Mimpi Uyut anak Klanang

MIMPI UYUT ANAK KALANANG (APAI LINGGIR MALI LEBU)

Diaduka baru ari tulis asal oleh niang Benedict Sandin Attat

Nyadi Uyut tu tuai dalam Batang Paku, Saribas ke tau kayau, sama sarebak enggau Orang Kaya Pemancha Dana Bayang dalam Padeh. Lebuh Rajah James Brooke datai di Sarawak, Uyut endang udah tuai bendar, enda dapat agi matak bala iya ngayau. Lebuh Rajah James Brooke terubah ngalah ka Paku dalam taun 1843 iya endang belaban enggau bala anak Uyut ke benama Linggir ke bensumbar Mali Lebu. Nyadi sakali Uyut bisi mimpi, lalu mimpi iya baka tu:

Nyadi Uyut asai ke merau nurutka pasang menuh ngulu Paku. Datai iya ba wung Batu Anchau, dia iya ninga orang richah amat tunga ke tebing kiba mudik. Malik asai iya, meda orang siku apai tuai orang baru udah tembu mandi bediri di tebing melitka sirat ngasuh iya niki.

Uyut nanyaka nama kabuah orang richah datas. Orang nya madah ka orang ke richah nya benung bedua pangaruh di tanju, nyau ujung pangawa Gawai Burung. Ninga nya iya lalu sangkai, tanchang ka iya perau lalu niki, asai sepi iya.

Apin berasai pangelama iya udah bejalai, alai iya datai ba rumah orang panjai bendar. Niki iya karumah, peda iya nadai tentu orang duduk di ruai. Sika dua ka kena pansa iya bela nuduk ka iya, tang iya enggai, enggai enda lalu ka tanju.

Datai iya di tanju, peda iya apai tuai orang buban bulu pala tembu duduk semak chapan ka endur pangaruh. “Lalu Uyut, duduk semak kitu,” ka apai tuai nya ngelalu ka iya. lya lalu duduk, apai tuai lalu bejaku, ka iya, “Naka meli nuan Uyut, samoa pangaruh ka manah agi, udah abis pilih orang ka dulu.” Iya lalu ngasuh Uyut milih. Jengkau Uyut puchung siti nyau rimpak moa. “Akai-indai, manah endar pangaruh ambi Uyut, pangaruh mali rampung ngasuh betampung tau serang,” ka apai tuai. Sereta apai tuai abis jaku, Uyut lalu tedani, puchung nya tadi agi mengkang dalam genggam iya.

Ditusui T. R. Libau anak Pangulu Garran dalam taun 1952.