Johnson lalu ngatur kayau ti kedua ngelaban Rentap di Bukit Sadok. Iya ka sekali tu seduai iya ngemai mayuh agi bala pengayau sereta mayuh agi meriam ari ka dulu suba.

Sebedau bala raja angkat ke Bukit Sadok, sida iya dulu betempuh enggau bala anak Dana ‘Bayang’ iyanya sida Aji, Nanang enggau Luyoh di Sungai Langit. Maya tumeh Aji mati. Udah ngalahka Aji di Sungai Langit bala perintah pan bebagi dua, sebagi angkat ke Ulu Entabai ngalahka Panglima Mujah ‘Buah Raya ka ngelama tu suah nulung Rentap, lalu sebagi agi enggau Tuan Muda Charles Brooke seduai James Brooke Johnson nuju ke Bukit Sadok deka ngalahka Rentap.

Mujah ‘Buah Raya’ di Entabai alah tang kubau Rentap di Bukit Sadok enda alah dikebuska leka meriam bala perintah. Iya ke sekali tu bala Rentap ngelaban enggau pengabis ati ngena panah, sumpit enggau batu-batu ka umbas pemesai sereta mega ngena senapang enggau ka diberi Sherip Masahor ari Mukah.

Udah ka menang kedua kali Rentap lalu nyumbungka diri. Iya nyarak bini iya Sawai lalu jadi enggau indu dara biak ka digelar iya ‘Ranee Bukit Sadok” sama enggau nama bini Charles Brooke ‘Ranee Magaret of Sarawak’. Ulah rentap tu ngasuh sekeda bala anembiak iya begedi sereta ninggalka iya lalu ngalih nyukung perintah.

Udah Aji mati di Sungai Langit, Nanang enggau Luyoh enggai agi ngelaban perintah di tanah rata, tang seduai iya nyengulai Rentap di Bukit Sadok, ngaga kubau ari baruh enggi Rentap. Tang enda lama udahnya enda mukai-mukai sida iya charut enggau Rentap, laban Rentap enggai mulaika ubat bedil enggi niang adi sida Aji suba. Kenu ka Rentap ubat bedil nya udah diberi Dimah, balu Aji ngagai iya.

Kelimpah ari nya Nanang seduai Luyoh enda sampai ati deka ngelaban perintah laban sekeda bala Iban, kelebih agi Iban Saribas enggau Kalaka endang bala sida iya sebilik magang. Nya alai Nanang seduai Luyoh setuju bebaik enggau perintah. Meda Nanang seduai Luyoh nundukka perntah nadai berunding enggau iya dulu, Rentap ringat amat lalu nunu rumah panjai enggau kubau ka ditinggalka sida Nanang. Meriam ‘Bujang Timpang Berang’ ka enda sempat dibai nurun lalu diambi Rentap. Meriam nya ulih apai sida iya Dana ‘Bayang’ di Sambas berapa taun ka udah lalu. Ba batang meriam nya bisi tulis taun ‘1515’. Diatu meriam nya dipandangka ba Kubau Alice di Betong.

Pagi udah bala Nanang nurun, bala raja pan lalu nimbak kubau Rentap ari tuchung Bukit Serok ka begembar enggau Bukit Sadok. Pemuaska bebalas timbak dia kubau Rentap lalu rubuh, siku ari bala Rentap ka nimbakka meriam kena timbak, darah iya lalu mechik ngemasahka ubat bedil. Nya alai bala Rentap pan nadai daya agi, nadai agi ubat bedil. Nemu diri alah dia Rentap lalu beguai-guai ngemai bala iya rari ari endur nya.

Udah Rentap rari dia siku manuk sabung iya ka benama Manang Usay lalu nurun ke baruh nuju bala raja, iya ngedarka ilang lalu bejaku ‘Ka ngiga raja’ ka iya. Iya lalu bejalai nuju Tuan Muda Charles Brooke, lebuh iya nyau semak Tuan Muda, dia deh enda mukai-mukai kaki iya tak tesangkut ba urat engkajang, iya lalu rebah. Maya nya meh Tuan Muda lalu numbuk iya ngena lunga tang enda kena. Udah nya baru Tuan Muda nyintak pedang salin iya, lalu mantap perut Manang Usay. Manang Usah lalu mati tekala nya.

Kenu ka jerita Rentap enggau bala iya rari nurun Bukit Sadok lalu nunu Sungai Penabun. Ari nya sida iya niki Bukit Jukat. Keterubah iya sida nuju endur ka dikumbai Badak Sendak, Udah nya baru sida iya ngagai endur ka dikumbai Terjun semak Nanga Serigia. Udahnya sida iya ngenduh enda lama ba Bukit Lanjak Entimau, sebedau sida ka Bukit Stulak.

 

Maya Rentap di Bukit Stulak, Iban Julau ti betuaika Ranggau seduai Janting ‘Lang Labang’ angkat ngelaban perintah Brooke, sida iya ngerarika diri lalu belalai ba sebelah Bukit Dugan, Bukit Lanjak, lalu ke Bukit Stulak nyentukka ke Bukit Batu di Ulu Mujong, Katibas. Ranggau enggau Janting lalu begulai enggau Iban Katibas ka bekubau di Bukit Batu enggau Bukit Salong di Ulu Mujong, Katibas. Penyarut sida tu pukas dalam 1904, udah sida ka alah laban perintah ka betuaika Minggat seduai Chulo ‘Tarang’. Meda endur nya enda tentu likun Rentap lalu nguluka bala iya ninggalka Bukit Stulak lalu pindah ke Ulu Wak, pati Entabai di Pakan, Ulu Julau. Dia meh Rentap diau nyentukka pemati iya.

Pemati Rentap.

Rentap mati dalam taun 1870-an. Bisi mega penerang madahka iya mati dalam taun 1863, enti pia aruh ga iya enda ulih angkat ngelaban baru laban semina dua taun sepengudah iya ka alah di Bukit Sadok 1861. Umur Rentap maya iya ka mati dipelabaka enda biak ari 70 tahun. Iya dilumbung di tuchung Bukit Sibau sabung antara menua Ulu Wak, Ulu Kabo, Ulu Budu, Ulu Sarikei, enggau Ulu Binatang. Diatu kena pegai bagi menua Sarikei.

 

Diatu, peturun kelima enggau keenam Rentap diau di Ulu Wak, Pakan, Sarikei. Udah lebih ari 100 taun (1870-an -1989) ‘lumbung’ ditejuka ngapa di Bukit Sibau, entubung iya nyau udah buruk. Nya alai dalam taun 1989, Perintah Negeri Sarawak lalu ngaduka ‘Lumbung’. Sentubung iya digaga baru, ditutup ngena cheremin ngambika rangkah iya ulih dipeda bala mayuh. Iban endang mayuh berani, tang Rentap semina siku aja, sida ka bukai enda lebih ari semina orpotunis, beambi ulih ka diri empu enggau diri sebilik.

23 responses

  1. tabi ngagai nuan aya! puas ga begiga ka leka jako iban dia aku tepansa ka blog nuan tu! Chukup gaga ati aku meda pemaioh bengkah penemu/asal kitai bansa Iban ti tau nyadi ka sidi, penemu & dikungsi ngau bala
    bukai! Aku ko nuku ka, nti ensumbar Rentap benama Libau kati ka Jiram pan mega ensumbar Rentap deh – minta nuan meri nie bagi seduai tu? Di temu aku ari blog Uchu Senglang Burong, Gregory Nyanggau Mawar: A26.122 Jiram “Rentap”* was a war leader who attacked the Kanowits shortly before the arrival of James Brooke in Sarawak. He died of starvation (tasah) during this expedition(http://gnmawar.wordpress.com/tusut-iban/tusut-ari-sengalang-burong/)

  2. Jiram ‘Rentap’ tuai Iban Paku ka idup sebedau penatai James Brooke (1830an) lalu Libau ‘Rentap’ @ Rentap Tanah, Kudi Menua….Dalam jerita tu, Iban Skrang dipelabaka ada di Batang Kapuas dalam taun 1800. Seduai nadai kaul enggau pangan diri semina ensumbar ka sama.

    JIRAM ‘RENTAP’
    While Jantan was chief of the Paku watershed, his brother-in-law, Jiram whose nick-name was Rentap, was one of the leading warriors in the lower part of the same river.

    In the year when Jantan and his followers were farming the Ngiau lands, they began to build a big warboat; and Jantan also asked Rentap to build another as large as his. They built these boats at Ulu Ngiau in the upper Paku River.

    After the boats were completed, Jantan called for a big meeting in his house, to discuss which countries they would attack. In this conference all the warriors appointed Rentap to become their war- leader to attack the Kanowit tribe on the Rejang. They did not want to waste time attacking the people of Sarikei and Binatang rivers who had been regularly attacked by Mujah Buah Raya of the. Julau and Igoh Apai Lamban of Ulu Binatang. These two war chiefs were Saribas nigration leaders who had settled in those parts of the country.
    Jantan doubted whether it was safe to pass so many hostile people in the Rejang on their way to attack the Kanowit tribe, who lived along the right bank of the Kanowit River near its mouth. But in spite of Jantan’s hesitation all the warriors were determined to attack with Rentap as their leader. At the conclusion of the agreement Jantan and Rentap invited all the Paku and Anyut warriors as far as the people of Nanga Salamoi down river to join the expedition.

    Hearing that the Paku Ibans under Rentap were preparing to raid the Kanowit tribe, the Bukitans who lived in the Julau River sent messages to warn the Kanowits of the coming attack. When they received the message, the Kanowits instantly called the Rejang people to corne and reinforce them.

    After the arrival of the Rajang’s the warriors of the two tribes started to fortify themselves in many different ways. They collected two long semambu canes which they placed across the rivers, below the surface of the water, at Nanga Kanowit. Both ends of these canes were tied to big trees, whose lower trunks had been partly cut so that they could be felled quickly when the enemys boats passed them.

    Early next morning when it was still dark Rentap’s and Jantan’s boats entered the Kanowit River. When they passed above those canes, the Kanowit warriors cut through the trees which lifted up the canes turning the boats upside down. Rentaps and Jantans boats were instantly capsized, and all the warrior’s weapons were lost in the river. The Iban fighters swam to the shores to save themselves. But when they landed they were attacked by the enemy who killed them easily as they had no more weapons with which to defend themselves. Out of all these warriors only very few could escape to the jungle to save themselves.

    As they fled aimlessly in the forest, Rentap and many others died of starvation at Nanga Pakan in the Julau River. Before he died Rentap told his brother-in-law Jantan to lead the survivors back to the Paku. He also asked him to look after the welfare of his wife and particularly to help bring up his fatherless children.

    After Jantan and his friends had buried Jiram ‘Rentap’ in the ground they left the place and wandered through the forests, seeking the way home. Eventually when they came to the range of hills between the Julau and Krian rivers, they were able to see in the distance the summit of Bukit Tengalat on the left bank of the lower Krian below Nanga Melupa. On seeing this they knew where they were. They walked towards it and crossed the Krian river; from Tengalat hill they went to the Rimbas, and so returned to their home in the Paku river.

    On their arrival home, Jantan told the people about their defeat by the Kanowits. All were sad to hear of this tragedy. Jantan and the other elders thought it was proper to honour the death of Jiram ‘Rentap’ and his deceased warriors with the ngerapoh burial in accordance with the custom begun by Garik when he buried the articles of his father, Kadam, killed by the enemy long ago. The place where Rentaps and his warrior’s rapoh were buried was on and around the top of Bukit Rapoh, near the Danau longhouse in the upper Paku. Today a number of the jars that were used can still be seen at that spot.

    Terima kasih

  3. Tabi ke nuan pangan..aku temegah ati udah meda jalai tusut cerita rentap ti di bantai ke nuan ba sukut tu..lama udah aku nguji ngiga sukut ke mantai pendiau pengidup kitai iban ari kelia nyentuk ke saritu tang apin kala aku tetemu…aku ngarap ke nuan anang puntan ati nusoi jerita tuai ke dudi ari ila..

    1. Terima kasih, juluk ati sigi ka mantaika semua perkara ka bekaul enggau pendiau pengidup kitai Iban, tang nadai tentu ari. Aku mega enda malu ngaku enti sema sapa-sapa madahka aku ngupi ni-ni jerita orang laban ba penemu aku nadai salah bekunsika pekara nya. Terima kasih ka sukung bala mayuh.

      Terima kasih

  4. manah gak cherita tu, laban nyerita ke pasal Rentap….Tang fakta ditu bisi ka ngasuh urang keliru, tau pansik baru enggau betul..

    1. Terima kasih ngagai nuan

      Aku minta ampun ….ulih nuan madahka aku ba senentang ni ‘fact’ ka tau ngasuh ‘confused’ . Ngagai sapa ka nemu dalam agi tauka nemu fakta ka betul manah amat enti kitai ulih bekunsi iya ditiu, ngambika semua nemu perkara ka betul. Taja pia bup ka dtulis Datuk Seri Edmund Langgu seduai James Ritchie manah ga …bisi fakta baru.

  5. cerita tuk amat berega ke kitai iban ! ngambi ka ngingat ka akik kitai rentap dulu menyak tik berani kempang nguan menua.

  6. Manah amat enti anembiak ke rebak baru macha artikel nya ngambi ke sida nemu bakani pemerani kitai iban kelia ngenan ke tanah bansa kitai iban.

  7. Tabi ka nuan MAB. Terima kasih ka utai di udah ditulis nuan ditu. Aku Dara/Jara William John, uchu Manggah/Seripah. Bisi dua iti facts ditulis nuan ditu saru. Menyadi apai aku di benama Luking (Jerry Lucking) parai di Singapore maia perang Jipun menya. Iya ditumbak ka ba Pendam War Memorial di Singapore. Niang aya tu ukai polis, tang iya attached/gawa enggau sedadu British as a medical corp (ti diatu nyangka nya meh disebut kitai Iban ‘derisa’). Menyadi sida apai ti tuai, Munan, parai bujang. Iya parai di menua sida apai suba, lalu ditumbak mega ba pendam di Pulau Kertau (Kerto), sama begulai enggau sida niang aki (Manggah), ini (Seripah) serta mega niang aki Munan kami. Menyadi apai ti lumor tiga (Lionel) Melina nadai maia mid 90s, ditumbak ba pendam Anglika di Kch. Menyadi indu, Lemok, nadai kena 22.10.1999, ditumbak ba pendam Methodist di Sibu ditu. Semina apai aku aja agi bedau ka sida menyadi. My father is 81 years old, still healthy, semina bengal aja.

  8. Mastinie Robert Suwor | Reply

    Hello.. terima kasih laban udah nulis cherita tu.. aku ditu benung ngadu research-mansik bala peturun Rentap, laban nya bisi mega kaitan ngau bala family aku sepiak Inek Iban aku ka kala diau ba ulu entabai/Julau kelia.. dalam family aku tu empu, bala kami bisi udah ngangkat ka nama ‘Munan’ (ianya pangkat uchu aku), ngau nama ‘Limbai’ /’Lembai’ (niang uncle aku k nyadi soldadu). Aku tu half Iban. Aku enda pasti asal family ari sepiak Iban (bala Indai aku), nya alai aku ka ngadu research, ni nemu..~ kada aku tu pun sekeda ari peturun Rentap.. bala sida aki inek aku sigi kala be-sebutka nama ‘Libau’ maya aku agik mit suba.. aku nadai entu ingat.. ka minta diterangka bakani k tusut kami ngau ‘aki Libau’ ulih inek aku k agi idup diatu pun, utai k ditusi inek aku nya pun confusing, kacau-bilau, enda entu terang laban k udah ‘nyanyok’. aku semina nemu indai ke ngada k ‘inek iban’ aku k diatu tu, datai ari ulu entabai, area Julau.. ngau bala sida tuai-tuai sida ya kelia kala disebut inek aku k dah nyanyok tuk, belaban ngau haja uhang putih kelia, alah, lalu ngelarika diri.. bah, enti kitai tu ditemu sekaban, anang malu madah k pangan diri.. jejak kasih.. aku pun ka ngiga kaban ari sepiak indai aku tu sapa sebenar ya.. tauka peturun Rentap, tauka ukai.. aku pun enda pasti.. tapi dalam family kami, sigi bisi ngangkat ka nama ‘Munan’ ngau ‘Limbai’.. (trima kasih skali da agi..) HOOO… HAAA..!!

    1. Tau pansik nuan ba Sarawak Museum Journal_ Iban History an Culture Heritage

  9. Bisi bala nemu jerita kayau ke Katibas tu ngau silik agi? Bakani Enchana tau parai maya tu? Ba ni sida batempoh? Kayau ke Katibas bisi 3 kali. Maya kayau ni Enchana parai?

    Putik: Menyadi Minggat ka benama Enchana ‘Letan’ parai maya ka betempuh ngelaban Iban Katibas.

  10. Bakani sida Mujah tau alah? Bisi ngelaban sida ia? Sapa manuk sabong Mujah? Nama Lintong “Mua Ari” nyak manuk sabong Mujah tauka ukai?

    Putik: Mujah ‘Buah Raya’ di Entabai alah….

  11. Ba ni Bukit Dugan tu? Ba Ulu Ensiring?

  12. Bakani Enchana tau parai maya kayau Katibas nyak? Ia parai maya kayau Katibas ti keterubah kini, maya bala raja alah laban bong tekam Manggi?

  13. Ucu Lang_Buban Skrang | Reply

    agi bisi kini peturun Renggi,Linggi sereta peturun Gila Gasing sebelah ai Skrang Ili?..Naka ke diatu, lalu nadai agi silik pansik peturun sida tok dikeluarka ba bup chelak kemaya hari..Ukai ka ngusai ke cherita lama tang pansik tok manah ke penemu kami ke rebak baru.

  14. keling ambun darusan batang ai | Reply

    terima kasih ke langgur pengingat jeman tu menyadi. Ari pun sampai ke ujung nang di telaah aq ngau silik sereta lansik berindikka pemaik besadungka pemajik ari sebengkah sejarah kitai iban.

  15. Pecaya ngagai Jesus Kristus tinggal ke utai udah lama kelia.. Tuhan merekat.

  16. Aku meri besai terima kasih ngagai penulis cerita ketuai Iban ti benama Rentap tauka bali nama Libau orang ti berani sereta bisi pemintar ngetan ke menua enggai di pegai bansa bukai kelia. uji enti kitai Iban tu kelia sama baka ati bujang berani baka Rentap tu kelia sama nyukong Rentap tu kelia aku pelaba sampei saritu kitai Iban nadai berani deka ngacau kitai. Ari cerita sida aki raja berani tu meh orang bansa bukai sampei kediatu udah nemu kitai Iban tu enda seati enggau bansa diri. Nesal dudi nadai meh reti laban kitai Iban sigi udah ulih di kemeli ka bansa bukai.

  17. Terima kasih ka jerita ti udah ditusoi bekenang ka pasal pemerani bansa kitai (IBAN) datai ke sida suba engai ka dipegai/serta engai ke menua sida dialah ka orang bukai tang ka diatu deh dini meh pemerani ti diturun ari aki ini bansa kitai, ukai ka nyabong tauka ka ngansak sebaka sida nya tang meh ngasoh kitai berunding serta bepenemu ngambi ka bansa kitai enda agi bejaku “begulai sejalai” mina jaku aja, mayuh ka agi bansa kitai enda sepenemu engau pangan diri, mudah amat di kemeli ka orang bukai sampai ka pindah ka nama beapai ka orang bukai ( kitai IBAN oooi peturun Raja Berani)
    RENUNGKANLAH DAN FIKIRKANLAH SAPA KITAI

  18. Roderick Jonathan Brinau | Reply

    Tabi basa ngagai Tuan ke bempu blog. Nyadi aku tu siku ari peturun Rentap. Ari pansik sereta tanya, tusut ari Rentap ke ditemu aku ianya:

    Ningkan x Imbong = Rentap, Jarop, Ringgit, Lepo, Serini.

    Rentap x Sawai = Tambong, Berenggang.

    Jilan x Berenggang = Dilang

    Dilang x Ngian = Samana

    Samana x Ijot = Lenta, Saat, Jilan, Hilda Rinta, Belili.

  19. Meri tabi basa enggau besai terima ngagai tuan ti bempu blog tu. Rindu amat asai ati udah ampit enggau maca rita siko ari bansa kitai Iban ti beberita berani ti enggai di kemeli ka bansa bukai kelia. Aku arap ka semengat niang aki kitai Libau (Rentap) seruran idup belama ia ngemata ka bansa kitai Iban ngambika kitai seruran bisi pengering napi penguji lalu nulong kitai bansa Iban belama ia. Oha oha idup Libau (Rentap).

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: