TUAI IBAN ARI SUBA DATAIKA KEMAYAARI TU.
Kitai Iban endang bisi tuai kenyau ari kelia. Bala tuai tumeh ka ngiring sida pindah ari Kalimantan melunggang ke menua Sarawak lalu nguluka anembiak besatup enggau munsuh ka nanggul penatai enggau pendiau sida di menua tu. Nama-nama bala tuai tu endang meruan disebut dalam tusut enggau leka main baka timang enggau renung.
Sekeda peturun tuai tu lalu nganti sida nyadi tuai tampung-menampung dataika tubuh uchu ichit sida, tang taja pia sida tiris pantis sida tu ukai dichiri enggau chara otomatik tang agi bepanggai ba pengelandik enggau pemerani iya ngiring anembiak redak, kelimpah ari ka bepenemu ba adat enggau sejarah bansa.
Maya Iban apin bisi kaul enggau bansa bukai, baka tu ka ripih tuai-tuai Iban:
- Tuai Serang
- Tuai Kayau
- Manuk Sabung
- Tuai Menua
- Tuai Rumah
Sepengudah Iban bekaul mimit enggau bansa bukai, kelebih agi perintah Brunei, tuai kitai lalu diberi pangkat baka; Orang Kaya, Orang kaya Pemancha, Orang Kaya Penglima enggau Orang Kaya Temenggong. Pangkat tu tanda sida taluk mimit ka perintah Brunei. Tuai-tuai ka begelar baka tu enggau pendiau sida iya iyanya:
- Orang Kaya Beti ‘ Tajai Ngidang’ ari Padeh, Layar, Betong. Mati maya betempung nelaban bansa Seru di Nanga Melupa, Krian.
- Orang Kaya Orang Antau ‘Linggang Nengeri’ ari Rimbas. Mati alah serang ngelaban OK Janting, Banting, Lingga.
- O.K Gun ‘Mangku Bumi’ ari Rimbas (Menyadi OK Antau). Mati alah serang ngelaban OK Janting, Banting, Lingga.
- Orang Kaya Janting, Sebuyau.
- OK Temenggong Tanduk, Melupa, Krian, Saratok. (Diberi Imam Molana, Kabong). Mati alah serang ngelaban OK Janting, Banting, Lingga.
- OK Pemancha Dana ‘Bayang’ ari Padeh, Layar, Betong. (anak OK Beti ‘ tajai Ngindang’). Mati tuai 1854.
- OK Pengelima Randi, Padeh.
- OK Baul, Layar.
- OK Akun ‘Bedindang’ , Padeh.
- OK Jamban (Apai Jamut), Krian, Saratok.
- OK Rabong, Skrang.
- OK Jugah, Lundu.
- OK Kalong, Lundu.
- OK Gasing, Skrang.
- Penglima Mujah ‘Buah Raya’, Entabai, Julau (Diberi Sherif Masahor, Mukah).
- Penglima Bakir, Betong.
- Penglima Budin ‘Gerasi’ , Stambak, Saribas.
Tang, tajapan tuai-tuai tu bepangkat baka nya ukai retinya sida bekuasa penuh merintah menua lalu bekuasa ngumpul pupu (cukai). Iya ka batang, pangkat tu semina tanda sida iya udah bulih merit ba pengawa tauka pemerani sida maya ngayau. Sekeda antara tuai ka dirintaika di atas mega nyadi Tuai Serang (OKP Dana ‘ Bayang’), Tuai Menua (OK Jamban, Krian, enggau OK Jugah, Lundu).
Maya pegai James Brooke, perintah enda agi meri pangkat Orang Kaya nagai tuai Iban, baka iya ka meri ngagai tuai Bidayuh enggau Melanau. Tang datai ba maya Charles Brooke iya neruska atur perintah Brunei meri pangkat nya. Tuai ka diberi pangkatnya baka tu:
- OK Kalong (1), Lundu.
- OK Nyua, Julau.
- OK Pemancha Nanang, Padeh.
- OK Jaul, Seduku, Lingga.
- OK Jemat, Lundu.
- OK Kalong (2), Lundu.
- OK Nyua, Kanowit.
- OK Dana, Sibu.
Kelimpah ari tu, Raja Sarawak ti kedua mega meri pangkat Penghulu Dalam ngagai Munan anak Minggat di Pulau Kertau, Sibu enggau Penghulu Dalam Ujang, Tuai Rumah ari Bawang Assan, Sibu dalam taun 1900. Udah Penghulu Dalam Ujang dikemaduka ari pengawa iya, pangkat tu lalu nadai agi diberi ngagai tuai kitai. Penghulu Dalam Munan dichiri nyadi kaban Kunsil Nengeri dalam taun 1906 ngagai 1911.
Di menua Kalimantan, pangkat baka Patinggi, Temenggong, Pateh enggau Radin mega diberi ngagai sekeda tuai lama kitai Iban. Chunto sida tua baka tu:
- Patinggi Gurang, Kayung.
- Patinggi Ngadan, Saribas.
- Temenggong Simpi Pala, Ulu Batang Ai. (Nitihka Bup Gempung Jerita Tuai Iban, pangkat tu diberi orang Panggau Libau)
- Radin Tanjong.
- Pateh Ambau, Pengkalan Tabau, Batang Ai. (Pateh bisi dipansa dalam Sejarah, Jawa baka Pateh Gajah Mada, Perdana Menteri Majapahit).
Dataika sari tu di Kalimantan, pangkat Temenggong enggau Pateh agi mengkang diberi perintah Indonesia ngagai tuai-tuai Iban (Nitihka Benedict Sandin, SMJ:1970). Di Sarawak, dalam sejarah baru Pangkat Temenggong keterubah diberi Charles Vyner Brooke ngagai Temenggong Koh anak Jubang ari Balleh dalam taun 1924. Ketegal Penghulu Koh ka udah mujur ngatur pemaik “Bebanchak Babi” antara Iban Batang Rajang enggau Kayan ari Ulu Batang Rajang enggau Long Nawang, Kalimantan. Maya pegai Perintah Koloni pangkat tu diberi ngagai Temenggong Jugah anak Barieng, Merirai, Balleh, Kapit dalam taun 1955. Tun Jugah ichit Penghulu Melintang mega dipelabaka keterubah enggau ka penudi Iban dititah gelar Tun di Malaysia. Niang Jugah mega nyadi Menteri Perintah Besai ka bekaul engggau Hal Menua Sarawak ka terubah enggau ka penudi.
Tampung lambar tu:
Palan Pengingat Kitai 
MANAH…