Mimpi Orang Kaya Pemancha Nanang

MIMPI ORANG KAYA PEMANCHA NANANG

Nyadi Orang Kaya Pemancha Nanang tu anak tuai Orang Kaya Pemancha ‘Bayang’. Iya jadi enggau Rabai anak Orang Kaya Penglima Randi. Nanang tau kayau lalu nyadi tuai megai menua nganti menyadi iya Aji, anak ke-3 OKP Dana Bayang. Iya suah bendar enggau menyadi iya Aji seduai Luyuh ngelaban Perintah dalam Saribas takar ka iya nunduk di Sadok dalam taun 1861. Nyadi meriam kena iya nan di Sadok, Bujang Timpang Berang ke bisi chap 1515 nya ulih apai iya Bayang nyerang ngalahuka Sambas. Diatu meruan  disimpan jadi ka pesaka bansa dalam Kubu Lily di Betong. Sereta iya udah nundkka Perintah, Nanang suah bendar nyadi tuai nulung Rajah ngalus ka menua. Iya parai dalam taun 1902. Nyadi Nanang suah bisi mimpi tang iya ke dikingatka dua iti tu aja:

Dalam mimpi iya, Nanang asai ka bejaiai niki Bukit Santubung. Datai iya di tuchung, dia iya bisi meda rumah orang sebuah tang panjai bendar. Iya lalu niki kia, datai di tengah rumah, iya lalu didudukka indu siku. Apin lama iya udah duduk, alai indu nya mai iya niki ka sadau. Nanang asaika lalu bejalai nunda udi iya.

Datai di sadau, indu  ngasuh iya malik. “Peda nuan Nanang,” ka indu nya, “semua rampa menua nyin alah magang kayau nuan ila, nadai siku sida berani nantai ka jari ngelaban nuan.” Indu nya lalu mai iya tama ngagai padung iya. Peda iya dalam padung bisi peninduk tiga iti. Ka indu nunjukka paninduk, “Iya ka ari kanan enggi nuan, tengah enggi aku, lalu  ari kiba nya enggi Ngumbang.” Indu bejaku baru, medah suh iya Ngumbang alah kayau laban iya. Tembu jaku nya, indu lalu madah ka diri Kumang, Nanang pan lalu dani.

Apin bengat lama udab mimpi nya, alai Nanang bisi mimpi baru. Nyadi dalam mimpi iya, iya ka asai diau ba langkau kajang di tuchung bukit. Lebuh iya diau dia, datai ribut tak lalu mangka ka langkau, langkau lalu terebai laboh ba pandai orang, bekerangan manah bendar.

“0o! lalu meh Nanang, enggau kami dua mandi”, ka indu siku ari dua iko ti benung mandi dia. Nanang lalu asai ka deka enggau seduai mandi. “Tu, ditu alai nuan mandi,” ka indu. Iya lain kia, lebuh iya baru datai dia, dinga iya indu siku bejaku ka iya, “Nyadi nuan nyampi indai, lagi aku manjah iya.”

Nanang pan lain duduk ba atas batu galang, indu Jalu manjah iya enggau ai selabu. Sereta iya dipanjah indu, indai indu lalu nyampi munyi tu:

“Nunda sampi Manang Tibi ke belian nyilup ari gentilang remang,

Nunda sampi Manang Chelung ka belian nengkuyung, di paras lesung telentang;

Nunda sampi Manang Matai ke belian mansai, di bidai pakan melintang:

Nunda sampi Manang Lansu ngelulu ka diri nubu di pun tiang.”

Nyadi ai salabu pan abis kena manjah iya, sampi indai indu nya pan abis ga. Udah abis sampi indai, indu lalu bejaku, ka iya, “Nyadi menya lebuh aku manjah Laja, apin abis ai aku, endur iya chelap. Nyadi nuan tu Nanang sebaka enggau Keling sama enda chelap laban ai selabu tanam.” Indu nya lalu madahka diri Kumang. Iya madahka bulu Nanang biring sempidan.

• Ditusui  Busok anak Gerijih, Entanak, Betong, enggau Selaka   anak Budin, Stambak Ulu, Betong.