WASHINGTON 6 Okt. – Sebengkah grup pemansik jaku, kemari madahka sida tetemuka siti jaku baru ka unik (nyelai) dikumbai Koro ba timur laut India, sida iya mega madahka pengirau ati sayauka jaku nya lenyau.
Bala pemansik tetemuka jaku Koro tu maya sida bejalaika projek National Geographic ‘Enduring Voices’, kira-kira semina 800 iku aja orang dipelabaka bejaku ngena jaku Tibet-Burma nya lalu sekeda sida beumur ari baruh 20 taun. Kenu ku sida, jaku tu nadai sistem tulis.
“Kami tetemuka jaku ka nyau ka lenyau lalu nguji ka ngemai iya keluar,” pia ku Fellow National Geographic, Gregory Anderson, siku ari tuai bala pemansik ka tetemuka jaku Koro.
“Enti kami nganti 10 taun agi, alai ekspedisi tu bejalai, kami nyangka enda tetemuka ngemayuh tu sida ka bejaku ngena jaku tu ,” pia ku iya.
Jaku Koro sigi bebida ari semua jaku Tibet-Burma enggau kira-kira semina 150 iku aja bansa sida tu ditemu di India, lalu mar amat deka nyidi jaku ka sama penatai enggau jaku Koro.
Jaku nya ditemu ba pelilih menua Arunachal Pradesh, siti genturung pendiau ka jauh di menua pesisir sereta bebukit-bukit. Temuai ke munua nya mesti minta permit dulu.
Sekeda pemansik ka landik pasal jaku ka kala kereja di Arunachal Pradesh enda kala ngerikut jaku bansa sida nya.
Pejalai National Geographic ka disempulang siku spesilis jaku India, Ganezh Murmu ari Universiti Ranchi, benung mansik dua jaku ka bukai, iyanya jaku Aka enggau jaku Miji ka bisi di pelilih menua mit di Arunachal Pradesh.
Sida iya bejalai ari rumah ke rumah ka digaga ari ba genturung pendiau ka bebukit, bala pemansik bejaku enggau bansa sida tu lalu ngeikut leka jaku ka dikena sida.
Lebuh ka bejalaika pengawa tu, sida tetemuka jaku ti ketiga, ti direjista dalam lis jaku standard antarabangsa tauka dalam pansik jaku India. Jaku ketiga tu dikumbai jaku Koro.
Sida ngerikut beribu-ribu jaku Koro kenyau ari pansik sida ka belabuh dalam taun 2008.
Jaku tu bisi inventori munyi ka nyelai ari jaku-jaku bukai ba pelilih menua nya. Jaku tu mega ngembuan tusun jaku ka kediri ari jaku bukai.
Chunto iya, dalam jaku Aka, leka jaku ‘babi’ disebut ‘vo’, tang dalam jaku Koro ‘babi’ disebut ‘lele’.
“Taja pan gaya geografi menua sida sama, tang munyi kedua-dua jaku nya bebida, enda nyalah-nyalah baka bida entara jaku English enggau jaku Jipun”, pia ku siku ari bala pemansik National Geographic, David Harrison, ka mega siku ari tuai ekspedisi nya dalam bup iya The Last Speakers ti dikeluarka apin lama tu udah.
Nyengkaum jaku Koro itu, penyampau jaku di dunya tu diatu bisi 6,909 bengkah jaku.
Tang kenu ku bala spesilis jaku, setengah ari jaku tu nyau ka pupus laban gaya idup nyau berubah, ulah bansa etnik ka malu, kena tekan perintah enggau laban mayuhkabuah bukai.
Siti ari tuju National Geographic ka bendar ngena projik Enduring Voices iyanya deka nyelamatka jaku-jaku ka nyau ka nadai agi di dunya tu.
Bala pemansik tu deka nyambung pengawa sida di India dalam bulan November ti ka datai, laban deka neruska pansik sida ba jaku Koro.
Siti pansik saintifik pasal jaku Koro ka dikeluarka dalam jurnal jaku-jaku India. – AFP
Palan Pengingat Kitai 