Ribut

Ninga nyawa orang indu bisi ngangauka nama, Beragah lalu nitihka nyawa orang nya.Sambil iya bejalai sambil nilik nilik selepak anak kayu.Tilik kiba tilik kanan nadai ga bisi meda orang.Nyau kelama lama iya datai semak ba nyawa orang nya tadi Beragah lalu tekenyit tedandang ke belakang.
“Lapa nuan dom tekenyit meda aku?” ku orang indu nya tadi
“Ni aku enda tekenyit.Mua nuan sama gamal enggau indai aku” saut Beragah
“Aku ga sigi indai nuan.Kati ka enda sama”
“Enda patut nuan tu indai aku.Enti nuan indai aku nama kebuah nuan nyau diau ba kampung tu deh?” Pia ku Beragah.Ati Beragah agi enda nyamai laban bedau tentu deka ngamatka jaku indu nya tadi

“Endaaiii…Beragah.Aku tu meh indai nuan Endu Lantan Sekumbang.Aku ke diau ditu laban ti ngiga nuan ka tesat betaun taun ka udah” Indu nya tadi meda gaya Beragah agi takut takut lalu ngambi daun sega siti.Lalu digusuk gusuk iya enggau tapak jari.Nya meh bau daun sega tak tak melalin bau.Naka pengerengut disium Beragah.Makin lama mata Beragah makin ka ngantuk disepi iya.Enda lama udah nya Beragah lalu teduduk lalu tetinduk nyandih ba endur iya ke teduduk tadi.
Indu nya tadi lalu berumban ngambi Beragah sereta ditaban ka iya ngagai pun kara siti ti besai.datai dia Beragah lalu ditanchang iya enggau urat kara.Beragah pan nadai ulih engkebut agi lebuh ke dani tadi.
Gaga meh bala anak indu nya tadi meda indai sida bulih pemakai.

Nyadi Bunsu Genali ka udah ngidup ke seput diri lalu bejalai baru nitihka bekau Ribut ari belakang.

“Mati enggau idup sigi aku ambi meh anak mit nya ari Ribut.Enda pia parai meh aku tu enti pulai nadai maie iya” ku Bunsu Genali.

Bejalai iya tadi enggau naka peneras nangik hari malam.Takut ka bekau kaki Ribut lenyau nadai ulih di peda agi.Pemuas iya bejalai tadi dia iya tepedaka Ribut benung garing garing.
“Nya iya ! Legi sepi nuan !”
Datai iya ba tubuh Ribut dia iya nadai meda anak mit ke ditaban Ribut dia.
“Ribut ! Dani ! Angkat nuan !” Ku iya.Nadai ga Ribut nyaut.Abas iya seput Ribut tadi agi ga idup diasaika iya.Semina tubuh Ribut nyau lemi.Bunsu Genali lalu ngesan Ribut dibaie ngagai anak sungai ba larung kaki bukit nya tadi.Datai dia lalu ditikau ke iya tubuh Ribut ngagai sungai.Benung iya nganti Ribut ke ngeleda dia Bunsu Genali bisi ninga nya orang minta tulung.Munyi nyawa anak mit.
“Tuluungg..! Tuluungg…!”

“Kada nya kini anak mit nya.Hah ! Beduan aku amat nuan neh ! Legi nuan ensepi sambi”
Bunsu Genali lalu engkechit ke pantai.Iya lalu
nitihka munyi nyawa Beragah ke minta tulung nya tadi.Udah nya Bunsu Genali meda pun kara siti tak naka iya pemesai.Nyau lindung dunya sepiak laban daun kara nya tadi.Iya lalu ngelawa kara nya.Malik iya ke puchuk kara peda iya Beragah benung kuda kuda deka ngelepas ke diri.Meda Beragah bisi ba atas pun kara nya tadi Bunsu Genali lalu deka niki.Tang baru deka nyingkang kaki iya tadi sepi Bunsu Genali kaki iya asaika dibelit utai.Peda iya ke baruh meda urat kara nyau beterayap melit kaki iya.Bunsu Genali lalu nyintak duku iya.Pantap iya kiba pantap iya kanan urat kara ti ka melit kaki iya.Lama agi mayuh agi urat kara nya ka datai melit iya.Bunsu Genali lalu nyurut kediri

“Antu tu ! Ukai kara.”ku iya

Udah nya iya lalu mansang baru semak agi.Peda iya urat kara nya tadi nadai idup engkebut ngerayap agi.Bunsu Genali mansang semak sesemak.Bedau ga urat kara nya tadi berupai engkebut dipeda iya.Meda urat kayu nya nadai agi ngachau Bunsu Genali lalu niki pun kara nya tadi.Iya datai ba dan ketiga.Umbas iya ga peninggi lebuh iya malik ke baruh.Dia Bunsu Genali ngasaika dada iya asai bisi utai ngentum.Iya bedemuh lalu labuh ke baruh.Bunsu Genali lalu begiling ngenat ka tubuh pedis baie labuh.Bebelat kiba kanan sambil jari iya megai dada ti pedis.

” Hah ! Sapa meh nuan tu?! Enti berani kitu meh”ku Bunsu Genali angkat “mansang kitu ! Anang main belalai baka nya nganu pangan diri”

Enda lama udah nya peda hari nyau beribut naka pemalat.Daun kara nyau bekeberai labuh baka leka ujan ngagai Bunsu Genali.Dia Bunsu Genali meda indu siku benung bediri ba dan kara.
“Nuan tu tadi pia?! Nadai endar ga utai nganu.Kumbai aku Gerasi nuan tadi” pia ku Bunsu Genali
Ninga jaku Bunsu Genali munyi nya dia deh indu nya tadi lalu terejun ke baruh.Lalu nadai beanti anti agi nerekam Bunsu Genali.Apin ngadang ga tudah iya tadi alai indu nya ke datai nerekam iya.Seduai lalu bebelat sebelah tanah nya tadi.Sepi Bunsu Genali tubuh iya nyau asai ke diturih ngena taji manuk.Abis rajai pun berang iya dikeramak indu nya tadi.Indu nya pan ngeramak pengeramak tubuh Bunsu Genali.Ensepi tubuh diri nyau mayuh telih iya lalu ngayun ka indu nya tadi ke tisi.Indu nya pan lalu tepelanting.Meda diri udah jauh tepelanting indu nya pan lalu bebali gaya.Mali nyadi antu kara.Tinggi sereta besai.Jari iya naka pemayuh baka urat kayu benung kindau kindau deka nangkap Bunsu Genali.

Bunsu Genali endang udah sedia.Dia maya urat kara ba jari enggau tubuh indu antu nya tadi deka datai ngagai iya.Dipantap iya.Seduai pan mupuk bejamah baru dia tadi.Sama enggai alah.

Nyadi Ribut ka agi tinggal ba anak sungai nya tadi lalu engkuda idup baru ari ti luput lemi tulang.Iya lalu angkat.Ribut meda pun kayu beteguyat tunga punjung kaki bukit.Iya lalu engkechit ke pantai ngelawa pun kayu enggau babas ka beguyat dipeda iya.Datai dia Ribut meda Bunsu Genali benung berekak enggau indu antu.Bunsu Genali tepedaka Ribut tadi datai lalu ngangau ka iya
“Anang meda aja nuan ! Tulung aku tu ulih nuan ! Peda nuan tubuh aku ! Ambis rajai dikeramak indu antu ti nadai guna tu !”

Benung iya deka nulung Bunsu Genali dia iya ninga nyawa Beragah rerauh minta tulung.Malik iya ke atas pun kara Ribut lalu tepedaka Beragah benung ditan ke anak antu kara.Ribut lalu merejuk niki pun kara.Datai ba atas bala anak antu bisi tiga iku lalu disimpung Ribut magang.Udah Beragah ulih tadi Ribut lalu terejun maie Beragah.Lebuh ke dibaruh tadi Ribut nadai malik agi ngagai Bunsu Genali.Iya enggau Beragah lalu ngelari kediri tama kampung baru

“Apuu…..! Parai meh aku tu dua kali di ayah ke nuan bakatu” ku Bunsu Genali meda Ribut udah nadai agi dipeda.Indu antu nya tadi lalu ngeransi meda anak iya tiga iku nya udah parai.
Tubuh Bunsu Genali berasai lempung ditikau ka iya ngagai pun kara.Bunsu Genali nyau gidan enda liat ati.Iya lalu merejuk ngagai belakang antu kara nya tadi sereta disimpung iya ba pegu.Pala antu kara nya tadi lalu engketik labuh ke baruh.Tubuh antu kara ka tinggal tadi lalu ditetak iya diempalung ngagai tuchung bukit.Pala antu kara nya pan ditikau iya jauh ke nanga sungai.Ngambika nadai bechantum.
Tembu nya tadi Bunsu Genali lalu duduk.Enda berasai dinga nyawa iya besampi munyi munyi menani manang chelong, bejeluka munyi china dalam bandung. Muchau munyi melanau dalam bangkung.Peda semua abi telih, abi rajai dikeramak antu kara ba tubuh iya pan alit, gerai suman baka selama.

(Besambung)