Mimpi Temenggong Koh anak Jubang

MIMPI TEMENGGUNG KOH ANAK JUBANG

Nyadi Temenggong Koh anak Jubang tuai Iban keterubah dichirika nyadi Temenggong di Batang Rajang dalam menua pegai Kapit ka diatu. Nyadi Koh tu tau kayau lalu suah mega matak bala bebunuh ngelaban bansa bukai Ulu Batang Rajang ketegal berebut ka menua alai diau. Temenggong Koh bisi mimpi, lalu mimpi iya baka tu:

Nyadi lebuh iya baru angkat bujang, kira umur iya maya nya manggai 15 belas taun, iya asai ka bemimpi tesat bejalai. Nyau kepuas ke tesat nya baru iya rembus ba jalai tawas besai bendar. Lalu dititi iya jalai lalu niki ke bukit. datai iya di tuchung bukit dia iya meda bisi rumah. Ari rumah nya pansut indu siku lalu ngelaluka iya.

Ninga indu ngelaluka iya, iya pan lalu ka rumah. Datai rumah, indu nya lalu mai iya tama ka bilik. Lebuh tama, peda iya bilik ngenjing penuh madat laban reta tengkira. Ko indu madahka iya, “Nya semua reta enggi nuan magang Koh.” Gaga bendar asai ati sepi iya ninga indu nya madahka semua reta nya enggi iya magang.

Udah indu madahka nya enggi  iya, indu lalu madah ka rumah ke ditiki ianya rumah orang di tuchung Rabung Berani, Rabung Kaya. Udah nya indu lalu mai iya pansut ke ruai ka baru. Lebuh indu mai iya ka ruai, dia iya nyau berunding deka mulaika diri. Indu pan lalu ngasuh iya pulai, sereta lalu madah ngagai iya jalai iya pulai.

Udah indu nunjuk ka jalai ngagai iya, iya lalu nurun bukit ke ditiki iya mansang kia tadi. Nyau ka lama udah iya nurun, iya pan rembus ha lebak dalam hendar. Ari lebak nya iya nurun haru, lalu meda huluh betung melintang jalai iya. Datai ba Betung iya lalu deka ensuruk. Kejang iya deka meremi ensuruk, endur orang ngangau nagang iya ensuruk nya. Ninga rara orang, iya lalu ngeransi deka merejuk. Tang orang enda ngasuh iya merejuk melunggang ke sepiak. “Ni jalai aku deh?” ka iya. “Enti nuan deka nengah jalai nya,” ko saut orang, “lumpung nuan betung nya.” Ninga jaku orang, dia iya  ati mau laban iya ngadang diri enda tesimbang ka betung nya sakali mantap. “Enti nuari enda ngeluntang betung nya,” ko orang, “nuan nadai jalai bukai.” Ninga nya iya lalu nyintak jempol, lalu mantap Betung nya lalu putus. Nyadi duku ke dikena iya nyimpung betung nya asai sepi iya, endang duku ke masai ditangkin iya di menua tu.

Udah putus Betung nya disimpung iya, endur indu siku dinga iya bejaku, ko indu nya, “Mayuh bendar orang udah nengah jalai nya Koh, tang siku pan nadai meh sida tesimpungka betung ke melintang jalai sida. Kengka siku dua ke berani nyimpung iya, samina naka ngeliti aja kulit kena pantap sida,” ka indu nya. “Nyadi laban nuan tesimpungka betung nya,enti nuan ngayau nadai menua tau enda alah laban nuan.”

Udah abis jaku indu, alai lelaki siku pansut madah ka, enti Koh ngangauka sida mai ngayau, sida deka enggau iya magang. Lelaki nya madahka diri Keling, tuai orang di Panggau Libau.

Nyadi lebuh Koh apin dichiri nyadi Penghulu menya, sakali ga Koh bisi mimpi nyelai. Iya asai ke betemu enggau Tuan Rajah ke ngasuh iya muka sarah. Dibuka iya enda ulih, laban Tuan Rajah nadai meri iya pemuka. Meda sarah lalu apin ulih buka iya, ka Tuan Rajah, “Nya sabarang chara nuan muka Koh.” Ninga jaku Tuan Rajah iya lalu mabak tanchang sarah enggau penapat-inat. Sarah pan lalu tebuka ga dibabak iya. Peda iya utai dalam nyin ngenjing duit penuhh sarah. Tuan Rajah lalu madahka iya, semua duit nya enggi iya magang.

Udah tembu nya, alai Tuan Rajah lalu bejaku madahka diri ngasuh iya nyadi Penghulu. Iya madahka diri enda tau nyadi Penghulu. “Enda tau enda,” ka Tuan Rajah. Lebuh seduai bebelitka jaku nya, alai Koh tedani.

Ditusui niang Temenggung Koh empu ngagai niang Mujah anak Mambang dalam taun 1951 di Kuching. Sebedau Temenggung parai tuai, Mujah parai dalam bulan Empat taun 1966 ba umur iya 95 taun.