Pengelima Mujah Buah Raya.


PANGLIMA  MUJAH “BUAH RAYA”

( kala dibantaika aku ba GNM wp.com)

Mujah “Buah Raya” tu siku tuai kayau Iban ka beberita di Entabai, Julau ari taun 1840-an ngagai taun 1860-an.  Ketegal pemerani sereta pengelandik iya nyadi tuai dia Sharif Masahor di Mukah lalu meri iya pangkat Panglima. Panglima Mujah tu anak Melina “Bunga Ringkai” datai ari Skrang.  Niang Apai iya Melina “Bunga Ringkai” endang tuai kayau Iban Skrang ka suah matak kayau ngalahka Melanau di Oya, Mukah enggau di Balangian serambau enggau penatai James Brooke ke Sarawak.

Kira-kira dalam taun 1840 dia iya matak bala pindah ke Saribas lalu diau enda lama di kaki Bukit Sadok, lalu bumai berimba menua ulu Spak.  Lebuh iya diau di Spak dia iya suah nemuai ngagai tuai-tuai Iban Saribas baka sida Igoh apai Lamban di Ulu Layar, Unal “Bulan” di ili Spak enggau Orang Kaya Pemancha Dana “Bayang” di Padeh, ari penemuai tu meh iya belajarka adat beburung enggau chara-chara ngayau.  Udah bulih penemu kena ngayau dia Mujah lalu berunding, nadai guna iya terus diau di menua Saribas laban udah  mayuh tuai kayau diau di Saribas.  Dia iya lalu berunding deka matak bala pindah ngiga menua baru.

Nyau kepuas ka berunding dia Mujanh lalu nemuai ngagai Encharang ka diau di Ulu Anyut, dalam Paku.  Iya diau enggau sida Encharang bisi beberapa ari, nyau kepuas ka dia dia iya lalu nanya Andak, anak dara Encharang ka bini iya.  Encharang setuju enti Mujah deka nguai lalu diau enggau sida di Ulu Anyut, ba endur ka diatu dikumbai Tembawai Tingkah.  Mujah pan jadi enggau Andak lalu diau di ulu Anyut.

Lebuh ka berandau enggau orang di Anyut dia Mujah madahka kabuah iya pindah ari Skrang ke Spak laban deka berimba menua baru, namabahka pemayuh temuda rimba bansa Iban.  Taja pan iya rindu ba pengawa ngayau tanh iya enda setuju enggau chara tuai-tuai Saribas baka sida Igoh apai Lamban enggau Unal “Bulan” ka semina rindu ngemeranka pengawa ngayau tang nadai ati deka ngemesaika menua, tanah temuda, bali rimba bansa Iban ka tau alai bumai kena ngidupka diri.

Dalam randau iya Mujah lalu madahka deka nyadi tuai kayau tauka manuk sabung, tang ka beguna agi ari nua ka iya iya deka ngemai bala Iban pindah ngiga menua baru, ari luar menua Saribas, Skrang enggau Batang Lupar ka udah diuan mayuh Iban.  Nya alai ka iya sida iya patut enggau iya pindah berumpang menua ulu sungai Entabai enggau sepemanjai sungai Kanowit ka besabung enggau menua ulu Layar.  Kenu ka Mujah laban menua nya agi puang, semina udah diuan bansa Baketan ka pindah ari Paku enggau Batang Krian.

Nyadi bala orang Anyut enda ulih diumbuk Mujah, sida iya enggai ninggalka menua lama.  Bala sida bini iya sebilik mega enggai enggau Mujah pindah.  Andak ukai semina enggai enggau pindah tang minta sarak.  Seduai iya lalu sarak, tang laban penyarak nya ukai ari laya, nya alai seduai iya sarak sempekat semina betukar tinchin aja.

Udah sarak enggau Andak anak Encharang di Anyut, Mujah deka bebini baru ngiga indu ka deka enggau iya pindah ke Entabai, sekali tu iya nanya indu orang di ulu Matopdalam Paku mega.  Taja pan Mujah lelaki ka sigat sereta beberita berani, tang nadai siku indu orang Paku ngilika Anyut sanggup jadi enggau Mujah pindah ngagai menua baru, laban maya nya kelia menua Entabai nya dikira jauh ari Saribas.  Mujah enda jera, ka sekali tu iya nanya indu orang Penom ka benama Mapong, dalam Paku mega, tang kesekali tu mega jelungan baru, laban Mapong mega enggai nitihka iya pindah ke menua baru.

Nyau datai ba maya ka pindah dia Mujah lalu nguluka bala iya iyanya Iban ari Saribas, Skrang enggau Lemanak, sida iya bedarat nengah tatai Keladan lalu nuju bukit antara entigis ulu Ngiau enggau Jaloh,  enggau antara Jaloh enggau Penom.  Ari bukit nya sida iya lalu bejalai nuju bukit ka nyerara menua ulu Layar enggau Entabai.  Sida Mujah lalu berumah dia, lebuh sida iya diau dia sekeda bala Iban ari Ulu Layar lalu enggau sida.  Maya tu Igoh apai Lamban tuai serang ari Ulu Layar lalu nyerang bansa Beketan ka diau ba endur nya.  Mujah empu mega siku ari tuai serang maya nya.  Udah dialahka Iban dia bansa Beketan ka diau di ulu Entabai, ulu Julau, ulu Entaih enggau ulu Kanowit lalu rari, mindah diau begelumu ba siti genturung pendiau di ili Kanowit.

Udah ka ngalahka bansa Beketan dia Mujah lalu matak anembiak iya pindah ke ili ka agi.  Sida iya lalu berumah di Nanga Engkaup.  Udah betaun-taun diau di Engkaup dia Mujah enggau bala iya lalu deka pindah ke ili ka agi.  Tang sebedau sida iya pindah Mujah ngasuh sekeda ari anembiiak iya dulu kin matau menua nya, laban maya nya agi siga Beketan.  Sida iya dulu matau menua ka dikumbai Nanga Namangu ka deka alai sida iya berumah.  Maya ka matau menua tu bala Mujah tinduk di perau takutka diserang bansa Beketan.

Udah sida iya tembu berumah di Nanga Namangu nya baru sida iya pulai ke Engkaup ka baru ngambi bala indu anembiak.  Datai sida di Engkaup dia sida meda mayuh bala orang datai baru deka nitihka sida iya pindah ke menua baru.  Lemai nya Mujah lalu ngemai bala anembiak iya baum, maya nya iya mantah chara tuai-tuai Iban Saribas ngayau ngalah ka mayuh endur datai ke Sambas enggau Pontianak di Kalimantan, sida iya semina munuh munsuh enggau ngerampas sekeda barang ka berega tang enda lalu diau dia lalu beempu menua nya.  Buah Raya nangkan bala iya, enda ngasug nunda chara kayau tuai-tuai ari Saribas.  Maya nya mega Mujah lalu ngasuh bala iya ngaga perau pengayau ka besai kena sida iya ngalahka munsuh di menua baru.  Mujah madahka anembiak iya, Enti Kumang ka betemu enggau iya dalam mimpi agi nulung iya, menua Kanowit ulih diempu bansa Iban.

Udah perau pengayau sida iya tembu dia Mujah enggau bala manuk sabung iya lalu nemuai Paku enggau Layar minta besi kena ngaga sangkuh enggau senyata ka bukai.  Kenu ka Mujah, ngena senjata tu sida iya ngalahka munsuh, enti munsuh udah alah menua nya mesti diempu Iban ari Paku, Layar, Skrang enggau Lemanak.  Kenu ka Mujah menua Kanowit tu ulih diempu sida enti sekumbang ka nya iya enda nyerang bansa bukai di luar menua Kanowit.  Api lama iya udah pulai ari Sarubas dia Uyu apai Ikum ari ulu Julau lalu nemuai ngagai iya.  Nyadi Uyu apai Ikum tu endang manuk sabung Mujah, tuai Iban ulu Julau ka tau serang, iya suah nyadi manuk sabung O.K.P Dana “Bayang”, Ajee, enggau O.K.P Nanang.  Uyu nemuai ngagai Mujah laban deka nanyaka kati bala Iban bisi munsuh di menua baru.  Mujah madah bala Beketan Julau udah diau di ulu Sugai, lalu sida iya enda ngachau bala Iban ka baru pindah kia.  Mujah madahka Uyu apai Ikum semina Beketan ka diau di sepemanjai sungai Julau, Binatang , Nyelong enggau Sarikei aja tau dikayau.  Udah nya bala Mujah enggau Uyu lalu besikap ngayau Beketan.

Udah dua malam di rantau jalai dia sida iya lalu datai di Nanga Julau, dia sida iya lalu nyerang ngalahka  munsuh ka enda besedia.  Sida bulih mayuh dengah enggau tangkap. Udanya bala Mujah lalu ngalahka rumah bansa Segalang enggau Rajang dalam Kanowit.  Ka sekali tu  mega bala Mujah “Buah Raja” bulih mayuh dengah enggau tangkap.  Pulai nya Buah Raya lalu ngemai bala iya niri ka gawai Enchabuh Arung.

Udah menua Kanowit, Julau enggau Entabai diempu bansa Iban, Mujah suah matak kayau ngalahka bansa Lugat, Beketan, Rajang seru enggau Melanau tungga ke barat laut nanga Batang Rajang.  Ketegal pemujur Mujah ngalahka bansa bukai nya alai diatu  menua Kanowit, Julau, Sarikei, Sibu engau Bintangor diuan mayuh bansa Iban ari Lemanak, Layar enggau Skrang.  Kelimpah ari ka ngalahka bansa bukai di Kanowit, Mujah mega suah nulung Unggat seduai Gerinang ngalahka munsuh sida bansa Lusum di Ulu Batang Rajang enggau Balleh, awakka menua nya ulih diempu bansa Iban ka pindah kia ari Batang Ai enggau ari Batang Kanyau di Kalimantan.

19 responses

  1. Anthony Lidom | Reply

    Thank you so much for this story on Pengelima Mujah Buah Raya. I would like to kindly request anyone with more information to share for example, did Mujah Buah Raya has any brother or sister? Whom did he marry after divorcing Andak? Who were his children? Where and how did he die?

  2. Penatai Mujah tu terang ditemu tang pemati iya nadai temu tunga.

    1. Aku baru pulai ari ulu skarang…Mujah buah raya dilombong ulu akup, lalu antu pala ke ulih iya mayuh dah ditumbakka bala iya. Nyabor agi disimpan sida datai ke saritu…tebal agi sida ke peturun mujah ba rumah panjai alai aku nemuai nya udah masuk kristen lalu bisi gereja di menoa nya. Bilik Mujah agi bisi din diwarisi endang peturun iya empu udah bekau menoa bebaik Mujah pulai ngagai menoa asal iya, bebini baru lalu mati tuai..dilombong seberai rumah sida ulu skarang ke diatu. Aku mega agi mansik sekeda ari jerita Mujah.

  3. Nitih ke cerita aKi aku Gasing anak Ambu, Penglima Mujah Buah Raya nadai menyadi sama apa enggau sama indai. Ia seko aja laban anak di beri Kumang ari Pangau Libau ngagai Bungai Ringkai lebuh Melina (Bungai Ringkai) di batang Lemanak kelia. Udah datai di Kenawit, Mujah Buah Raya lalu jadi enggau Lemuti petunggal ia empu lalu beranak ke Melaka (Penghulu Melaka) di Entabai. Melaka mega seko aja, tang bisi menyadi angkat anak Marin Beketan benama Sulu di Nanga Merit Belaga Batang Rajang ke dicuri Penglima Mujah. Anak Marin Beketan Sulu to dtembang Penglima Mujah Buah Raya nyadi anak ia empu. Anak Marin Beketan Sulu to di beri nama ‘Ambu’. Udah besai Ambu to jadi enggau Lanjap petunggal ia ari balam Penglima Mujah. Ambu enggau Lanjap bisi anak dua lelaki dua indu. Bala Ambu to pindah ke batang Anap, anak ia ke indu pindah ke Nanga Belai Skrang, lalu aki aku Gasing anak Ambu pindah ke Baram udah nya pindah ke Belait, Brunei Darussalam. Lalu dua agi mengkang di batang Anap. Sampai ke maya ari to bala ia diau di Nanga Jelai, Anap. Lalu peturun Pengulu Melaka bisi mega diau di Lambir, Miri. Nya jerita enggau ngelansa. Arap ke betemu baru ila.Bye!.

    1. Terima kasih ka penerang nuan, tang mayuh bala betanyaka dini enda alai pemati sereta kubur/pendam raja berani Mujah Buah Raya tu. Aku enggai nyadi nempa ka sengapa laban endang enda nemu. uji nuan betanya ngagai sida ka tuai.

      1. bisi nuan nemu dini alai kubur niang Mujah buah Raya?

      2. pengamai iya, Enti nitihka tusut tuai Mujah buah Raya tu meh Tuai rumah kami keterubah ba tembawai emperan Nanga Munus, Entabai semak Ng Engkamop ke diatu (urung taun 1840-1848) Peturun iya agi bisi nguan batang muns pati Sg Entabai. Diatu 2 buah rumah panjai dalam sungai Munus..asal sida endang ari tembawai emperan. Tusun Tr ke diturunka Mujah Buah Raya ba Rh Dana ak Jantai ke diatu,
        RH DANA: Nanga Ijit, Munus Entabai
        1. Muhaj buah Raya
        2. Nerutu
        3. Belulok, rumah bagi dua tang agi dalam sungai ti sama
        4. Sawan
        5. Jantai
        6. Kadar
        7. Dana (currently) antara sida tu bisi 20-30 taun, agi mega nitihka peturun.

        RH MINIS: Siti raban nitihka
        1. Tr Galin
        2. Panyu
        4. Lampun
        5. Saga
        6. Saka
        7. Minis (currently)

  4. Terima kasih Unggal Gira. Aku kala ingat-ingat ngapa agi mit kelia sekeda utai di tusi nuan nya nitih ari aki nuan Gasing. Enti ditasat endar kada enda sama penatai kitai.

  5. Minta sapa kita bisi nemu nama anak Penghulu Melaka bekunsi utai nya

  6. ulih aku nemu sapa peturun melaka ke bisi diau ba lambir miri?

  7. Urang endang enda entu ka madahka dini pemati raja berani dulu kelia enggai munsuh tauak ulun bebalas tauka nengkubang pendam.

    Uji tanya sapa empu antu ia enti empai ditumbakka sida.

    Bisi Mujah “Buah Raya” nulong Libau “Rentap” ba Bukit Sadok?

    Sida ka alah ba Bukit Sadok mayuh ngidupka kediri belalai sampai ka parai.

    Udah dunya baru diatu, engka jerita sida tau ditusoi enggaika lenyau.

    1. Seruri: Uji tanya sapa empu antu pala ia enti empai ditumbakka sida tauka sapa empu pengaroh ia enti bedau dibuai.

      1. Bala Mujah Buah Raya aba Lambir Miri nya turun ari Pengulu Melaka Anak Buah Raya iya nya ari Tupang beranak ke Sadar udah nya Tuai Rumah Kiroh. Udah nya kau enda nemu. Nuan tau nemuai ke Lambir!
        Mujah Buah Raya nadai nolong Rentap. Bala peturun ari eni aku Lamban anak Muli bisi iya nya aki sida iya Tuai Imban ke bensumber Bah Menoa enggau menyadi iya Bulin (Kapal Laut) serta Lagan. Laban sida carut enggau Rentap sida iya pindah ke Meradong. Udah nya Rentap alah di Bukit ASadok.

      2. Ba ni bala ke pindahke Meradong nyak berumah? Aku tu urang Meradong empu.

        Di endor lumbong Mujah ngau sapa empu antu pala ia?

      3. Gira, nama penyarut sida ngau Rentap?

  8. Sapa nemu aki Tuwie ba menoa Gemuan ngau Aki Apau ba menoa Pidi, Binatang?

  9. baka tu penatai buah raya,buah raya tu peturun ari sampar ke jadi enggau burai, sampar menyadi remi, seduai ia aja anak serapuh ke idup laban menyadi seduai udah dibunuh kantu.ba tusut kitai iban nadai siko nemu tusut peturun sampar sampai ke dini endur bilik sampar saritu.aku ka bekunsi enggau bala kitai ke peturun sampar ke bejuluk pengerintai bala nyerang tu ngambi ke kitai sama nemu dini endur bilik tuai kitai, bilik sampar tuai kitai meruan sampai ke saritu ba ulu entabai.nyadi bala kitai maioh ka nemu ari penatai buah raya,penatai buah raya tu segi temu ari tusut sampar lalu pendam buah raya agi meruan sampai ke saritu..aku bisi ga maca dalam blog tu org benama ivy ari seratok nama nusn nya segi ngangkat ke peturun ari buah raya ianya ivy apai banyi.sapa2 kita ka nemu peturun kitai sampar tau ngiga aku.

  10. Mujang Buah Raya diatu udah ada baru..tang ia ngena nama bukai.ia ada ba Betong, berumur dlm 2 taun stgh diatu..t betul intu,meruan nya ila..ulih ngangkat ke Iban..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: