Lama udah ninggalka pengkalan. Betemu baru


Pendapat Kolumnis : Terima kasih Utusan Sarawak

Ditemu dunya ari pengelandik bejaku

Posted By: Valentine Tawie Salok

Date Posted: Saturday 24-Oct-2015

Kitai bansa Iban ditemu sereta dikelala dunya ari pemanah tusun jaku. Pengelandik kitai ngaga sereta ngena leka jaku sigi lumur satu. Nya meh kebuah bala kitai Iban sigi selalu dipuji orang serata dunya tegal pengaya main asal, kelebih agi pengelandik orang tuai ke dulu ngena sereta ngaga leka jaku ke setimbal dalam main kena betundi tauka dikena dalam pengawa begawai enggau pengawa rama sereta pengerami baka melah pinang sereta pengerami bukai ba rumah panjai. Lebuh penulis betemu enggau Prof. Derek Freeman (diatu niang) ari Australian National University dalam taun 1975 ba rumah pengajar universiti aku Prof. Dr Clifford Sather di Pulau Pinang suba, Freeman keran bendar madah kitai Iban “master of language”.

Sather pan setuju bendar enggau iya. Sama bisi enggau kami begulu maya nya niang aya (Dr.) Benedict Sandin ke maya nya nyadi Senior Fellow ba Centre of Policy Research di Universiti Sains Malaysia, Pulau Pinang. Reti nya kitai pandai ngena jaku, ba jalai jaku, ngaga jaku, ngemanahka jaku, landik milih sereta ngeripih leka jaku sereta mega ngembuan mayuh bengkah main ke ngena tusun jaku setimbal munyi, baka ke dikena dalam poems enggau prose dalam jaku Inglis. Kitai ngembuan mayuh main asal benyawa ke ngena tusun jaku ke setimbal sama semunyi dalam mayuh bengkah pengap, renung, timang jalung, timang kenyalang sereta timang bukai, sugi, sanggai, pantun, dungai, jawang, ramban, sabak enggau sekeda main asal bukai. Main asal bukai ke enda ngena nyawa nya baka sampi, biau, ai ansah, entelah enggau utai bukai. Ngambika banding dalam leka sabak, lemambang sabak chukup pandai ngelulu penurun semengat orang ke mati ari rumah panjai alai iya mati nyentukka datai di Batang Mandai, iya nya menua Sebayan tauka menua ke diwan semengat orang ke udah parai ba dunya tu. Nyadi sabak tu dikena ngintu pemati, tauka lebuh nyenggai orang ke parai. Bebanding e nggau leka sabak, leka timang jalung ke dikena lemambang nimang dalam pengawa Gawai Antu deka ngelulu semengat orang ke udah parai sulai nya nikal mulai ka diri ngagai menua lama. Reti nya leka dua bengkah main asal Iban nya deka betimbal tuju enggau pejalai, sama nyebut tentang menua ti sama dipansa semengat orang ke nurun mansang ke Sebayan enggau nikal pulai baru ke menua lebuh ngabas rumah lama iya lebuh ke diperantu ngena Gawai Antu. Lebuh siku mensia nya parai, iya lalu disenggai.

Ditu meh lemambang tauka tukang sabak nya lalu nyabak semalam-malam nya. Sabak tu ngeluluka diri nganjung semengat orang ke udah parai ngagai menua Sebayan di Batang Mandai. Nyau datai ba tengan genteran sabak lemambang deka nyebut:

Nyau manggai meh bala raja sida Niram, Raja Sebayan di pendai renjan,

Orang ke datai ari Limban dalam begenenang…

Udah nya tampung iya baru munyi tu:

Lesi meh aku tu bebadi laya tetumpat, pia ku jaku Aki Bujang Sigat.

Nama aku tu nyau melakang ka gentilang remang rarat,

Nyau berindik di madang rumput gamat,

Baka kempat guntin bujang.

Udah nya bala sida lalu mansa jalai Manang Nyara Ke belian ka bedega nyarang takang. Sebayan pan lalu datai ba jalai rurus ke menua Batang Mandai Mati. Lepas ari tu sida lalu mansa menua Bunsu Dundun Berani Ke tau betenun ninting hari ninting pagi, orang betenun enda berenti semadi putus tali lumbai pemuntang. Limpas ari nya sida lalu mansa menua Bunsu Semalau Mukau, udah nya menua Bunsu Burung Tiup Api. Sida pan lalu mansa menua Bunsu Bubut Dara ke ngemata ka nanga jalai midang. Nya alai ku kelulu lemambang sabak: Oh anang meh nuan enggau orang midang laya sulai deh aki bujang besai, pia ku jaku Bunsu Bubut Tuai. Aku deka merindang nuan enggau pelulin tinchin mas urai…. nyangka ukur semengat nuan agi ulih tangkap Rechap manang tuai. Sida pan manggai ba Titi Rawan ke dipangkang endu dara tuyu, ke bejaku tau bejeratan, dipangkang Kumang tukang nyabak nyedan, nya ga Bunsu Bubut Buban orang ke ngibun Titi Rawan. Sida pan manggai ba Pengkalan Ai Mandai ke diwan Indai Bilai Tusu Lanjut Panjai Lempai ka belakang. Ba senentang tu, sebut nama menua lemambang sabak enggau timang jalung sama sebaka. Nyadi lebuh orang niri Gawai Antu, semengat orang ke udah parai nya dikeluluka lemambang ke nimang jalung pulai angkat ari Sebayan ngabas menua lama iya.

Nya alai menua ke dipansa semengat orang nya angkat ari Batang Mandai pulai ngagai menua lama iya, nitihka kelulu lemambang timang jalung nya sebaka enggau menua ke dipansa iya mansang dulu lebuh baru parai. Siti ari menua pansa semangat ari Sebayan kelulu lemambang timang jalung munyi tu: Manggai di tatai alai meranyi bujang besai ke bejalai nyingkang nyurut, Manggai di tinting endur meranyi bujang kering ke nebah kesuling lagu besaut, Nya ga menua Aji ke berani tau tenung, Raja Suka Remaung, iya ke landik negung, oh ku aku di lubang mua ooo mua lubang…. Udah nya mayuh bendar menua ditengah sida sebedau datai ba ba tembawai, lalu udah nya datai ba pendai orang ke begawai.

Lepas nya baru bala Sebayan niki kerumah. Nyadi lebuh tu bala lemambang lalu nyebut leka timang kena mansutka indu ari bilik. Sida agi majak nimang nyentukka sida nuntungka jalung ngagai orang ke ngirup jalung dini hari malam Gawai Antu nya. Sekeda ari tuntung jalung ba genteran nanya ensumbar nya munyi tu: “Lama kitai ke besaruk duduk bebanding. Ku lama udah ninga gela nuan unggal dedarah sawa indu tedung, ba arung jalai pemuntang. Oh sapa perinyai ambai sulu sangkung lebuh jawing agi gegayang gamal gegandung, alai tangan tunjuk ujung nuan tau diinjau orang nyuluk ka upung nyiur nyintung tak lepung- lepung mesai tempulung lang tansang, oh ku aku tansang lang.” Bisi ga munyi tu: “Oh…lama lemai kitai ke besaruk duduk berintai, lama udah aku ninga gela nuan ke bedarah sama tedung tendai, entang ke tu lebuh kitai ke bejaku kelulu nyampau dirintai, kali jenti nuan udah bebini, tang lebih ka gayang gamal lelempai, sapa ambai tulang peransang… iya ku aku peransang tulang.. oooh.”

Udah ai jalung dituntung ka irup orang ke ngirup jalung nya baru Sebayan pulai baru ngagai menua Batang Mandai: Lalu ketawa nerekan meh Ini Inan, Gaga pulai nandai ngabang, Ari gelenggang Batang Kedap kanan, Gaga nyaan rugan papan, Bedaan ka tandan tebu tengang, Tak lalu sentai langgai meh Indai Bilai, gaga pulai ngabang, ari Batang Kedap nyulai, Naban ka salai kerungan batang. Dalam siti main benyawa kitai Iban, iya nya besugi, ba tengan genteran besugi nya bisi ga nyebut leka main bakatu: “Agi sekeda bisi begerangi bebuti betundi enggau pangan diri ke jarang betentang, bisi mega nguji pengelandik man- BALA sida bujang berani endang semampai kena sebut lemambang dalam leka main. DALAM kenang lemambang, sida selalu nyebut ‘indu dara tampun puji, kumang bajik peruji ati’. tai tupik jaku kenang, bisi mega mantai sanggai timang pengabang, kena sida dara lanji betabi jari enggau bala lelaki kaban menimang, kena sida nembiak bekelala ari puting setak ke puting setak rumah panjang.

Kena bala sida dara Inja deka bekelala enggau bala lelaki ke negi berani angkat bujang ngichaka randa sida tau betemu dudi ila awakka enda ibuh agi ditanya peneka jadi melaki bini sulu ati idup sekunsi sampai mati lesi midang. “Deka ngambu puna, ngambu dua tu Endu. Di puchuk tapang ara ninga tak lenga-lenga mesanka baru sempun lukai. Deka manjuk imbuk, kami dua tu Endu, di puchuk tapang mikai. Deka natuk puchuk, kami dua tu Endu, tapang bekumbai . Deka nekang tapang kami dua tu Endu, tepan idang madu terebai. Deka nikung adung kami duai tu Endu, di ulu langgai sungai, deka mantil kaki emperagam lawai.”

Main benyawa kitai Iban sigi amat mayuh lalu enda alah rintai aku ditu magang. Nya meh kitai tau dikumbai orang kaya ba pengawa main asal benyawa enggau litaricha. Dudi ila baru aku nerang ngagai bala mayuh nama reti litaricha. Ari pemanah enggau pengelandik nya meh bansa kitai udah angkat nama ditemu semua sereta ngerembai ditemu bala ribai ke datai ari Ai Rupa, di menua tasik besai ledung linang. Nya meh ngumbaka kitai Iban baka sempama buah dikelala ari langgu, bansa dikelala ari jaku.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: