Pengaya Jaku Iban 1


Keterubah aku meri selamat betemu ba dunya siber.  Sebulan ka udah lalu sampal agi berita ka dipansutka ditu ngenang politik, kelebih agi politik menua Saratok.  Tu ukai ketegal gaga tauka pedis ati ka sapa-sapa, tang laban aku rindu sereta sayau ka menua diri, deka meda menua diri maju sereta ka meda rayat mansang dalam pengidup.  Nya alai, dalam aku ka mansutka penemu, nyangka penemu tak bisi lunggar ari iya ka patut tauka tak luba-luba peda kita, aku minta ampun.  Lengka ka kitai kenang pasal politik, diatu kitai ngenang pengaya jaku Iban.

A

abang __Pangkat dalam strata sosial etnik asal Melayu di Sarawak.

abang berayah __Tiang tengah ba ruai endur ngaitka duku, agi kelia kadang-kadang bisi tanduk rusa.

abi besi – Tanda tauka kelai ti suah dikena bansa Iban nyadika entara temuda (tanah) iya nya baka belakang tanah, lebak, kayu besai, buluh, batu galang etb.  Panggul berumpang kampung tauka panggul bumai temuda.  Beguna kena nentuka garis bagi tanah temuda antara sida ka bumai ba endur nya.

abi kaki, abi jari – Bekau pengawa ti udah dikereja orang ka dulu agi lalu nyadi teladan orang ke dudi ti bekaul enggau pengawa nya.

abis runding__Nadai agi idea, penemu kena mutarka siti-siti pekara

abis sain__Abis sempekat , abis timpuh (expired).

abis seput__Mati.

adan__Garis endur belabuh pekit belumba tauka garis pengujung/pengabis kena nentuka pemenang.

adat __Daya idup tauka jalai pendiau sesebengkah bansa.

adat asal Iban __Daya idup tauka jalai pendiau bansa Iban nitihka kosmologi Iban. Adat Iban nya adat ti nyadi lalau pendiau bansa Iban baka dalam Adat Iban 1993.

adat basu kaki__ Ngenselan temuai datai ngena besi ka kering semengat tauka kebuk ka kurung semengat ngambika burung tauka mimpi ka jai tabar lar.

adung belalai__Enda ngayanka diri ka bendar ba mua mayuh.  Cunto:  Nayum nya gaya ka tak diau diri,  enti udah mabuk mayuh cerita iya, baka adung belalai. Penerang: ikan adung bisi surik chelum ba kerigai iya, surik nya enda dipeda, semadi kitai nyilakka pidin iya.

agi bau lia__Anak lelaki ka agi biak, tang udah deka ngemujangka diri nemu ka nguntik orang indu. Cunto: Kunday anak Apai Ali nya agi biak bendar, agi bau lia tang udah nemu ka nguntik indu dara.

agi urap-urap ari__Agi tumu pagi bendar, apin tekerebak tawas tang udah bisi kukuk manuk.

ai ansah__Sebengkah leka main dikena meransang, ngelancham ati enggau runding sereta muji orang ti deka diasuh bejaku. Chunto  Ai Ansah 1:  Nyadi Ai Ansah tu tapis silup jaku dikena meransang tauka ngansah  pangan diri lebuh maya pengerami baka maya melah pinang, maya gawai enggau pengerami bukai. Iya ke bender bendar sekira ke jaku peransang enggau basa meh nya dikena ngangkatka orang ti dituju nya ari penuduk iya. Kebuah kitai ngansah orang nya ngambika iya enda malu mansutka penemu diri. Kedua agi ngambika penemu ti dipansutka iya nya lagi bias landa, ngasi sidi, ngayuka pemujur pengawa ti dikereja maya nya. Ai Ansah tu mayuh macham. Iya enda tau diberi ngagai orang sebarang, nama ukai orang ke empu pengawa ti dikeluluka kitai dia. Enti salah beri, iya tau negamalu sereta ngelanyaika orang, tit au ngujungka penyarut nyadi enti pala sama udah ngelu. Ambika banding ai ansah ungkup Tuai Rumah enda tau diberi ngagai Bujang Berani.

Cunto Leka Ai Ansah I

Nya alai tu meh ke digela aku ai sempuli padi nubai,

Tumbuh di tanah latah mandai,

Dibantun dara imun nyerumba sebum panas lemai,

Diketau dara bagau betenggauka seliau bintang tigai,

Dikisar indai entukar bebar enggau kah lamba mikai,

Ditutuk dara  gauk enggau lesung tunggul kelampai,

Ditampi dara tinggi enggau chapan baru tembu bingkai.

Lepas nya baru dipanduk dara gauk enggau periuk temaga Berunai,

Dichampur indai burung tekukur enggau meki ragi pemakai,

Disimpan indai burung bayan dalam tempayan dua berimbai,

Disengkabung indai burung tiung enggau lumpung kudi Berunai,

Udah nya baru lalu dituang indai bujang ngagai balang butul kirai.

Dia iya lalu bebali nyadi tuak ansah beram nyamai,

Enti kelia dikena ngansah niang Minggat apai Runai seduai Awan apai Sawai,

Tang ke tu kena aku ngansah tatah dabung landai nuan Igat wai,

Ngambika ati nuan berani ngereja semua utai,

Awakka runding nuan juring baka juing laja kirai,

Sada nuan bias ari tuba Kayan Makinai,

Ngambika mejang nuan ila tau enggau orang ngerandang jalai singkang pemansang ngemajuka bansa kitai.

Ai Ansah II

Tu ai teratak bintang banyak ninggang awak arus nanga

Tu ai gemuruh bintang labuh baka suluh lampu kelita

Tu ai capah batu belah tinggang darah babi menua

Tang agi ga tu dikembai aku ai sempuli padi puya,

Ai bingka  padi kerapa tanam sida di emperan tanah kerapa

Nya alai tak mansang padi bangang ngasuh tak betugang tuga cenaga

Tak nyadi padi wie ari kaki sampai antara

Peda buah naka pemanah teruya-ruya

Ketau dara bagau pulut timau enggau pesingan tangan tapa

dua Kambut di buntut guni baja,

bai pulai nuju penyambai rumah raya

Lalu diindik di atas pentik papan pelangka

Lalu ditiup enggau ribut angin raga

Lalu tampi enggau siti chapan dua

Lalu dijembi dara mereti sehari-hari ke ari pagi sampai matahari ke teruji putui linda

Lalu diinjin ba injin ke bemain enda belepa

Lalu dipanduk dara gauk dalam periuk kendi tembaga

Lalu diengkah manah-manah selidak chapak bunga

Lalu digerami enggau igi ragi segala

Udahnya lalu dikandang sida aya jang dalam rumbang tajau singa raja

Lalu disarap dara nelap enggau lipat kain kesumba

Lalu dituang dara mekang dalam balang butul segala

Lalu diperenchitka aku mimit dalam chubit chawan bunga nengah kelasah tikai sana jawa

Tadi bai dara bajik pansut ari penaik bilik buka dua

Bai ngagai kitai ke berintai duduk semuka tugung bala

Laban randa seharitu besai pengawa melah gelagah buah pinang seleka,

nyemelaka asap lia nyemakaka bunga chempaka

Nya alai ai tu kena aku ngansah terinting puting dabung  seleka

Awaka nekis nyaris inggar didinga

Sepindah enda munyi pantap

Niang Minggat laki Jara

Lebuh tinda dibai orang ngujika ati berani mutus changka

Nyimpung igi balang begumba, merejuk kuta pintu labang

Laban tinda nuan tu endang dipanahka kita serumah nembuka kereja

Bejadi seduai ka melaki bini kumbai kitai melah pinang.

AI ANSAH BUJANG BERANI

Ai perugan buluh payan tumbuh di emperan Kapuas rinda,

Ai terutu temiang pambu diguna indu kaban dara,

Digulai ini kitai Rabai enggau peretai rampang bunga,

Disimpan ini Inan dalam tempayan benda menaga.

Nyau kelama-lama dia tak bebali nyadi asi beram bisa,

Enti dikena nitihka ripan, tau iya bebali nyadi ke peduman anak mensia,

Tang enti salah engkah dia iya tau bebali nyadi dadah ngasuh gila,

Tau ngasuh pala luga-luga enda nemu bekira,

Tau ngasuh jari kitai selalu deka berani nantaika senyata.

Nyadi ke tu ukai pia, tu ga dikena aku ngansah dilah sura nyawa,

Aku ga meda pala nuan nyau repa umba tempuga kenyali banda,

Meda belakang nuan bebendang tinggang seludang baju kasa,

Meda punggung nuan nyau penuh keliling gelung rajut bisa,

Meda lengan nuan unggal megai enteran sangkuh temaga,

Nya alai tak chukup gaya nuan dipeda aku, patut bendar digelar pesilar ular naga,

Selalu enggau beripa ba nanga jalai bepampang.

Nya alai enti udah munyi nya irup meh ai tu unggal,

Enda tu ngasuh nyawa nuan lesi bebadi ilang laya,

Semina tak ngasuh tubuh nuan teguh ari selama,

Ngasuh isi nuan tan berujanka leka meriam bedil temaga,

Ukai enda lebuh tembai orang begawaika igi rirai balang begumba,

Endang nuan dipaduka orang ngirup ai tuntung jalung bisa,

Laban nuan bengat beberita didinga semua sekayu menua Malaysia nunggang,

Ukai semina naka nya, enti lebuh orang ngintu pengada Tuan Gavernor,

Dia baru nuan pansut nama, ketegal diberi iya tanda terima bintang.

AI ANSAH DIKENA NGANGKATKAN ORANG BEJAKU

Tu ai lia bingka kerapa,

Ai pun tarum kemuja,

Ai pating limau raja,

Dikeluahka aku di kelansah tikai anyam dua,

Ke udah diembun kaban teruna,

Setaun mangun pun padi puya,

Udah dipanjah endu teruna dara bungah enggau darah babi sepa.

Udah nya ditaruh kami teguh-teguh dalam manduh indu benda,

Nya alai ke lemai tu,

Dikena aku ngansah tatah dabung seleka,

Enggi nuan punggal,

Nyadi menya udah ga tu dikena aku ngansah perapang pedang temaga,

Enggi Mujah Buah Raya,

Enggi niang Ngumbang apai Lada,

Enggau enggi Bantin apai Rengga,

Lebuh nya bisa ku iya ari sia mata changka,

Laban lalu diujika sida Bujang Berani,

Dikena sida ngalahka segi kuta Raja,

Di nanga Batang Skrang.

Tang kelemai tu punggal,

Dikena aku ngansah terinting puting dabung seleka enggi nuan,

Ngambika nekis nyaris inggar didinga,

Disemaka aku ngagai serumbung panjung kapal Johara,

Lebuh iya ke ngundan Ranee bini Raja,

Mudik ke menua Batang Simanggang.

AI ANSAH TUKANG TUSUT

Nya alai tu dikumbai aku rantau panjai bidai belabuh,
Ngitar tunggal guntur gemuruh,
Ai taruh tu teruba tubuh,
Endang lama udah ditagaka dikena muka berinja dabung tingkuh enggi nuan,
Laban nuan ga udah dipaduka orang bejaku enda ulih ngasuh,
Kenu ku sida nuan teleba nusun ari pun buluh bauh teruba tumbuh ngelanggai tinggang.
Nya alai tu dikumbai aku rantau panjai bidai belabuh,
Ngitar tunggal guntur gemuruh,
Nya alai tu ai penuchi pengerak ati,
Lama udah dikandang di seregang balang seraie,
Diperenchitka mimit di chubit gelas bekaki,
Dikena aku muka berinja dabung gigi nuan punggal,
Awakka nyawa nuan nekis nyaris inggar bemunyi,
Indah enda munyi serumbung panjung keretaapi,
Kena kemudi lurus segi tanam tumpang,
Nuan ga endang dipaduka orang di lempedu kandang ati,
Tau nusun ari pun mula nyadi,
Teruba mereti tediri nyadi orang.

ai basu kaki – Ai tuak/arak bisa dikena nyibur pengabang udah sida terenah duduk.

ai beru sebayan – Ai jalung / buluh ti diirup maya Gawai Antu. Ai jalung diirup bala bujang berani ti udah kala bedengah lalu ai buluh tau diirup bala bujang berani ti udah ngirup ai jalung tauka sida ti ngirup ke aris.

Ai Limban – Menua ke dipansa semengat orang ti parai lebuh niti Titi Rawan dalam pejalai ke Sebayan.

ajar Bungai Nuing__Jaku ajar ka kasar munyi ka ngelanjur.

akar masar – Taring babi ti nyadi pengaruh. Iya mega suah disebut taring babi nyadi (disebut dalam leka main).

alah ayu – Sakit ketegal pengawa ti dikereja diri empu ti lunggar ari patut lalu tau ngujungka pemati.

alah bulu__ alah laban orang, taja pan gamal fizikal iya kering agi tauka sebaka enggau orang  ka dilaban.

alah nyadi amau (abu), menang nyadi arang__Belaya nadai ngenataika penguntung ngagai kedua-dua piak.  Cunto:  Laya antara anembiak redak sida iya serumah ketegal enda seati ba politik nadai ngemai penguntung ngagai sida, laban alah nyadi amau , menang nyadi arang, kedua-dua piak sama bela tebunsa laban enda serakup ngereja pengawa.

alah penemu__alah belabanka penemu, ketegal kurang penemu tauka penau ba siti-siti pekara, aka ba penemu politik.

alah sabung__1.  alah nyabung manuk, 2. Belaya ketegal alah disabung orang.

alah tulang__Alah pengering

alah tumi__Mabuk

alah uti__Alah bebuti, alah belaban penemu

ambai lalai__Sulu ati/pangan ka dipelalaika.  Cunto: Apai Aban bisi tiga iti talipaun bincing, talipaun siti endang dikena iya bekuntik enggau ambai lalai takutka ditemu indai Aban.

ambar mati__Pengaruh ka tau munuh nyawa.  Cunto:  Jubin bisi  ambar mati nya alai iya enda kala bejaku kasar tauka datai jari ba bini anak iya enggai ka tak kelanjur.

amu mata__Semua utai dikedekaka magang.

anak apai__anak ka enggai jauh apai

anak asi apai indai__ anak ti dikerinduka apai indai

anak indai__anak ka enggai jauh ari indai

anak kampar__orang datai

anak raja__pelangi, rainbow

anak raras__anak kayu ka agi mit

anak uting__Anak babi.

andau titi penguji__Titi rawan

anembiak __bala perayat

angam__Rangka, tumam, kuat makai enggai meri orang, amu

angkat Beketan__Orang/temuai ka lalu mulaika diri udah badu makai.  Cunto: Udah badu merarau tengah arinya bala raban parti penyakal tak angkat Beketan laban udah alah penemu laban kami serumah.

angkat engkarasak__Angkat ngenyit enggau enda bebah-bah, udah nya lalu nadai temu penunga. Cunto: Igat tak angkat engkerasak. Udah ka meri jaku tangkan ngagai YB ba ruai Tuai Rumah, iya tak angkat lalu nadai temu penunga.

angkat engkerawai__ Angkat sereta bebala mayuh, nadai tinggal siku. Cunto:  Tak peli-peli mata Tuai Rumah Engkaul, meda sida iya serumah tak angkat engkerawai ninggalka aum laban enda setuju enggau penemu tuai rumah ka ngemai sida agi nyukung YB ka udah lama ba nyadi pengari sitak sida lalu nadai meri pemansang.

angkut semut__Peda jaku banding

antu berumah di baruh dagu__antu enda ulih peda, tang iya ninga utai ka kitai

Antu Rua, antu rangka__Sebansa roh ti jai ke mai pengerua, pengerugi enggau pengerusak. Chunto sampi kena muru Antu Rua: ‘Nyah…, tu beri ngagai Antu Rua, Antu Rangka, Taban rinan, ngagai menua kita, Anang agi minta, anang agi nanya, Anang ngachau, anang ngeregau.

antu tudung dulang__Antu nyaru nyerupa baka mensia.

apin burung terbai apin rangkang patah, apin raung /kijang nyemerai apin ai  bah__Apin kitai datai/ngerja penyalah apin ga barang orang lenyau tauka apin ga orang bulih penusah.

aris__1. Peturun nitihka tusut. 2. Nampung pengawa enggau adat aki ini sereta turan ti diajar sida.

aruk-aruk burit kali, pagila lusa dudi ari__ Disebut; aruk-aruk burit kali, pagila lusa dudi ari, kami mesti malas penyai nuan nya.

arung beradung __Sengkapan dada ti disebut dalam leka main.

asai idung ukui__lauk, asi tauka pemakai bukai ka udah celap lalu endai nyamai diempa agi

asaika digenggam semengat__Nyaris-nyaris ka bebadi ka tau nabanka nyawa/ ngasuh mati.

asai ka diau di baruh punggu __Semampai irau ati tauka nangi laban penusah tau datai sebarang maya. Cunto:  Sekumbang pengawa bepilih Kunsil Nengeri tu kami serumah tak asai ka diau di baruh punggu, laban bala kami ka sampal nyukung parti penyakal, ni nemu nyangka perintah tak ngetuka projek anak manuk kami.

asai ka digerami atau__Begedi meda orang tauka hal-hal ka dipeda

asai ka dipandam dada__Tekenyit, kesal amat ati.  Cunto: “Nyau asaika dipandam dada aku” ka YB Engkerumong meda penyampau undi ka nyukung iya nyau tinggal-setinggal.

asai ka enda ngindik tanah __Rari empa penakut iya.  Cunto: Apin aku kala ngenakut nya, rari ka antu Kok Lir, asai ka enda ngindik tanah enda berasai kaki tesipak ke urat engkabang.

asai ka lepas ari nyawa baya__baru udah lepas ari penusah ka berat

asai ka makai peku getah__dagin ka kelalu liat, enda ulih kunyah

asai ka nadai darah agi mua__ kelalu takut, kelalu tekenyit, kelalu malu

asai ka semina ba idung aja seput ka agi__ ka luput tauka nyau ka lemas dalam ai

asai ka tiki darah mua __Pedis ati, ringat

asai ke dibuai empeleman (empeleman–uras/debu ka masuk dalam mata)__Berasai nyamai bendar, nadai pedis agi.  Cunto: Sekumbang jalai Ulu Krian udah tembu ditar, nayamai amat bekerita kulu kili, asaika dibuai empeleman laban belanja minyak enggau servis kerita nyau kurang agi ari suba.

asaika udah dibelit sawa__Pedis isi laban lelak gawa/bemain.

asi pana __ asi celum ka dikempuk diengkah ba duku lalu di empa orang tuai ka nanggam ulit. Penyampau kempuk asi pana bepanggi ba penyampau  “Tungkun Api” orang ka mati

asi udah disungkit sapa enggai makai? __Sapa-sapa pan enda enda nulak enti  pemakai  tauka pemanah bukai enti udah dinahka.  Cunto: Mimit pan nadai meh Apai Igat nulak penemu YB ka deka minta anak iya ka menantu, asi udah disungkit sapa enggai makai? Enya ka di ati iya ngelama tu

aum juak__Ngaku diri nyukung dalam aum, tang udahnya nulung orang bukai.  Ngumbang suah amat aum juak enggau Bantin, laban iya suah nanahka perintah maya ngayau Bantin.

ayam ribut__kayu digaga baka propeler bilun buah engkabang bepusin enti dipuputka ribut

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: