Tuai Iban Dulu: Bagi 4 Kalaka-Saribas (Rimbas & Krian)


Rimbas enggau Kalaka

Batang Rimbas

Nyadi ba senentang rambau tubuh sida anak Demong diau dalam Batang Paku begulai enggau Baketan, kampung dalam di menua Rimbas enggau Krian bendar diwuan bansa Seru. Endur sida tu tebal bendar diau di Bukit Tebujang, Ulu Awik di Nanga Disso dalam Awik enda jauh ari nanga di Bukit Tengalat tebing ai Krian enda berapa jauh ari Nanga Malupa enggau ba Bukit Legung di ulu Malupa pati Krian.

Nitih tusui niang aya Benedict Sandin dalam bup iya Peturun Iban, Bansa Seru tu ganas bendar bejalai di sebelah kampung dalam.

“Sida iya balat amat bemunsuh enggau Iban. Tusah bendar Iban maya nya kelia, laban mayuh sida iya parai kena bunuh Seru lebuh Iban agi berimba ngulu menua Paku enggau Layar,” ku tulis niang Sandin dalam bup nya.

Nyadi sama serambau enggau tubuh sida Demong tu, bisi orang tuai siku penama Jenua angkat pindah ari Langgung Bukit Kenyandang entara Ulu Sadong enggau Ulu Ketungau ngili Sadong ngiga menua baru. Ari Sadong iya merau meraka tasik lalu tama ngagai Layar berumah di Pusa Kampung Engkerebang. Nyau kelama iya udah diau di Pusa, iya pan parai tuai umur.

Udah parai Jenua, iya lalu diganti Padang nyadi tuai megai nembiak. Ari Pusa, Padang nguluka nembiak iya mudik Rimbas lalu berumah di Skaup. Ari Skaup iya pindah baru masuk Sungai Undai lalu berumah panjai di Beluok.

Lebuh uya berumah dalam Sungai Undai, sekali lebuh sida nubai, Padang parai ditabanka ikan tapah ngili Rimbas rembus ke Batang Layar.

Dalam Batang Layar, bangkai iya dibai tapah kulu naka Lubuk Sedebu lalu kili naka pipi Tanjung Lilin ngalih ari ili.

Nya alai laban naka nya bangkai iya ditabanka ikan ngili enggau ngulu Layar, naka nya ga rampa menua agi pegai Rimbas dataika kemaya haritu masuk Batang Layar.

Udah parai Padang, anak iya penama Gunggu nganti iya nyadi tuai. Ari Letong Beluok, Gunggu mai nembiak iya mansutka diri baru ke Batang Rimbas lalu mudik kulu berumah di Nanga Jerai. Ba maya nya kelia ari Nanga Debak kulu agi, diwuan bansa Seru. Tang sereta Iba datai di menua nya sida lalu diau ngulai bansa Iban.

Angkat ari Nanga Jerai, Gunggu mai nembiak iya berumah di Tanjung Bakung beseberai enggau bansa Seru. Nyadi laban sida sama besemak diau bakanya sida lalu bepangan bendar. Seru nelap lalu suah bendar meri sida tambak enggau buah pisang, tebu enggau ubi ka empa.

Nyadi Gunggu parai lebuh iya berumah dia, alai iya lalu ditumbak ba pendam Seru di Pendam Batu ari ili nengeri Debak kemaya haritu.

Udah nadai agi Gunggu, lalu diganti anak iya Garrai nyadi tuai mega Iban Batang Rimbas. Angkat Garrai enggau nembiak iya ari Tanjung Bakong, sida berumah di seberai Nanga Tawai. Nyadi endur rumah Seru lebuh tu masuk dalam Sungai Tawai.

Nyadi sama serambau enggau Gunggu dalam Batang Rimbas bisi siku tuai penama Manggi mindah ari Tisak ngili Sungai Samudam, lalu ngulu Batang Layar.

Dulu ari tu Manggi sigi udah mungkal lalu diau nguluka Batang Tisak pati kiba Batang Skrang. Iya angkat ari menua nya, udah iya belaya ngelaban Gelanyang Manang Jelapi ke parai dibunuh nembiak iya Batu Jelapi di Stirau, enda jauh uga ari ulu Nanga Lingga ba kaki Bukit Balau tebing kanan mudik Batang Lupar.

Lebuh iya mudik Batang Layar, Manggi dulu ngetu enda lama di Sungai Sapinang. Angkat iya ari nya, iya lalu berumah ba ujung Tanjung Orang Tuai ke dikumbai Tanjung Pendam tauka Tanjung Rangka ngalih ari ulu ba endur ke dikumbai Supa.

Lebuh ke benung nirika rumah dia, iya ninga Batang Rimbas bisi orang udah nguan. Irau atika nya, alai iya lalu ngabas kin, bedarat neresap kampung iya rembus di Nanga Debak.

Apin lama udah iya datai dia, Manggi kena pedis perut lalu parai. Bangkai iya ditumbak ba pendam Batu ari ili nengeri Debak ke diatu. Nyadi laban iya ditumbakka dia, nya kebuah datai ka kemaya haritu bisi orang ngumbai pendam nya dipungkal Manggi enggau bisi ga ngumbai dipungkal Gunggu.

Nyadi laban pemati Manggi tu, rumah ke digaga iya di Supa tadi lalu enda tembu. Nya alai laban enda tembu, iya dikumbai datai ka seharitu Tembawai Buruk Rumah. Kebuah pia, laban rumah nya kelia, tegal ke enda tembu, sampaika semua ramu iya nyau buruk, lalu enda diwuan mensia.

Apin bangat lama udah sida Garrai berumah di Nanga Tawai alai Seru angkat ari dalam Sungai Tawai pindah ke Ulu Babu, nya ngasuh sida nyau beserara amat enggau bansa Iban.

Nyadi ari Nanga Tawai dia Garrai enggau nembiak iya pindah ke Nanga Likap ke endur iya parai tuai. Nyadi bansa Seru tadi angkat ari Ulu Babu lalu nyeliah diau ke Ulu Assam pati Malupa ke bepati ba Batang Krian.

Lebuh sida ke berumah di Ulu Assam nya baru Seru enggau Iban berengkah ngayau pangan. Lama bendar sida bemunsuh ngelaban pangan nyentuk ngagai tubuh sida Rekaya Antau ‘Linggang Nengeri’ seduai menyadi iya Gun €˜Mangku Bumi€™ ti nyadi tuai megai Batang Rimbas kejang ngagai datai James Brooke di Sarawak dalam taun 1839.

Nyadi Antau seduai menyadi iya Gun di Rimbas sama tau matak kayau anak – tampun ulih niang Gun agi mengkang gegitang ba ruai asal sida ichit iya Datuk Amar Dunstan Endawi Enchana di Munggu Embawang, Malupa – lalu suah ngalahka bansa Seru di Bukit Tengalat ba Krian tengah, Bukit Legong di Ulu Malupa enggau di sebelah Nanga Awik, ari ulu Pasar Saratok ke diatu. Laban seduai ngalahka Seru, nya kebuah seduai lalu sama digelar Imam Molana tuai bansa Laut megai perintah di Kabong jadi Rekaya.

Udah alah bansa Seru ba endur tiga bengkah nya, sida lalu rari ke Nanga Disso masuk Awik mimit enda jauh ari Nanga enggau sekeda ke Bukit Tabujang di Ulu Awik. Nyadi raban sida iya sebengkah lalu rari jauh ke Tanjong Pilin dalam Sabelak ari nanga Roban.

Lebuh Iban baru datai di menua nya pindah ari Paku kelia, udu bendar sida Enchana ke bensumbar Letan enggau Luna ke bensumbar Panggau belaban enggau bala Seru tu. Semadi nyau kelama udah besurungka palit mata baru sida deka bebaik.

Nyadi di Batang Rimbas tadi udah Garrai parai, iya lalu diganti anak iya Jana nyadi tuai. Endur rumah Jana tu di tembawai Sandong dalam Babu. Angkat Jana ari nya, baru iya, baru iya berumah di Tembawai Manding dalam Metong, Rimbas tebing kanan mudik. Angkat ari nya baru iya berumah di Nanga Gayau, alai iya parai tuai.

Udah nadai agi Jana, ruai tikai iya lalu ditampung anak iya Utong seduai Munan. Nyadi Munan tau matak kayau anak. Iya berumah di tembawai Seragau. Angkat iya ari nya berumah di Nanga Luop, ari nya angkat baru lalu berumah di Nanga Tuang ari ili Nanga Bayur.

Ari Nanga Tuang seduai nyurutka diri baru lalu diau nguluka Babu. Ari Babu nya baru Utong seduai Munan pindah ke Malupa ke alai seduai diau nyentukka parai tuai. Semua menua alai Munan matak kayau anak ari Nanga Kalaka terus ke Nanga Oya ngelaban bansa Melanau.

Nyadi menua kena kayau Antau Linggang Nengeri nya kampung Jegedong di Nanga Skrang enggau ngalahka Kali ari ulu pasar Kabong dalam Kalaka nambahka ngelaban Seru munyi ke udah disebut tadi. Antau mega nyaup Linggir Mali Lebu ngalahka Ilas semak Nanga Rajang enggau ngalahka Matu, lalu sekali bisi belanggar enggau Balau di Samudam.

Nyadi adi iya Gun Mangku Bumi ke nganti iya nyadi tuai pan kala ga matak kayau anak. Iya diupah Molana di Kabong enggau pedang sebilah laban iya nalukka Melanau di Matu ti ngelaban perintah Brunei.

Nyadi Temenggong Kadir sekali ga ngupah iya enggau bedil sebatang laban iya tebaikka pengachau Balau di Lingga ti ngelaban perintah Brunei.

Lebuh Unal bensumbar Bulan ari Ulu Layar belanggar enggau Ijau Lang ari Banting di Palasan semak Nanga Saribas, Gun Mangku Bumi sama enggau.

Nyadi bala sida Seru nadai tentu bebatang penunga agi lalu tau dikumbai punas laban mengkang ngerarika diri ngejang ari bala Iban.

Taja pan nadai tentu berupai bisi batang laya sereta nadai nyadi penyarut besai, sida munyi ke semampai nangika bala Iban. Sida mula bebaik udah besuaka palit mata munyi ke udah disebut tadi.

Nyau kelama sida mayuh betampil enggau Iban sereta bisi enggau bala Laut.

Bala ke betampil enggau Iban lalu terus ngemeranka adat asal bansa Iban. Sida ke nampil Laut lalu masuk Islam sereta terus idup nitihka jalai Laut enggau pengarap Islam.

26. Rimbas, Saribas

1. Tuai Linggih ‘Gila’ (uchu O.K. Antau Linggang Nengeri)

/

2. Penghulu Gerijih anak Mancha (anak menyadi Linggih)

/

3. Penghulu Tindin anak Sa (petunggal Gerijih)

/

4. Penghulu Sujang anak Munang (anak menyadi Tindin)(dibuai ari pengawa)

/

5. Penghulu Mon anak Tindin

/

6. Penghulu Sujang dipilih kedua kali)

/

7. Penghulu Dampa (ipar Sujang)

/

8. Penghulu Limbeng anak Luat (ipar Dampa)

/

9. Penghulu Henry Ganja anak Jimbau.——Ada di Ulu Bayor dalam taun 1929.  Tiris pantis ari OK Antau Linggang Nengeri.  Tuai Rumah Ulu Bayor, sebedau nyadi penghulu nganti Penghulu Limbeng.  Pelajar iya naka Standard 2 di Sekula St. Christhoper, Debak.  Dalam pengidup iya, udah datai di Malaya enggau Singapore.

 

27. Rimbas Ili

1. Penghulu Langi anak Jilap. ——-Ada di Nanga Jerai, Rimbas dalam taun 1921. Iya uchu Serjin Balang ka gawa nyadi mata-mata enggau North Borneo Constabularly. Serjin Balang tu antara tuai Iban ka nulung perintah Sabah ngalakha Mat Salleh. Penghulu Langi diau di Munggu Saboneh semak Debak, iya nemu nulis enggau macha sereta kala bejalai ke Malaya enggau Singapura.

Penerang:

Ba pun penatai James Brooke, Batang Rimbas kena pegai Tuai Linggir Mali Lebu ari Paku sepengudah pemati O.K. Antau enggau menyadi iya O.K. Gun sereta bala anak lelaki seduai iya di Nanga Undai udah ka alah serang laban O.K. Janting menatu Ijau Lang ari Banting, Lingga.

Linggih uchu O.K. Antau tu keterubah tuai Iban ka dipaduka perintah megai Ai Rimbas. Udah Linggih dikemaduka, Gerijih ari Nanga Luop dichiri nyadi penghulu keterubah dalam Batang Rimbas. Iya dikemaduka laban ditangkap makai suap lalu diganti petunggal iya Tindin. Mati Tindin, iya lalu diganti anak menyadi iya Penghulu Sujang. Sujang dikemaduka laban ka enda setuju enggau perintah, iya lalu diganti petunggal iya Penghulu Mon anak Tindin. Tang Penghulu Mon laban ka enda tentu ka nyadi penghulu lalu minta badu nyadi penghulu enda lama udahka dichiri perintah.

Badu Penghulu Mon, ari pilih semua Tuai Rumah sekayu Ai Rimbas alai Sujang dipilih baru nyadi Penghulu Rimbas. Dalam taun 1963 apin lama udah Ganja dichiri nyadi penghulu alai Penghulu Limbeng pan badu ga maya nya.  Nya alai udah tu Ai Rimbas lalu dibagi dua. Ulu Rimbas pegai Penghulu Ganja peturun ari O.K. Antau seduai OK Gun lalu Rimbas Ili pegai Penghulu Langi uchu Serjin Balang ka gawa di Sabah ( North Borneo Constabularly).

 

28. Ulu Krian, Kalaka.

Kalaka

Kalaka tu nama lama pelilih menua Saratok. Nama Majlis Daerah Kalaka ditukar nyadi Majlis Daerah Saratok dalam taun 1984.  Nyadi Ai Krian tu benanga di Kabong, lalu disebut Nanga Kalaka, ukai Nanga Krian.  Nanga Kalaka bisi kena pansa jerita sebedau bala Linggir besatup enggau bala Raja di Beting Maru dalam taun 1949. Bulan tujuh dalam taun 1849, Linggir Mali Lebu ari Paku nurun nguluka Iban Saribas-Skrang  ngayau ngalahka Paloh, Igan, Matu enggau Sarikei. Sarikei enda alah laban orang udah besedia. Pemulai nya sida deka ngalahka Duri di Nanga Sadung, ke udah kena kayau sida dulu suba.

Berita sida ke ngayau tu jampat bendar kena dinga James Brooke di Sarawak (Kuching). Tuan Raja seduai Admiral Keppel lalu ngumpul bala deka nempuh bala Linggir di tasik. Orang enggau iya Laut Sarawak enggau Balau ari Lingga, sereta mega Iban Sebuyau ari Lundu.

Udah alah Paluh enggau Igan, bala Linggir deka ngerumban ngalahka Sarikei. Datai sida orang udah ngadang udah orang ke ninga berita dibai orang ke rari ari Igan.

Sida pan lalu mulaika diri. Kira tengah  malam ari siti, lebuh sida baru deka meraka Nanga Kalaka mansang ke Sadung endur sida lalu dibedil skunyir perintah. Sida ngelaban bekayuh deka ngelanggar sekunyir nya. Datai sida semak iya. sekunyir lalu ngansakka sida ngena injin ke dikumhai orang ke tuai menya injin tau belanda.

Balat bendar bala Raja begagai ka sida malam nya. Mayuh bendar perau sida karam enggau tasah sebelah tasik. Nyadi ipar Linggir ke benama Chabu enggau orang karam perau. Iya lalu nepan ba pelepah apung balu ke mai iya ka tebing ka baru dibai pasang. Meda iya dia kapai perintah lalu nangkap iya. Lebuh orang nangkap iya, iya lalu numpu Laut siku kena dada lau parai. Bala Raja mayuh bendar minta mubuh iya tang Tuan Raja empu enda ngasuh. Nya alai iya didup ka perintah.

1. Penghulu Begarak @ Chulo ‘Tarang’anak Unggam

/

2. Penghulu Dunggat (Ai Budu)

/

3. Penghulu Nuga (1)

/

4. Penghulu Nuga (2)

/

5. Penghulu Undom anak Ratih (Nanga Grenjang)

/

6. Penghulu Entigu anak Kumpang (Nanga Grenjang)

/

7. Penghulu Bakit (ari Nanga Batang)

/

8. Penghulu Kadam anak Manai (Nanga Maras)

• Kabo (pati Krian)

1. Penghulu Lijang (serambau enggau Entigu)

 

Penerang:

Asal Chulo Tarang tau nama ka bendar Begarak tu ari Paku, Saribas. Iya bebini nguai ke Nanga Ulai, Rimbas. Tarang enggau entua iya Ramping Gumbang mecah Nanga Maro matak bala pindah ari Rimbas laban bisi penyarut enggau bala petunggal iya OK Antau di Rimbas. Di Ulu Krian sida Tarang lalu berumah di Kumpai kira-kira dalam taun 1856. Tarang tu beberita berani, ari nya iya lalu dichiri Raja Charles Brooke nyadi Penghulu keterubah di menua Ulu Krian. Kelimpah ari nya, di Kumpai Chulo Tarang mega nyadi saudagar, kaya raja, bulih padi, bulih duit, bulih ringgit. Ari nya mayuh orang datai ngemai pemisi diri baka tajau enggau pua kumbu meli padi ari iya.

Tarang mega antara keterubah tuai Iban Saribas enggau Krian megai pengarap Kristian. Udah Chulo mati dalam 1887 iya lalu diganti anak iya Ngadan. Chulo Tarang ditumbakka ba Pendam Kristian, Lubuk Temual di Kumpai, Ulu Krian, Saratok. Kubur iya disemin rata lalu bisi tanda regang ka besai empakap ba lantai semin nya.

Tajapan Ngadan dipaduka nyadi, iya lalu pegi ke Sabah (British North Borneo), nya alai menyadi iya Unggit dichiri jadi Penghulu Ulu Krian. Unggit mati laban penyakit miang buah dalam taun 1889. Udah mati Unggit, Ngadan mega agi di Sabah, nya alai Penghulu Minggat apai Runai ka megai Awik enggau Krian Ili lalu diberi kuasa sementara megai Ulu Krian.

Pulai ari Sabah Ngadan lalu nyambung pengawa iya nyadi penghulu Ulu Krian. Tang laban bisi iya bisi ngaga penyalah, nya alai Penghulu Ulu Krian lalu diberi ngagai Tuai Rumah Dunggat ari Ai Budu.

Dunggat diganti Penghulu Nuga 1. Mati Nuga iya lalu diganti Penghulu Nuga 2(sama nama Nuga). Mati Nuga lalu diganti Penghulu Undom uchu Penghulu tarang. Mati Penghulu Undom lalu diganti menantu iya Penghulu Entigu anak Kumpang ari Nanga Grenjang di Ulu Krian. Penghulu Lijang tu penghulu di Kabo, sebedau tu Kabo sama kena pegai penghulu Ulu Krian.

 

29. Krian Ili enggau Awik, Kalaka.

1. Penghulu Minggat apai Runai

/

2. Penghulu Ampan

/

3. Pengarah Nyalu

/

4. Penghulu Dampa

 

• Krian Ili

1. Penghulu Goyang

/

2. Penghulu Kandau

 

• Sebetan

1. Penghulu Naga – Ada di Kerupok dalam taun 1932. Dichiri nyadi penghulu dalam taun 1965. Peturun ari Bir. Bir tu pemungkal Batang Sebetan

Penerang:

Asal Penghulu Minggat tu endang ari Kerangan Pinggai di Paku, Saribas. Minggat jadi enggau Jara lalu nguai ke Suri, Debak, Rimbas. Ari Suri, Rimbas tu pengangkat Minggat pindah ke Awik kira-kira dalam taun 1854. Pemindah Minggat lalu ditihka menyadi iya Enchana Letan Pepulas Mas. Sungai Awik tu muak ari kiba mudik Batang Krian.

Minggat berani lalu nyadi Tuai Serang menua Kalaka. Ari tu iya lalu dichiri nyadi Penghulu keterubah di Krian Ili, megai Sebetan enggau Awik. Udah Minggat mati di Sumatra dalam taun 1891 iya lalu diganti Ampan. Ampan tu tanah menantu Minggat ari iya ka jadi enggua anak menyadi Minggat di Durin semak Sibu. Lebuh sida Munan datai di Awik ari Sumatera dalam taun 1891, Ampan endang udah dichiri perintah nyadi penghulu nganti Penghulu Minggat. Nyadi Ampan tu keras bendar deka berimba pulau kampung ka digalau sida Minggat di menua Awik, kenyau ari sida iya pindah kia ari Paku menya. Munan enggau bala menyadi iya, sereta bala anembiak apai iya Minggat nagang Ampan berimba kampung galau nya , enggai ka nadai alai ngiga rutan, ngiga danan, ngiga kayu ka perau ka guna anak telesak, uchu ambu ka dudi ari ila. Tang Ampan enda ulih tagang iya. Meda iya enda alah tagang dia Munan lalu nemuai ngagai Penghulu Garran di Paku enggau OKP Nanang di Padeh deka nanyaka pasal adat tuai ka ngalau pulau.

Lebuh Munan nemuai ke paku enggau Padeh, Penghulu Ampan betemu enggau Residen Bagi Kedua, Bailey di Simanggang, iya ka maya nya bisi di Kabong. Ampan madahka nemuai ke Paku enggau Padeh laban deka minta bantu OKP Nanang seduai Garan ngelaban perintah. Ninga nya Residen Bailey pedis amat ati.

Laban petenah tu Residen bailey lalu manggil Munan betemu enggau iya di kubu Kabong laban iya deka ngusay hal nya enggau Munan. Munan undur ke Kabong ngena perau panjai dikemuduka Jungan Apai Chaong ari Sebelanak Meda perau Munan datai dia Tuan Bailey lalu deka nimbak iya ngena dua iti pistol, siti-siti ba jari iya sepiak-sepianak Meda pengachau nyau deka nyadi dia Pengiran Matali, kunsil ari Simanggang ka nyempulang penatai Tuan Bailey ke Kabong lalu madah, nadai kebuah belaya. Enti belaya ko iya, Tuan Residen seduai Munan sama mati. Manah agi aku ngemai Munan ke Sarawak, nanyaka penemu Tuan Raja, baka ni iya ngaduka hal Munan.

Lama amat penyarut Munan-Bailey tu ngungut baka api dalam seku. Nyau badu sepengudah Penghulu Ampan dibuai ketgalka enda manah ulah . Penghulu Ampan diganti Penghulu Nyalu, ka udah nya dibuai, tang dichirika baru lalu ditikika pangkat nyadi Pengarah ba pun taun 1930an. Mati Nyalu, lalu diganti Penghulu Dampa, ka mega peturun ari Penghulu Minggat.

Penghulu Guyang dichiri dalam taun 1947, iya megai Krian Ili ka ngelama tu dipegai penghulu ari Awik. Guyang tu petutun ari O.K. Temenggong Tandok ka diau di Melupa lalu megai Iban Kalaka sebedau Awik enggau Ulu Krian diwan Iban ari Saribas Ibans dalam taun 1830an.

Penghulu Naga dipilih nyadi penghulu keterubah di Sebetan dalam taun 1965. Sebedau tu, Sebetan mega kena pegai penghulu ari Awik.

 

30   Sabelak, Kalaka (Megai Iban ka datai pindah ari Saribas)

1. Tuai Tengkuang anak Gurang

/

2. Penghulu Sempurai

/

3. Penghulu Antau anak Minggat

/

4. Penghulu Jaiya

/

5. Penghulu Jungan anak Manggang.

/

6. Penghulu Bundak anak Mudit

/

7. Penghulu Chaong anak Jungan

/

8. Pengulu Entri anak Chaong

/

9. Penghulu Kawi anak Chaong

/

10. Penghulu Brinau anak Sumping.

 

• Penghulu ka megai bala Iban ka datai pindah ari Skrang enggau Lemanak

4. Penghulu Ugas

/

5. Penghulu Ringkai

/

6. Penghulu Sumping

/

7. Penghulu Engkamat

 

 

31 Sbelak Ili, Kalaka.

1. Penghulu Manggoh (1963-1968).

32 Nyabor, Roban

1. Penghulu Suli (keterubah).

Penerang:

Mudit apai Penghulu Bundak menyadi bujang berani Batang Sblak Unggang Luna Panggau seduai Manggang. Seduai tu beberita berani ngalahka bansa Seru ka udah dulu nguan Batang Sblak apin ka diwan Iban Saribas, Skrang and Lemanak. Iban Lemanak mayuh pindah kitu kelia laban suah tebunsa laban selalu kena pansa Iban Ulu Ai enggau Iban Skrang ka bebalas kayau. Laban Lemanak tu antara menua Ulu Ai enggau Skrang, nya alai suah amat sida iya tasah laban penyarut tu kelia. Di Batang Sblak Iban Saribas berimba menua sepemanjai tebing kanan, lalu sepemanjai tebing kiba diperimba Iban Skrang, lalu Iban Lemanak nguan Batang Roban. Nya alai Batang Sblak suah dipegai dua iku penghulu baka ka disebut di atas.

 

7 responses

  1. ujang ng grenjang | Reply

    asal aku ari rh endawie nanga grenjang ulu krian…aku deka nentu ke pengamat nama chulo ke bejuluk tarang mandang langit tarang mandang lingga tu…amat tau ke enda nama ya tu begarak baka ke di atas dia???
    kebuah pia laban kami sebilik bisi nyimpan sebilah ilang@duku@malat lama…utai tu kenu ku sida ke tuai duku bunga nuing tang disilih enggau niang begarak…nyangka begarak ke enggau bunga nuing besilih duku tu tadi chulo tauka tarang nya kini…nyadi duku tu agi meruan disimpan tang nyau betegar lbn nda diintu sida ke tuai…
    nya alai aku minta penerang @ explanation ari nn aya penulis…
    tau reply ngagai email aku nya…junk_iban@yahoo.com
    terima kasih

  2. ujang ng grenjang | Reply

    manah amat cerita nya aya…udah ga aku kala nanya sida apai, tang sida pan enda nemu ga penatai utai nya…kala ga aku nanya ba niang ansi @ lutung ari rh jaga suba, tang ya pan enda meh nemu sapa ga begarak ke enggau bunga nuing besilih nyabur nya…nyabur nya bisi 3 bilah tang enda nemu ni bagi nyabur bunga nuing…laban ke balat udah betegar…enti orang bisi sakit kayap, kala ga nginjau nyabur nya…kur semengat ga…gerai ke udah…nya alai enti nn aya bisi nemu cerita ke nyengala agi pasal utai tu tau madah ngagai aku…
    terima kasih

    1. Aku pulai ari nya nyanya ba orang tuai Ng Telik. Begarak nya enda sama enggau Chulo Tarang tang nama iya ke bendar Langan, beensumbar Begarak tampak rita terang mandang menua, lalu orang ka nampung bilik Langan iyanya sida Empading

  3. Ngagai pengarang, aku Allen Charlie ari simanggang tang, enggau bala ari saratok ke peturun Pengarah Nyalu. Aku bisi udah compile jerita pasal tusun penatai tusut sereta jerita pengidup Pengarah Nyalu ti ngada ke Usun ti ngada ke Jungan seduai Ipan, apai entua aku ke indu. Aku ditusui ke pengajar Ipan (aki aku) tibisi udah ngerekod ke utai tu maya inik icit Usun agi idup kelia. Maya ke beresa ngiga pasal utai ke enda ingat ditanya aku maya ke nemuai ke awik, aku lalu sangkai ba ruai nuan tu. Nyadi tanya aku siti Tuan, nama tangkup pangkat Pengarah maya jeman sida Vyner Brooke suba? Diperagam aku pengarah enti pulai ke diatu baka pemanca, enti enda temenggong, enti salah, minta nuan metul ia ia meh. Terima kasih.

    1. Kenu ka niang Benedict Sandin: Penghulu Ringkai was the first Pengarah (Literally Director). He was appointed Pengarah for the whole of 2nd Division in 1886. ……retinya baka pengarah ….Pengarah dichiri perintah ari rekomen Residen lalu mesti kala nyadi Penghulu sebedau nya.

  4. giring ejelang | Reply

    Rindu serta gaga amat ati aku macha cerita pengarang blog tu. Aku Giring ari debak. Siku ari uchu Penghulu Langie ak Jilap. Terima kasih ngagai pengarang blog tu laban sudi bekungsi cerita pasal iban kitai kelia

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: