Jaku Kenang: Udah kala dibantaika aku ba GNM Iban Cultural Heritage.
ORANG KAYA PEMANCHA NANANG
Nanang tu anak tuai O.K.P. Dana “Bayang”, iya bebini ngambi Rabai anak Orang Kaya Penglima Randi ka bensumbar “Rantai” sama sida iya di Padeh, Layar. Entua iya Orang Kaya Penglima Randi mega raja berani Iban Saribas ka serambau enggau apai iya O.K.P. Dana “Bayang” ka mati dalam taun 1854. Udah Ajee mati ngelaban bala Raja di Sungai Langit dalam taun 1858 dia Nanang lalu nganti Ajee nyadi tuai Iban Padeh enggau Ulu Layar.
Maya iya agi biak dia Nanang bisi mimpi. Iya bemimpi asaika niki Bukit Santubong lalu betemu enggau Kumang. Kumang ngemai iya tama ngagai bilik peninduk iya lalu madahka jemah ila nadai orang ulih ngalahka Nanang dalam kayau. Dalam mimpi iya nya mega Nanang asai ka meda tiga iti panggau peninduk. Panggau ka sepiak kanan nya peninduk nuan Nanang, iya ka tengah nya enggi aku lalu ka ari kiba nya enggi Ngumbang Brauh Langit. Kumang madahka Ngumbang mega enda ulih ngalahka Nanang laban panggau peninduk iya ari kiba Kumang. Udah nya Nanang pan lalu tedani. Kelimpah ari mimpi iya nya, Nanang mega bisi bemimpi diberi Kumang enggau indai iya mandi, dia indai Kumang madahka Nanang deka berani, sebaka enggau sida Keling sida Laja ari Panggau Libau.
Udah Ajee mati di Sungai Langit Luyoh undur ke Mukah lalu berunding enggau Sharif Masahor iya ka maya nya endang bisi ati deka angkat ngelaban perintah Brooke lalu muru semua orang Erupa ari tanah Sarawak. Sharif Masahor lalu besetuju nyendiaka bala enggau senjata ka dikena Luyoh ngelaban perintah.
Udah ka berunding enggau Sharif Masahor di Mukah, Nanang seduai Luyoh lalu nirika kubu di Nanga Spak, ditu seduai iya ngenan deka ngelaban perintah bebalaska pemati adi seduai iya Ajee. Kenu ka Datuk Edmund Langgu, Ajee @ Saji tu ukai adi tang anak tuai Dana Bayang. Dalam taun 1858 kubu nya lalu alah diserang Tuan Watson enggau Panglima Bakir sereta Abang Aing. Sebulan udah ka alah di Nanga Spak, Nanang nirika kubu baru, tang alah mega diserang bala Tuan Watson enggau bala Bakir ari Kubu Lily di Betong.
Udah ka alah dua kali ngelaban bala perintah dia Nanang seduai Luyoh lalu badu agi ngelaban perintah di tanah rata. Seduai iya lalu ngulai Rentap di Bukit Sadok dalam taun 1858. Bedil besai “Bujang Timpang Berang” ka ulih apai seduai iya di Sambas berapa puluh taun ka udah lalu dibai seduai iya ke Bukit Sadok.
Ari kuta di Bukit Sadok tu Nanang seduai Luyoh nguluka bala seduai engau bala Rentap nulung Sharif Masahor ngelaban perintah di Mukah. Seduai iya nampak bendar nulung Sharif Masahor betempuh ngelaban bala perintah di Mukah enggau Igan.
Dua bulan sepengudah Sharif Masahor diburu perintah ke Singapura dalam taun 1861 dia Tuan Raja enggau Tuan Muda Charles Brooke nguluka nguluka bala besai ngalahka Nanang seduai Rentap di Bukit Sadok. Laban ka udah enda mujur ngalahka Sadok dua kali dulu ari tu dia bala Raja lalu tulihka runding ngemai meriam besai ka digelar sida “Bujang Sadok” kena nganchurka kubu Rentap.
Bala Raja nguluka Batang Layar ngagai Nanga Tiga. Ari nya sida iya nguluka sungai Tiput, muntang Spak lalu nuju Bukit Sadok. Datai di kaki Bukit Sadok dia bala sida lalu baum, Tuan Besai seduai Tuan Muda Charles Brooke madahka perintah nadai ati deka bemunsuh enggau Nanang seduai Luyoh, perintah deka ngampunka seduai enti seduai iya deka nundukka perintah. Tang Rentap enda ulih diampunka perintah laban iya udah bepenyalah munuh Tuan Allan Lee di Nanga Skrang beberapa taun dulu ari nya. Tambah mega Rentap sigi enggai bebaik enggau Raja Putih, taja pan perintah kala mujuk iya nundukka perintah ngelama tu.
Ninga penemu Tuan Besai enggau Tuan Muda munyi nya dia bala Iban Saribas lantang ati. Laban enti nitihka ati sida endang enggai bemunsuh enggau diri sama diri. Bala tuai-tuai Iban besetuju milih Jabu apai Umping engau menyadi iya Ngadan apai Rembi betemu enggau Nanang seduai Luyoh di Bukit Sadok.
Jabu seduai Ngadan pan lalu niki ke Bukit Sadok. Datai din seduai iya madahka jaku perintah Brooke ngagai Nanang seduai Luyoh. Seduai iya madahka diri setuju nundukka perintah, enti jaku nya ukai semina kena nipu seduai iya aja. Udah Nanang enggau Luyoh enggau bala seduai berunding enggau panjai dia seduai iya lalu ngemai semilan iku manuk sabung ka dikarapka seduai betemu lalu berunding enggau bala Raja di kaki Bukit Sadok. Datai din dia Tuan Besai seduai Tuan Muda ngasuh seduai iya nyerahka 400 tajau rusa tauka pulai ngagai mata duit $3,200 ngagai perintah ambika jamin seduai iya enda ngaga pengachau. Enti seduai iya nadai ngaga pengachau ngelaban perintah dalam kandang tiga taun ka deka datai perintah deka mulaika tajau seduai nya. Nanang seduai Luyoh pan setuju, lalu ngasuh Uyu apai Ikum nyuaka tajau nya ngagai perintah. Udah bala perintah lalu ngalahka Rentap di Bukit Sadok. Sadok pan lalu alah, tang Rentap dataika mati nadai kala ngaku diri alah.
Sebedau ninggalka Bukit Sadok dia Tuan Besai lalu ngempuruka bala tuai-tuai Iban Batang Layar, Paku enggau Skrang. Maya tu Tuan Besai madah perintah badu agi belaya enggau Nanang, Tuan madah Nanang nadai munsuh agi, enti Raja nadai munsuh, lalu Nanang enda tau ngayau agi enti enda dibai Tuan Raja. Tuan Besai lalu nangkan bala Iban enggau jaku, enda ngasuh sida agi bekayau pangan diri, lalu kemeranka pengawa bumai betupi enggau dagang. Udahnya Tuan Besai lalu ngatur pendiau sida Nanang menyadi. Nanang asuh iya diau di Buluh Antu, Padeh. Luyoh diau di Sungai Langit di Ulu Layar. Nya meh baka, seduai udah nunduk, alai pendiau pan Raja ngatur.
Ba pun taun 1863 dia Tuan Muda lalu ngemai tuai-tuai Iban Saribas baka Nanang ari Padeh, Linggir “Mali Lebu” ari Paku, Pangelima Bakir ari Betong, Minggat apai Runai seduai Chulo “Tarang” ari Awik enggau Krian ngayau ngukum bansa Kayan enggau Kenyah di Ulu Batang Rajang laban sida iya ngelalaika Sawing seduai Skalai ka rari kin udah ka munuh dua iku pemesai orang putih di Kubu Emma, Kanowit.
Nya alai pulai ari ka ngayau Kayan-Kenyah di Ulu batang Rajang dia Tuan Muda lalu ngempurka semua tuai-tuai kayau dalam menua bagi kedua baum di Kubu James di Nanga Skrang. Maya ka baum dia Tuan Muda lalu meri besai terima kasih ngagai bala sida kelebih agi ngagai Nanang ka udah nunjukka pemerani iya sereta penaluk iya ka perintah sepengudah seduai iya Luyoh nunduk di Bukit Sadok kena 25 ari bulan Semilan, 1861 suba. Maya tu mega perintah lalu mulaika 400 tajau rusa iya ti ka jamin seduai iya suba ngagai seduai iya baru..
Dalam taun 1886 dia perintah lalu meri pangkat Orang Kaya Pemancha ngagai Nanang, sama enggau pangkat niang apai iya Orang Kaya Pemancha Dana “Bayang”. Maya tu mega Bunyau apai Bakir lalu diberi pangkat nyadi Pengarah, iya Iban ti keterubah diberi pangkat Pengarah. Pengawa tu dipenyadi di Kubu Lili di Betong.
Dalam taun 1879 dia Tuan Maxwell, Residen Simanggang lalu ngasuh Orang Kaya Pemancha Nanang ari Padeh nguluka bala perintah mega dibantu bala Minggat seduai Chulo Tarang ari Kalaka, enggau Jabu seduai Utik ari Bangat, Skrang ngalahka Kedu “Lang Ngindang” tuai Iban Skrang di Nanga Bunu. Dalam kayau tu dia menyadi Nanang enggau anak menyadi iya Senabong seduai Timban anak niang Ajee bebendar amat laban ngingatka niang apai seduai ka udah dipumpung orang Skrang di Sungai Langit dalam taun 1858 suba. Tang Senabong seduai Timban mega enda panjai umur, seduai iya mati di Sabah maya pegi ngiga pengaruh kena bebalaska pemati apai seduai. Siku mati pedis perut lalu siku mati diempa baya.
Dalam taun 1886 nya mega Nanang sekali agi dikarapka perintah nguluka bala ngalahka Ngumbang seduai Bantin tuai Iban Ulu Ai ka angkat ngelaban perintah kenyau ari taun 1882 suba. Nanang ngluka bala Raja ka betubuh lebih 12,000 iku ngayau Bantin seduai Ngumbang di endur ka dikumbai Kedang di Kalimantan, Indonesia ka kena pegai perintah Belanda. Maya kayau tu bala perintah munuh dua puluh iku anembiak Bantin seduai Ngumbang lalu nunu lebih lapan puluh buah rumah panjai Iban ngelingi nya dia.
Dalam taun 1898 taja pan udah tuai agi mega perintah ngarapka Orang Kaya Pemancha Nanang nguluka bala perintah nyerang Iban di sungai Yong enggau Cheremin di Ulu Batang Rajang. Tu meh ka penudi Nanang nguluka bala perintah ngayau.
O.K.P. Nanang tu keterubah tuai Iban Saribas masuk pengarap Kristian. Dalam taun 1891 dia iya lalu dipilih perintah nyadi kaban penuh Kunsil Nengeri menua Sarawak ngarika bansa Iban datai ka iya mati dalam taun 1902 lalu dikuburka di Pendam Terusu di Padeh, Layar berimbai enggau kubur niang apai iya O.K.P. Dana “Bayang” enggau menyadi iya Ajee apai Limpa. Kelimpah ari Ajee seduai Luyoh menyadi lelaki iya ka bukai baka Buda seduai Unting sama nyadi katekis (catechist) enggau Gerija Kristian Anglika.
Palan Pengingat Kitai 
aku ukai ka berjako,laban ngenang bansa diri dimenua,uji perintai ka manah enggau pengelikun bansa kitai pulai ka baru menteri besai ka berabansa iban,baru kitai imun diau dimenua baru gayu guru,gerai nyamai lantang senang bansa kitai iban enggau dayak.
MANAH CHERITA TU AKIH . TAPI RINDU AGI ENTI DEH ULIH NULIH CERITA PASAL APAI O.K.P NANANG TU. IYA NYA O.K.P DANA ( BAYANG). ARI MIMPI IA BTEMU NGAU KUMANG LALU DATAI KA IA SAKIT CHICKIN FORK. SEPEGUDAH KA DIALAH KA IBAN BALAU MAYA BERIKAN NYARU BUNTAL. IA KA PUNTAN BAKA MENASAN JALAI JANI, LABUH BAKA BUAH MERINJAU ILI. ENDA TEBALAS KEDIRI KETEGAL SAKIT. AMAT MEH BAKA LINGGIR MALI LEBU & UNAL BULAN ARI LAYAR KA ENGGAU IA BEBALAS. NAMA ANAK IA LUYOH & NANANG NDA TEBALAS KA NYA . AMAT MH UMPU PARAI KENA GA CHICKIN FORK TAUN NYA. AMAT PIA MANAH ……… BAGUUUUUUUUUUUUUUUS ..
B.N.GROUP S/B
Terima kasih
Jerita OKP Dana Bayang lama dah keluarka oleh GNM ba Iban Culture Heritage. Taja pia tau ga peda nuan ditu. Pelaba aku nadai salah aku mantaika ditu baru, ngambika mayuh agi kitai tetemuka jerita lama kitai Iban.
Terima kasih ngagai kita ka ngeluar ka cherita tau ka mantai ka pengingat O.K.P.Nanang & luyoh. Ba penemu aku, orang ka baka niang Nanang & Luyoh tu meh Iban ka nadai guna2……. Orang ka dikumbai kitai ka maia ari tu “angkat pelir”. Sanggup ngayau bansa diri, nitih ka tunjuk orang putih ka nakluk menoa kitai. Patut meh tuai kitai bansa Iban dalam perintah ka diatu (Timb.Ketua Menteri Swk),enda salah2 nitih ka chuan niang nanang kelia, semina ka ngigga penguntung & pengaya diri empu aja serta nguleh ka pangkat aja tang rakyat enggau tanah tengkira kita bansa ambis di jual ia ngagai perintah di kena ia bebadas diri ba moa perintah………………Patut meh kitai Bansa enda uleh maju laban bisi orang ka dulu kaya kelia, udah ngulu ka kitai ngelaban diri sama diri, sepatutnya kitai ka rebak baru diatu ngepun ka baru serakup serta singkang pendiau ka lebih systematic agi nitih ka singkang bansa bukai ka lebih maju dalam berserakup, ukai majak nguleh ka untung diri empu…..
Iya…..sapa ka enda ingatka sejarah, sereta enda belajar ari sejarah….sigi deka ngulang penyalah aki ini kelia.
kitai iban sigi nyadi manuk sabong raja brooke,suruh
raja ngemesai ke menua sarawak berkayau kia berkaya
kitu, enda meh berunding minta nyadi tuai menuan ba
siti2 endur ke udah ngalah ke org ngelaban perintah raja
brooke, enti minta tanah anang alang2 minta surat nyadi
tuai menua enggau surat kar menua nya, enti utai tu bc
nyadi kelia, bc kitai iban diatu nyadi ORANG KAYA ari
bangat, paku, padeh, layar, lingga, seduku, krian,
rimbas, awik, lemanak, btg ai, btg lupar, btg rajang,
btg undup, btg seribas, btg layar enggau mayuh agi nama
menua ke bukai ti udah dikayau bangsa kitai….. enti
enda pia bc Ga Bangsa Iban Nyadi BANGSAWAN ngena
pangkat. ORANG KAYA TEMENGGUNG, ORANG KAYA PEMANCA,
ORANG KAYA PENGHULU enggau ORANG KAYA PANGLIMA. tapi
sayau utai ti berega tu nadai kala nyadi lalu tanah ti
kala di pegai sida ya berinsur lenyau, laban nadai bc
surat kuasa atas tanah enggau nyadi tuai…. 😦
enti deka nemu selik agi pasal tusut bala sida rentap tu laban rentap lari ari bukit sadok,ngili entabai masuk wak berumah ba kai kumbai orang, tebawai,panggil rentap mati dia ,lalu bala aki ini kami pindah ngagai nanga wa dalam kedup.nanga wa tu besai penyarut aki ini kami ngelaban bala minggat sampai iya kai nurun kai kami dibunuh minggat tang enti aku ngenang tusut tu anang enda nyamai ati peturun minggat.laban nya aki buyong selalu bebalas ka pengawa minggat udah ngalah ka sida iya ba nanga wa, dengah aki ba batang awik bisi tiga puluh iko tang enti ngasoh nusi cerita lengkap oleh tang anang enda nyamai laban tu kai di kumbai orang ngayau diri tau kumbai orang musuh diri simenuo
Ulih nampong jerita aki nuan Buyong nyak?
Minggat disebut ngayau Ensiring leboh bala ia bulih 81 igi dengah. Dek nyebut penyarut ba Nanga Wa (Wak?). Ukai kayau Minggat ke Ensiring nyak, ngal?
Terima kasih ke jerita nuan tu unggal. Aku semina deka ngemetulka siti pekara nya Bunyau apai Bakir tu ukai Iban ti keterubah iya bulih gelar Pengarah. Bunyau menya bulih pangkat Penghulu lalu anak iya Bakir bulih gelar Penglima. Kitai Iban ti keterubah iya bulih pengkat Pengarah iya nya Ringkai ak Empari, sekali petunggal enggau Bakir serta anak menyadi Penghulu Bunyau. Raja meri Ringkai pangkat nya ba Kubu Alice di Sri Aman.
amat
Nanang seduai Luyoh tu meh tuai ke bisi strategi dalam pengawa beperang. Seduai iya nemu ni maya bebunuh enggau ni maya ke ngetu bebunuh. In English military strategy, in time of war, we must prepare for peace and in time of peace, we must prepare for war. Nyadi Rentap tu tuai ti nadai nemu strategy beperang baka sida Nanang, Luyoh, Aji, Linggir, Unal Bulan enggau tuai ke bukai, laban Rentap tu “fugitives” (wanted dead or alive) ke endang deka di bunuh Raja Brooke empu.
siti deka ditemu aku unggal.. ni bagi pangkat kitai iban ke sigi diberi perintah brooke ngagai kitai iban. lalu baka ni ko peranan sida sida dalam jawatan nya. enti ulih arap ke nuan meri info mimit meh laban aku benung mansik perkara tok. terima kasih.
cukup badas cherita tok unggal..aku ka ngangkat ka nama nanang sigi gaga ati macha iya..tang aku iran ati laban anak madi aku pan bisi diangkat nama kedu…nama seduai nanang enggau kedu sigi munsuh?..nama aku diangkat ari niang aki aku penghulu di bawang assan sibu maya nya..dini gak aki aku nya bulih nama nya..ngangkat ka OKP nanang kini?
kita ke bisi mansa pasal Unal Bulan…aku ka nanya kita, ari ni kita bulih cherita pasal Unal Bulan? Ba sapa kita betanya? Kati kita nemu enggau silik pasal Unal Bulan? Sapa uchu ichit/peturun iya ti alai kita betanya?
Tusi diak meh jerita Unal Bulan nyak ngambi bala ninga alu sejarah ia dikeingatke nembiak rebah baru diatu.
Nama kabuah raja Brooke ngasoh bala Nanang neyrang Yong ngau Cheremin?
Bisi batempoh maya ba Yong ngau Cheremin nyak? Bisi dengah, tangkap ngau perapasan kini?