Nostalgia sinu ngenang.


Nostalgia sinu ngenang ka peransang anembiak diatu.

Mulaika pengingat.

1969 – Ada ba klinik menua ulu, ngam-ngam seminggu udah lepas Gawai Dayak.  Enti enda salah ingat aku derisa Ajong gawa ba klinik nya maya tu.  Laban ka anak ujung, enda ibuh ngangkatka nama aki ini ka sida apai.  Nya alai minta derisa ngagaka nama aku.

1972-1975 – Udah umur aku manggai 3 taun, nyau udah tegar bejalai kami endang udah dibai sida apai nangkal enggau bumai.  Kenyau ari mit kami sebilik endang ka suah agi ka diau ba langkau umai tauka langkau kebun ngambika semak alai gawa.  tambah nyamai ka apai, laban enti kitai suntuk nadai orang meda enda baka di rumah panjai.

1976 – Masuk Primary 1 enda baka anembiak diatu, bala apai indai nadai kiruh bebelika uniform: baju, tanchut enggau kasut laban tau ngena uniform (gari nipom, ka niang indai). Nya alai sepemanjai besekula primari endang enda kala ngena uniform ka lengkap.  Maya Primari 1 ngagai primari 2 tinduk enggau aka aku ba buding orang indu, laban agi mit enda nemu ngintu diri.

1976-1978 – Primari 1-3, maya tu kami agi ngemai beras ari rumah, seminggu 4 chupak siku. Dataika sari tu pan agi meh bala kami bisi berutang beras ba sekula.  Lauk; dagin enggau sayur ka fresh endang enda kala.  Suah amat kami belauk sadin ikan gulai daun changkuk.  Maya ujung taun, rami bala kami bedua sadin, bisi kedua ka udah badu sekula datai ke sekula ba minggu ka penudi, laban ngenyadika ampit bebagi sadin.  Sadin pusu enggau sadin babi injin ka kami kelia nyamai amat.

Dani pagi anembiak primari 4, 5, 6 nebas rumput, anembiak ka mit agi nyauk.  Lemai pan baka nya meh, semua anembiak lelaki terebas sebelah babas ngiga kayu api kena indai sekula berapi.  Anembiak sekula diatu, dalam mimpi pan nadai meh kala ngasaika utai ka baka nya.

1979 – Maya aku Primari 4 keterubah TV datai ba sekula kami, orang rumah panjai mayuh apin bisi. Rindu amat meda TV jerita A Man Called Sloan laban bisi staring negro siku kumbai kami Staring Pala Labi meda pala iya lasu. Empa pengerindu meda TV azan laut sembiang pan enda meh dikalihka, tambah mega nadai mayuh channel TV maya nya. Cherita cowboy, staring sherif Lobbo enggau Sisco Kid (sebut kami suba) enggau Combat endang seruran ka buah kenang kami maya nya, staring Vic Morro ka amat betimbak, tang Rick Jackson lebih agi ka ngena jalai psikologi. Maya ari Lima bisi Drama Minggu Ini, nyau baka ka dipadahka orang ka ari ili sekula kami, sanggup bejalai malam lebih setengah jam pengeka ka meda TV.

1980 – Keterubah ngasaika penusah pemati.  Ini kami mati ngenyit. Tajapan agi mit udah meh nemu reti sinu.  Niang ini, taja pan manggah tang pementas iya meruan di ati kami.

1981 – Peresa ujung taun primari 6 gaga amat ati laban bulih prais ai soya sekutak ketegal ka bulih lumur 12, sebedau tu endang jauh di belakang orang belama tang enda kala lumur enchit.  Aku mega rajin macha, tak keengka bup dalam jaku Bahasa Malaysia ka bisi ba Library sekula endang abis dibacha aku. Tambah mega ukai nya mayuh deh bup dia.

1982 – Keterubah meda pasar (bandar).

Hotel Ambassador tauka Otil Cina Atau, antara rampa pasar Saratok ti keterubah dipeda aku.  Seberai hotel tu bisi Restoren Golden City ka suah alai aku makai asi campur.  Nyamai amat asi campur manuk kicap enggau telu manuk setengah igi. Maya tu coca cola agi 90 sen sebotol, enti enda sala ingat aku.

Maya ba pasar Saratok, semadi menyadi tuai aku nyau ngerara baru aku nemu diri enda beselipar. Maya makai, ka amat engkining bala kuli king ka belabung mirah bebantaika barang Towkey Ting Say. Enti enda masuk (pom) trantition/peralihan nyangka tak apin aku meda pasar Saratok.

1985 – Seninjik Matematik ulih pass, enti enda pia enda ulih nampung ngagai Pom 4.   Maya tu enti pil Matematik, BM, Gerografi-Sejarah dalam SRP sigi enda ulih masuk Pom 4.  Di baruh nya meh gaya Kelas kami, Kelas 4F (1986) du ujung nyin. Besepiak enggau kami nya kelas-kelas Pom 3.

Maya tu suba anembiak ka masuk Pom Empat manah agi kualiti iya enti dibandingka enggau (sekeda ukai semua anembiak)  ka diatu, laban diatu pil semua subjek pan ulih meh masuk Pom Empat.  Tu meh ngasuh pala bala pengajar pedis, ukai pedis ngajar tang pedis nyaga disiplin lalu mejal anembiak belajar, sedangka sekeda sida tu endang nadai runding ka belajar.  Aku maya tu suba enti enda berunding panjai, tau anyut ditabanka pemeli diri, laban nyau nemu belabuh enggai masuk kelas.  Nasit manah Petara agi nyangkung.


 

 

 

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: