Nanga Telik


Pengangkat Iban Nanga Telik tu endang ari Rimbas.  Sampal agi sida iya peturun Maling seduai Aing iyanya peturun ke-9 ari Padang ngambi Suyah ka mungkal Batang Rimbas.  Nitihka cerita Benedict Sandin dalam bup Peturun Iban Munan seduai Utong peturun Padang ti ke-5 ke penudi pindah ke Melupa. Kitai enda nemu baka ni ka pejalai pendiau sida tu kelia, laban ba tubuh Maling seduai Aing sida tu mega dikingatka orang ka tuai angkat ari Bayur.  Nyangka bala sida tu nikal baru ke Bayur sekalika bebini nguai ke Bayur.  Sida ka tuai kala ngenang sida Maling ka carut enggau Repun Betuah.  Dalam penyarut ti dia Repun Betuah nunu rumah sida Maling, tang taja pia nadai ga orang madahka maling seduai Aing angkat ari Bauyur ketegal penyarut tu.  Nyadi Repun Betuah tu endang raja berani ari Bukit Bangat di Betong, iya angkat ari Bangat lalu diau di Nanga Ulai, Rimbas.  Pia mega Radin angkat ari Paku lalu nguan menua Rimbas, Meda bala anembiak Repun Betuah seduai Radin keras amat berimba enua Rimbas alai bala peturun Padang, sida Maling, sida Aing nyeliahka diri melunggang Sungai Batang lalu sempat berimba sekeda temuda di Palu, dalam Batang. Nyadi menyadi sida Maling ka benama Urie nurunka bala di Melupa, Krian, Saratok.

Tusut ari Padang:

1.   Ligam  x    Riah   =     Padang

2.   Padang  x    Suyah     =     Gunggu, Duyah

3    Gunggu  x    Dayang Kacha   =     Garrai

4    Garrai  x    Rechak     =     Jana, Gumah

5    Jana    x    Lada    =     Baat

6    Baat    x    Lanjut    =     Munan, Utong

7    Munan  x    Nyangan     =     Jenun, Lanchang, Numpang,

8    Numpang     x    Mangku     =     Jar

9    Jar    x    Imbok  =     Buntu

10  Buntu    x    Kedemie   =     Maling, Aing, Urie (f)

11  Maling     x    Chandu  =     Ladang

12  Ladang      x    Demong   =     Gudom (Mati sakit muang ai maya Ngayau Lus ngelaban Bantin seduai Ngumbang di Ulu Ai 1909)

13  Gudom  x    Nawie    =     Gumbo, Tindin (Pindah ke Mukah)

14  Gumbo (Mati 1966)     x    Puau  (Mati 1981)    =    (Sima anak Gumbo) Niang Indai (1930-2002)

15  Tubuh kami…………..

Serambau enggau Demong anak Beketan Entingi ka nguan Batang paku di menua Rimbas enggau Krian  diuan mayuh bansa Seru. Endur sida tu tebal bendar diau di Bukit Tabujang, Ulu Awik, di Nanga Diso dalam Awik enda jauh an nanga, di Bukit Engkalat tebing ai Krian enda berapa jauh ari Nanga Melupa enggau ba Bukit Tengalat di Ulu Melupa pati Krian. Bansa Seru tu ganas bendar bejalai disebelah kampung dalam. Sida iya balat bendar bemunsuh enggau Iban. Keba tusah bendar Iban maya nya kelia, laban mayuh bendar sida parai kena bunuh Seru lebuh Iban agi berimba menua ngulu ka Paku enggau Layar.

Nyadi serambau enggau Demong tu, Jenua angkat Langgung Bukit Kenyandang antara Ulu Sadong enggau Ulu Ketungau ngilika Sadong ngiga menua baru. Ari Sadong sida merau meraka tasik lalu nama Layar berumah di Pusa Kampung Engkerebang. Nyau kelama iya udah diau di Pusa iya pan parai tuai.

Udah parai Jenua iya lalu diganti Padang nyadi tuai megai anembiak. Ari Pusa Padang nguluka anembiak iya mudik Rimbas lalu berumah di Skaup. Ari Skaup iya pindah baru masuk Sungai Undai lalu berumah panjai di Letong Beluok. Lebuh iya berumah dalam Sungai Undai. Sekali leboh sida nubai, Padang parai ditabanka ikan tapah ngili ka Batang Undai ke Batang Rimbas ngilika Rimbas rembus ke Batang Layar. Dalam Batang Layar bangkai iya dibai tapah kulu ka naka Lubok Sedebu lalu kill ka naka pipi Tanjong Lilin ngalih ari ili.  Nya alai laban naka nya bangkai iya ditaban ka ikan ngili enggau ngulu ka Layar, naka nya ga rampa menua agi kena pegai Rimbas dataika kemaya tu masuk Batang Layar.

Udah parai Padang anak iya ke benama Gunggu nganti iya nyadi tuai.  Ari Letong Beluok Gunggu mai anembiak iya mansutka diri baru ke Batang Rimbas lalu mudik ke ulu lalu berumah di Nanga Jerai. Ba maya tu kelia ari Nanga Debak ke ili ka agi diuan bansa Seru. Tang sereta Iban datai di menua nya sida lalu diau ngulai bansa Iban.

Angkat ani Nanga Jerai Gunggu mai anembiak iya berumah di Tanjong Bakong beseberai rurnah enggau bansa Seru. Nyadi labàn sida sama besemak diau bakanya sida lalu bepangan bendar. Seru nelap lalu suah hendar meri sida tambak pisang, tebu enggau ubi ka dempa. Nyadi Gunggu mati leboh iya berumah ditu, alai iya lalu ditumbak ka ba pendam Seru di Pendam Batu ani ili  Debak kemaya tu.

Gunggu iya lalu diganti anak iya Garrai megai Iban Batang Rimbas. Angkat Garrai enggau anembiak iya an Tanjong Bakong sida berumah di seberai Nanga Tawai. Nyadi endor rumah Seru leboh tu masuk dalam Sungai Tawai.  Nyadi sama sarambau enggau tuboh Gunggu dalam Batang Rimbas, bisi tuai siko benama Manggi mindah an Tisak ngilika Sungai Samudam, lalu ngulu ka Batang Layar. Nyadi dulu ari tu Manggi dulu mungkal lalu diau nguluka Batang Tisak pati kiba Batang Skrang. lya angkat ari menua nya, udah iya belaya ngelaban Gelanyang Manang Jelapi ke parai dibunuh anembiak iya jadi Batu Jelapi di Stirau, enda jauh iga ari ulu Nanga Lingga ba kaki Bukit Balau tebing kanan mudik Batang Lupar.

Lebuh iya mudik Batang Layar Manggi dulu ngetu enda lama di Sungai Sepinang. Angkat iya ari nya, iya lalu berumah ba ujong Tanjung Orang Tuai ke dikumbai Tanjong Pendam tauka Tanjong Rangka ngalih ari ulu ba endor ke dikumbai Supa.

Lebuh iya benung nirika rumah dia, iya ninga Batang Rimbas bisi orang udah nguan. Irau ati ka nya, alai iya lalu ngabas kin ka bedarat neresap kampung alah datai ngagai iya rembus di Nanga Debak. Apin lama udah iya datai dia, iya kena pedis perut lalu mati. Bangkai iya ditumbak ka ba pendam Batu ari ili Debak ke diatu. Nyadi laban iya ditumbak ka ditu, nya kabuah datai ka kemaya tu bisi orang ngumbai pendam nya dipungkal Manggi enggau bisi ga ngumbai dipungkal Gunggu.

Nyadi laban pemati Manggi tu, rumah ke digaga iya di Supa tadi lalu enda tembu. Nya alai laban iya dibuai enda tembu, iya dikumibai datai ka kemaya tu Tembawai Buruk Rumah.

Apin bangat lama udah sida Garrai berumah di Nanga Tawai alai Seru angkat an dalam Sungai Tawai pindah ka Ulu Babu, nya ngasuh sida nyau beserara bendar enggau bansa Iban.

Nyadi ari Nanga Tawai dia Garrai enggau anembiak iya pindah ka Nanga Likap ka endur iya parai tuai. Nyadi bansa Seru tadi angkat ari Ulu Babu lalu nyeliah diau ka Ulu Asam pati Melupa simpang Batang Krian.

Nyadi di Batang Rimbas tadi udah Garrai parai, iya lalu diganti anak iya Jana nyadi tuai. Endor rumah Jana tu di tembawai Sandong dalam Babu. Angkat Jana ari nya, baru iya berurnah di Tembawai Manding dalam Metong, Rimbas tebing kanan mudik. Angkat iya an nya baru iya berumah di Nanga Gayau, alai iya panai tuai. Udah nadai agi Jana nuai tikal iya lalu ditampong anak iya Utong seduai Munan. Nyadi Munan tau matak kayau anak. Iya berumah di tembawai Seragau. Angkat iya ari nya berumah di Nanga Luop, ari nya angkat baru lalu berurnah di Nanga Tuang ari Ili Nanga Bayor.

Ari Nanga Tuang Munan Seduai Utong seduai nyurut ka diri baru lalu diau nguluka Babu. Ari Babu nya baru Utong seduai Munan pindah ke Melupa ke alai seduai diau nyentukka parai tuai.  Semua menua alai Munan matak kayau anak ari Nanga Kalaka terus ke Nanga Oya ngelaban bansa Melanau.

_________________________________________

Datai ba tubuh Laja anak Jingan tauka Aki Kayan dia iya lalu ngiring anembiak berumah di Rumah Atas ka alai Pendam Tembawai ka diatu.  Nyadi rumah tu tinggi gegiau ninting tebiang.  Kenu ka sida ka tuai, rumah atas tu kelia manah, ngena teras magang laban niang Laja menya suah nemuai ke Paku meda gaya rumah orang Paku ka betiangka batang tebelian besai.

Kira ka bepuluh taun ba rumah atas, alai Tuai Rumah Laja anak Jingan lalu matak anembiak berumah baru, ka sekali tu rumah melasar tanah laban nyunto Pasar Kaki Wong.  Nya alai rumah kami Nanga Telik ka diatu antara rumah panjai di Ulu Krian ka dulu ari sekeda rumah panjai bukai digaga melasar tanah. Mati Laja alai iya lalu diganti Tarang anak Laja nyadi tuai.  Maya Tarang mati, anak tuai iya Kayan agi biak nya alai iya lalu di ganti Ambin.  Nyau tuai Ambin nya baru diganti Tuai Rumah Kayan anak Tarang ka diatu.

Ari tu kitai beratika orang ka tuai kelia bisi vision ka ngemajuka cara pendiau enggau pengidup.  Nampung sida ka tuai, aki Laja tu kelia apin ka nyadi tuai iya endang nunjukka pengelandik ngempung anembiak redak taja pan maya nya Mujal nyadi tuai Nanga Telik, tang Mujal enggai undur ke Satratok nganjung pupu pala enggau pupu pintu.  Nya alai laban Laja rajin nganjung pupu, bala anembiak lalu beserakup ka betuaika iya.

Nyau ngenang nostaljia ka lama, kami di menua Krian, kelebih agi kami di nanga Telik tu menua dudi agi mansang ba penemu sekula enggau nanam getah nya alai agi kelia sigi dipelandikka orang ka tuai sereta juluk ati ka betampil belaki bebini enggau orang Paku, orang Layar, Rimbas baka orang Bayor laban sida tu dulu agi maju sereta beberita bulih padi enti bumai.  Nya alai ba tubuh sida apai indai kami tau dikira nadai orang Nanga Telik betampil belaki bebini enggau orang tunga kin,  tambah mega menua jauh. Nyau datai ba tubuh kami enggau tubuh anak kami baru bisi ga betampil enggau orang Paku enggau Rimbas.

2 responses

  1. Ngal

    Ba ni ulu Bulu di Senulau? Ulih madah? Mudik ke ulu Krian ke nyak? Ka nginga bala aki umboh kami Sengaling ti datai ari Senulau.

  2. Ngal

    Niang aki kami siku bisi benama Padang, suba nyadi tuai rumah ba Jalak/Ladong, Pakan. Ia madahke aki tuai kami ti benama Sengaling datai ari Ulu Budu ba Senulau.

    Enda nemu meh enti niang aki Padang kami tu ngankatke Padang ti dalam jerita pemindah Iban tu.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: