Sejarah Bansa Iban


Palan Panggau Pengingat tu alai mantaika sekeda jerita ka bekaul enggau sejarah bansa Bansa Iban.  Jerita tu bekaul enggau siku-siku tukuh dalam sejarah Iban, nama tempat tauka bekaul enggau siti-siti pekara ka kala nyadi jeman suba. Simpul enggau jaku pandak, ditumeh kita tau macha sekeda jerita tuai bansa kitai.

Sejarah Bansa Iban

Penatai bansa Iban

Pansik enggau dokumen

Ari segi logik, asal penatai semua bansa mensia di dunya tu endang ari Adam seduai Awa kelia.  Ari Adam seduai Awa di Timur Tengah ka beranak betelesak, menisa bepecah lalu mepar di serata dunya tu.  Kenu ka Al-Quran Petara nurunka mensia bebida bansa, cura kulit enggau jaku ngambika kitai bekelala enggau diri sama diri.  Nitihka penemu antropologi semua orang rindu deka nemu asal penatai bansa enggau peturun diri empu.  Dalam budaya Iban, kitai bisi penemu betusut.  Ari tusut kitai ulih nyidi aki ini ka nurunka kitai  20 peturun ka udah lalu.  Siti peturun tauka siti generasi ngembuan timpuh kira-kira 25 taun, reti nya kitai ulih mansik peturun kitai 500 taun ka udah lalu (kira-kira taun 1500- Abad ke 14 tauka jauh dulu ari tu). Naka ka diatu, nadai udah ditemu bisi bup tauka dokumen ti nyemetak nerangka asal penatai bansa Iban. Pansik ke silik lalu nyengala pasal bansa Iban pan nadai udah kala dipejalaika.

Menua Batang Kapuas, Kalimantan Barat, Indonesia

Dalam pengingat tuai bansa Iban dikingatka datai ari Batang Kapuas di Kalimantan, Indonesia. Batang  Kapuas sungai ti panjaii 1143 km, endanng sungai ti pemadu panjai di Indonesia sereta mega sungai ti pemadu panjai di pulau Borneo. Jauh panjai ari Batang Rajang ka pemadu panjai di Malaysia ka semina 563 km.

Menua Yunnan, China

Nitihka pansik orang ke landik pasal mensia, bansa Iban dipelabaka datai ari menua Yunnan, di menua China. Ari Yunnan, etnik tauka bansa ka nurunka bansa Iban pindah ke menua Indochina ka nyerangkung Laos, Vietnam, Kambodia enggau Thailand. Ari Indochina, Iban pindah ke Semenanjung.  Naka ka diatu, dalam sejarah China lama enggau baru nadai kala nyebut bansa Iban bisi di China, tambah mega pemindah tu nyadi jeman dulu kelia, nama bansa Iban deh apin bisi, laban Iban tu ka aki ini kitai kelia kena nyebut orang tauka mensia.  Jaku pan pelaba aku apin meruan baka ka diatu.  Ambika banding baka sekeda bansa di dunya tu dikumbai peturun orang Aryan enggau Semitik, sebedau dikumbai bansa Jerman, Peranchis, English, Arab, Persia, India, Afrika enggau China.

Semenanjung Tanah Melayu (Malaya)

Pelaba aku kitai Iban amat kala ngenduh diau di Semenanjung Tanah Melayu tauka udah nya dikelala enggau nama Malaya lalu diatu disebut Semenanjung Malaysia. Enda ibuh, meragamka pekara ka dalam-dalam, ari segi jaku enggau nama utai tumbuh enggau utai idup kitai beratika dalam Jaku Iban enggau jaku Melayu, kelebih agi Jaku Melayu Johor-Riau endang bisi kabih-kabih enggau pangan diri. Ari penyemak ba jaku enggau nama-nama utai dunya tu sigi enda bula kitai udah kala idup besemak enggau bansa Melayu di rantau Nusantara tu.

Tang taja pia, kitai anang saru ngumbai Iban semak enggau Orang Asli Malaysia, laban sida iya dalam gempung Melayu Negerito tang Iban enggau bansa Melayu dikumbai Melayu Proto. Orang Negrito tu bansa ka pemadu dulu nguan menua Kepulauan Melayu.  Sida iya dipelabaka datai ditu kenyau ari 1000 SM (sebedau pengada Jesus) nitihka barang arkeologi ka ditemu di di Gua Cha, Kelantan.  Orang Negrito nurunka orang Semang ka befizikal berkulit chelum, bebuk geletang, bemata bundar, besai idung, tebal bibir mulut , serta betubuh pandak Di Kedah enggau Perak, orang Negerito dikumbai Semang lalu di Kelantan dikumbai orang-orang Pangan. Orang-orang Negrito mega bisi di Filipina enggau Australia. Orang-orang Negrito di Filipina dikumbai Aetas, lalu di  di Australia dikumbai Orang Chelum.

 

Pulau Sumatera

Ari Semenanjung Tanah Melayu, Iban pindah ke Pulau Sumatera. Penatai pengarap Islam menua ari menua Arab di Sumatra ngujungka Iban pindah ke Borneo laban ti enda sepenemu  enggau ajar pengarap nya ka mentin makai dagin babi.  Ukai semina nya, ajar pengarap Islam mega enda engkeman enggau cara sereta budaya idup Iban kelia nya alai Iban nyeliah ke Kalimantan di Pulau Borneo.

Gunung Mensuat, Mekah, Timur Tengah.

Bisi mega siti agi pansik madahka bansa Iban tu datai ari Gunung Mensuat, semak Mekah di Saudi Arabia. Ari Gunung Mensuat, Iban pindah ke Sumatra. Ari Sumatra, Iban pindah ke Pulau Borneo.  Tang  giga aku dalam internet nadai tetemuka Gunung Mensuat.  Endur ka bennama Mensuat bisi ditemu di Papua New Gunea.  Tu ukai reti nya pengingat orang ka tuai kelia salah, nyangka nama Gunung Mensuat nya ba penemu Iban tang di menua nyin, nama bukit nya disebut lain agi.

Pulau Borneo

Ba bansa Indonesia Pulau Borneo dikumbai sida iya Pulau Kalimantan.  Nama pulau Boreno dikena perintah kolonial Belanda enggau English nyebut serata pulau tu nyengkaum Kalimantan, Sarawak, Sabah enggau Brunei.  Ari pulau Sumatera bala Iban nepat menua Kayung di Batang Kapuas sebedau melunggang ke Sarawak kitu. Kitai Iban mindah ari Kayung laban nyeliahka diri ari pengarap Islam.

Ukai ari Batang Kapuas

Taja pia, bisi seraban bansa Iban ke ukai datai ari Batang Kapuas. Raban sida tu dibatak Sebatin ke bemain ai pasang enggau anak iya Derom datai ari segum gigi gumbang. Iya mega bisi siku agi anak lelaki ke benama Senaun. Sebatin tu datai ari Timur Tengah, tepawah dipangka ke gelumbang sereta terengkah di Tanjung Datu ba ujung Pulau Borneo. Anak iya Derom beranakka Sera Bungkuk Ketuk Tunjuk Penebuk Tiang Tembang ti nurunka Iban Ulu Batang Ai, Beketan enggau Iban Saribas. Anak Sebatin ke benama Senaun tu nurunka Tugau, iya nya siku tuai bansa Rajang tauka bansa Tanjong ke chukup beberita dulu kelia. Tugau tu kering sereta berani. Empa pengering Tugau, ai kemi iya aja tepesukka daun birah (keladi).

Kemboja (Cambodia)

Siti agi jerita madahka bansa Iban tu datai ari Kamuja (munyi Cambodia). Iban pindah ari Kamuja meraka tasik ke Bintulu, Sarawak laban enda tan begulai enggau sebengkah raban bansa ti ganas di Kamuja ke dikumbai bansa Kamarau (munyi Khmer Rouge) ke suah kena pansa leka main asal bansa Iban. Ari pemayuh teori asal penatai Iban, siti teori  ka tau diperatika kitai dalam ka agi iya nya pasal pengenduh kitai Iban di menua Kemboja (Cambodia). Kenu ka teori tu kitai angkat ari menua Kemboja ketegalka charut enggau bansa Kemaru.  Kemaru tu dikaitka enggau   Khmer Rouge, iyanya Parti Keminis Cambodia ka bekuasa  ari taun  1975 ngagai taun 1979 suba, betuaika  Pol Pot, Leng Sary, Son Sen enggau Khieu Samphan.  Enti diperatika, nama Khmer Rouge semina ayan dalam taun 1975, sedangka sejarah kitai Iban jauh dulu ari nya.  Reti nya Khmer Rouge enda ulih dikaitka enggau penatai bansa kitai.  Tambah mega Khmer Rouge tu ukai bansa tang nama sebengkah parti politik.  Aki ini kitai nyangka amat kala ngenduh enda lama di Kemboja, Indochina tang nadai kaul enggau Khmer Rouge.

 

Tembawai Bejuah

Semua grup Ibanik, nyengkaum Iban, Bugau, Mualang, Kantu, Maloh enggau Dayak Desa ngumbai aki ini sida kala diau begempuru di Tembawai Bejuah tauka disebut Tampun Juah. Ba pengingat Iban kedua bali nama Tembawai Bejuah tu Kemedu Repuk Lampung, Ketimbang Lentur Ujung, Temaga Gelang, Terusan Tanjung Bakung tauka Nanga Nuyan. Ba menua tu menya kitai Iban agi begulai sejalai enggau Petara, antu, jelu enggau semua leman utai enseput dalam dunya tu. Sida iya bisi tiga buah rumah panjai ti betuaika Sengalang Burung, Gemuring Gading (apai Keling) enggau Bujang Sebalu Ngenang kedua bali nama Batu Anggung Ke Beruntung Mali Balang (apai Tutung).

Endur Tembawai Bejuah tu kelia kenu ku jerita tuai bansa Iban nya ba urung bila tiga Batang Ketungau, pati Batang Kapuas iya nya semak Lemu enggau Lepung Lidong dalam sitak Kabupaten Sintang, Kapuas Tengah, Kalimantan Barat, Indonesia ke diatu.Bansa kitai ke ngumbai diri Iban bisi dua kali ampit enggau beserara besai. Keterubah iya lebuh beserara enggau sida Sengalang Burung, Sempulang Gana, Ribai, Apai Sabit Bekait, Ngelai enggau semua leman utai enseput di dunya tu ke nyadi ba menua Tembawai Bejuah.

Sida nya kelia ke beserara enggau pangan diri ari Tembawai Bejuah nadai tentu temu kebuah nyemetak tauka bebatang lalu pengingat orang ke tuai ari ai siti enggau ai siti nadai tentu sebaka lalu mayuh besibil. Sekeda tuai ari Batang Engkari enggau Kalaka, Saribas madahka kitai Iban kelia beserara bepun ari sida ti berebutka pintu mas enggau Buah Nimung tauka Buah Pauh Bali tauka Buah Pauh Laba ti tumbuh ba belakang Antu Gumba laban Buah Pauh Laba nya tau ke pengaruh kena matak serang.

Pengingat sekeda tuai ari Batang Undup madahka penyerara nya kelia ketegal Bungai Nuing ti udu mejal Sengalang Burung berayah maya ngintu Gawai Burung, iya nya lebuh sida ke pugu-pugu berani berayah ngelingi pun sabang di tanju. Lebuh iya berayah, dia kaki Sengalang Burung lama agi tinggi agi begantung ari tikai peda sida ti lalu ngujungka iya terus ke langit. Ari nya, Sengalang Burung mih tuai keterubah angkat ninggalka Tembawai Bejuah nya kelia.Sekeda tuai ari Batang Skrang madahka sida ti beserara nya ketegal ari Antu Tapang ti enchuri semakau ari Sintau. Dikena malas penyai Antu Tapang, Sintau lalu mukung Antu Tapang enggau tai sereta manching iya kemi. Nya mih kebuah jugi (isi tumbung) idang manyi masam nyentuk ke sehari tu.

Bisi mega orang ke tuai madahka penyerara di Tembawai Bejuah nya kelia ketegal ari Keling ke belaya enggau Apai Sambang Rumbang Kesuling, berebutka taring tengiling tau ke aning simpai lengan. Laban Aki Nyakai Lang Benguk (Sengalang Burung) udah belaya enggau Apai Selulut Ribut Ngusuk, berebutka batu tanduk pelanduk tau ke penunduk madamka seruan. Laban Laja seduai Pungga udah belaya ngelaban Apai Bua Buga, berebutka batu punggung kesa mesai ma tekaran Kayan. Laban Ngelai seduai Tutung udah belaya ngelaban Apai Sambang Rumbang Ketebung, berebutka batu tanduk adung raja ikan. Ditetak kitai ngena jaku pandak, sida tu beserara kelia ketegal ari berebutka pengaruh tauka berebutka kuasa laban sama enggai alah ari pangan diri.

Penyerara ke dudi agi kenu ku jerita tuai ari Batang Lemanak madahka kitai Iban beserara enggau orang Panggau Libau bepun ari Apai Keling ke benama Chang Chelawang enda ulih peda agi udah iya ke makai sili tauka silui ural tedung. Penyerara tu nyadi di Nanga Semitau, pemindah sida ari Lawai Labai. Lawai Labai tu tembawai lama Iban enggau Orang Panggau udah ke beserara besai ari Tembawai Bejuah (Tembawai Tampu Juah).

Maya ke beserara ari Tembawai Bejuah kelia;Sengalang Burung pindah ke Tansang Kenyalang. Ari Tansang Kenyalang, Iya pindah baru ke Tuchung Besanjung Besinjang, Tatai Redai Isang (kebung langit) nabanka gerempung balang begeman.Pulang Gana pindah ke Rantau Rarau Temiang, Munggu Gulu Sengkenyang, Nanga Temaga Gelang nabanka leka sesangga tanam.

Ngelai seduai Tutung pindah ke Gelung Batu Nakung nabanka siung raban peputan.Ribai pindah ke tasik besai nabanka pengembai ubat jedian.Apai Sabit Bekait pindah ke langit mit nabanka rarit baku bekatan.

Raja Tanduk pindah ngagai Teluk Ai Nyuruk Keruk Semalam nabanka gulung buk tau ke penunduk madamka seruan. Anda Mara pindah ke tasik reremba nabanka menaga tajau pelawan. Ini Manang Menchi (Ini Andan) pindah ke langit siti nabanka batu enda kudi, pengelasi ai pemalit tegalan. Ini Manang Chelung pindah ke tisi langit gadung, nabanka lupung kulit enteli buban.

Gemuring Gading pindah ke Tinting Rinding Pendawan nabanka taring uting lunchik juring tau ke penyelinting pengerurus tikam. Ba penyerara keterubah tu, kitai Iban agi begulai enggau orang Panggau. Bisi jerita madahka kitai Iban enggau orang Panggau agi diau di Tembawai Bejuah sepengudah beserara besai.

Ari Tembawai Bejuah tu meh Iban enggau orang Panggau pambar ari pangan diri laban enda tan begulai enggau Bungai Nuing. Pun jerita iya keterubah tu baka tu:Nyau pengelama ke diau di Tembawai Bejuah, Gemuring Gading parai tuai laban selalu dipekung penyakit pedis perut.

 

Lambar bekait enggau tu:

 

17 responses

  1. Desmond Chan | Reply

    Nama brita, Kaban!

    Thanks for this great blog. Helps me a lot with the research and the language.

    The customary witing is quite well written and had some surprizes for me.

    Keep up the good work and I look forward for some more.

    Lantang Senang,

    Ari,
    Desmond

  2. Intan Waja Lelengau | Reply

    enti enda di padah ke kita ke tuai agi,dini deh kami ke rebak baru penatai enggau asal penatai kitai iban. terima kaseh ngagai nuan.
    GARRY s/o SANGKAN ( Petaling P.S KL )

  3. Ancestry of the Iban Is Predominantly Southeast Asian: Genetic

    http://www.ncbi.nlm.nih.gov/pubmed/21305013

    http://www.plosone.org/article/info%3Adoi%2F10.1371%2Fjournal.pone.0016

    klik ba link ba atas nya, kati ba penemu bala mayuh deh?.. ni ke betul ba pansik penatai bansa kitai Iban? . lalu nama pemeri ti besai bansa Iban ngagai menua Asia Tenggara ke diatu, ngarap ke kitai sama berunding lalu berati.

  4. nang cukup manah ngagai kitai ke rebak baru….

  5. chukup manah kereban tu…. kereban baka tu tau nyadika sanding bala nembiak ke jemah diatu… ngambika sida nemu pentai bangsa kitai empu….

  6. manah amai cherita ka baka tu,laban mayuh kitai bansa nda nemu eri ni penatai,serta asal kitai Iban,arap ka kitai Iban ulih beserakup,serta begulai baka aki ini kitai dulu kelia nda ngira menua serta jalai pengarap ka di pegai kitai

  7. apai izz dungun | Reply

    ndang segi manah bisi tusun penatai asal iban laban mayoh nembiak diatu nda entu nemu pengasal diri..ngarap bisi pengawa beketu di pansik ngau silik..gayu guru gerai nyamai kitai ke bangsa iban..

  8. cukup ‘steady’

  9. vincent Semi Kujam | Reply

    KOMEN ARI :vincent semi kujam. Kitai bangsa iban endang idup begulai besemak enggau petara ke bendar. mina maya ari asal kitai iban begiga ke pengidup,belelang nadai ditemu rita ketegal nadai bisi penemu betulis ke leman cerita, tambah ga sida aki, ini kita kelia cukup bebasa enggau pangan diri lalu enda bekangau, nyebut nama sida ke tuai enggai ke tulah nyentuk ke sida parai lesi midang, sida di kanggau nama enggau nama ensumbar, tang dini ulih ingat enti sida ke raja berani maioh serta udah parai tuai. ukai bisi kemera,newspaper kena nyelak ke jerita ngau pengawa lama. Untung serta beregga amat sida ke ngembuan batu pengigat nurun ke penemu cukup maioh ulih ngerintai sekeda jerita asal ari tulong petara nyentuk ke kitai diatu. Ari pansik nuan aya, kami betuah tulih ke sekeda penemu enggau ngelansa penatai kitaIi Iban ti digelar urang iban berani. I SALUTE YOUR MIND AND BRILLIANT IDEA TO SHARE THIS PRECIOUS IBAN GENERATION HISTORY. THANK YOU VERY MUCH.

  10. Galau Perawan | Reply

    Unggal salah amat nuan manding ka bansa kemarau nyau enggau kominis menoa kamboja. Kemarau tu mega bansa Siam. Tanah Thailand & Kombaja tu siti tanah Siam.

    Bansa kemarau tu sigi udah lama betatam di menoa Kamboja tang kominis tu dibai siko bansa Kemarau ke bejuluk Pulpot. Iya tu ke jai. Tang kitai Iban aku jangka sigi bisi datai ari Kamboja. Enti nuan nemuai ngagai Indo China baka Paliku, Bengkang maioh amat olah orang nya dia sebaka enggau kitai.

    1. orang panggau | Reply

      Terimakasih menyadi cukup manah penemu nn ulih mansik penurun bangsa kitai Iban, Iban enda lenyau ba dunya tang nerekai sebelah dunya. sebengkah ari pesaka kitai Iban ka kena kitai ngelai diri bansa Iban nya nya: a) pendam lama, b) antu pala enggau c) pengaruh pematak reta nya pesaka enda tau sekali kali di buai laban utai nya bukti kitai bisi bansa lalu tau ka senjata kitai Iban. Kitai Iban mega enda tau enda ngembuan Baku sarang pinang, pua kumbu enggau tabak. Baku dikena kitai ngelalu ka petara, pua kumbu dikena masa petara, tabak alai ngengkah ka piring ading ka diuntung ka petara..Ingat Iban endang bepun ari jeman kelia sama sama kitai nyaga bansa kitai enggai ka nama Iban semina tinggal nama. terimakasih.

  11. Unggal, Aku setuju enggau unggal Galau Perawan. Bansa Kemarau tu sigi bansa ke udah lama diau ba Kamboja. Bisi siti bansa asal ke diau ba atas bukit menoa nya ke deka baka kitai Iban ke selalu belaya enggau bansa Kamboja tu. Laya sida sigi udah lama sebedau kominis datai.

  12. Minta pemendar nuan unggal, ka share page nn ke mnh tu..awak ke nembiak kemaya haritu nmu ari ni asal penatai sida ya..

  13. Manah amai kajian nuan bro !!!! well done

  14. Nisambung jerita tu senentang penyerara Iban ari Orang Panggau?

  15. franky untol | Reply

    Ckp mnh! Rindu serta ka nemu eg lebih dalam agi entang cerita asal e g adat lama kitai iban.anang ninggal agai anembiak baru nadai orang enti nda kitai iban empu

  16. Au amat manah tusut penatai kitai iban tang aku ENDA setuju ke utai ka disebut AL-QURAN tang ia ka betul ianya ari BUB KUDUS ( AL-KITAB ).

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: