Glosari Terminologi Litaricha Iban


Pemuka Jaku

‘Glosari Terminologi Litaricha Iban’ tu disedia ngambika bisi nyadika malin belajarka Jaku Iban di sekula. Pengajar enggau nembiak patut nyikap diri ngena terminologi ti engkeman ngambika idea ti dikenataika nyentuk. Penerang ti meranggang tau bendar ngasuh batang penemu ti dipansutka ngelidas ari jelan ti patut. Berindik ari nya BPK (Bagi Opis Pengerembai Kurikulum) senaka ulih ngeluarka bup tu kena napi pelajar Jaku Iban kelebih agi ba sekula sekondari.

Ngena terminologi ti engkeman dalam tanggung pengawa ngajar enggau belajar endang beguna bendar. Pengajar diperansang nelusur reti leka jaku tauka rambai jaku dalam glosari tu ngambika sida ulih ngerembaika isi pelajar sereta betungkapka mesej kereban bacha sebedau nurunka penemu ngagai nembiak. Pengajar dikarapka ngambi chunto ti seriran engau konteks dalam daya idup, dikena ngangkatka pengelandik ngena jaku sechara kreatif.

Isi bup tu ditusun nitihka ripih urup. Iya ditapis ngambika semua orang ti nguna bup tu ulih ngiga reti leka jaku tauka rambai jaku ti dikedeka sida enggau jampat. Bup tu mega ditagaka enggau chunto ti dipilih ngambika nembiak ulih beratika penerang enggau silik. Bantu ari pengajar endang beguna bendar laban nembiak disadang sukar ngatika diri belematika reti leka jaku tauka rambai jaku enggau nyentuk enti enda disempulang enggau penerang ti bisi besangkut paut enggau latar daya idup bansa Iban kelebih agi dalam tusun pengarap enggau main asal .

Pengajar tau ngena timbang penemu sechara profesional kena nerangka reti ti deka dikenataika dalam konteks ti besenutuk enggau pekara ti nyadi. Ambika chunto, pengawa ‘ngalu petara’, ba sekeda menua pengawa tu nadai dikereja dalam atur gawai. Nya alai pengajar tau bejurai berindik ari pansik, ngaga banding tauka nerangka reti sesebengkah pengawa ba siti-siti menua nitihka peneleba iya empu. Disimpul enggau jaku pandak pengajar patut beratika maya pengawa nya dikereja enggau pelilih menua endur orang ti ngereja pengawa nya ngambika iya ulih meri reti ti nyemetak nitihka konteks.

Nembiak patut bebendar ngangkatka tikas pengelandik diri. Pemujur endang bepanggai ba semengat belajar ti tinggi sereta kaul antara diri sama diri. Pengeliat ati ti disempulang enggau pengelandik belajar, ngamal ukur ti manah enggau pemaiulah ti menuku patut dikembuan tiap-tiap iku nembiak. Belajarka penemu patut diperambu enggau menyana ngambika juluk ati ti deka bulih pengelandik bekomunikesyen ti tinggi serta niat ti deka neruska daya idup bansa Iban betambah tegap sereta ulih nyadi nyata.

Lebuh betungkapka penemu, senyata ti tajam endang beguna bendar dikena ngulihka penemu nya. Nya alai ’Glosari Terminologi Litaricha Iban’ tu tau dikumbai senyata dikena pengajar enggau nembiak mekuhka pelajar Jaku Iban di sekula. Pansik sechara emperikal patut bendar dikemeran ngambika asal bansa Iban meruan tegap nanjak arus dunya global. Ba rebak ke baru, jaku

dipanggai, pengarap dilempai ngambika semua bansa Iban sama-sama besukung ngangkatka pemanah bup tu.

A

abang – Pangkat dalam strata sosial etnik asal (Melayu) di Sarawak.

abang berayah – Tiang tengah ba ruai endur ngaitka duku.

abi besi – Tanda tauka kelai ti suah dikena bansa Iban nyadika entara temuda (tanah) iya nya baka belakang tanah, lebak, kayu besai, buluh, batu galang etb.

abi kaki, abi jari – Bekau pengawa ti udah dikereja orang ke dulu agi lalu nyadi teladan orang ke dudi ti bekaul enggau pengawa nya.

abstrak – Pekara ti semina ulih diasaika dalam ati, pikir enggau runding aja.

absurd - Pekara ti enda masuk akal, nyelai sereta enda menuku.

adaptasyen – Karang tauka cherita ti dibali ari chuan asal dikena beriranka iya enggau media bukai.

Chunto; wayang gambar Harry Potter nya adaptasyen ari novel Harry Potter ke ditulis J.K. Rowling.

adat - Daya idup tauka jalai pendiau sesebengkah bansa.

adat asal Iban – Daya idup tauka jalai pendiau bansa Iban nitihka kosmologi Iban.

Adat Iban nya adat ti nyadi lalau pendiau bansa Iban baka dalam Adat Iban 1993.

adegan - Gentura dalam kelulu drama ti ngepunka konflik tauka sebagi ari lumpar dalam drama. Dalam adegan bisi dikelala kelulu ti numbuhka konflik.

ai ansah - Sebengkah leka main dikena meransang, ngelancham ati enggau runding sereta muji orang ti deka diasuh bejaku.

Chunto:

Nyadi tu ai sempuli tanah nyadi,

Diberi Sempeti Api Raja Petara,

Dikena aku ngansah dilah sura nyawa, enggi nuan Unggal,

Ngambika jaku nuan lagi nyaris inggar didinga,

Munyi Nakuda kapal perang.

Aku ga meda pala nuan nyau repa umba tempuga kenyali banda,

Meda belakang nuan bendang-bendang tinggang seludang baju kasa,

Meda punggung nuan nyau penuh laban gelung rajut bisa,

Meda lengan kanan nuan Unggal,

Nyan enteran sangkuh temaga.

Nya alai tak chukup gaya nuan dipeda aku,

Patut nuan bulih ensumbar anak pesiri laki ular naga,

Suah nguluka orang ngipa di nanga mayuh besimpang.

Nya alai udah nuan ngirup ai tu lagi Unggal,

Nadai nya ngasuh nuan sulai lesi bebadi ilang nyawa,

Tang ngasuh tubuh nuan teguh ari selama,

Ngasuh isi nuan lagi tan berujanka leka meriam bom nuklear,

Ukai enda lebuh tembai orang begawaika igi rirai balang begumba,

Endang nuan dipaduka ngirup ai tuntung jalung bisa,

Laban nuan endang tampak rita sekayu menua Sarawak mansang.

Enda semina naka nya,

Enti lebuh orang ngintu hari pengada Tuan Gabenor,

Dia nuan pansut pegari nama,

Diberi iya tanda nerima bintang.

 

ai basu kaki - Ai tuak/bisa dikena nyibur pengabang udah sida terenah duduk.

ai beru sebayan – Ai jalung/ buluh ti diirup maya Gawai Antu. Ai jalung diirup bala bujang berani ti udah kala bedengah lalu ai buluh tau diirup bala bujang berani ti udah ngirup ai jalung tauka sida ti ngirup ke aris.

Ai Limban – Menua ke dipansa semengat orang ti parai lebuh niti Titi Rawan dalam pejalai ke Sebayan.

akar masar – Taring babi ti nyadi pengaruh. Iya mega suah disebut taring babi nyadi (disebut dalam leka main).

alegori – Cherita tauka leka main ti ngeluluka ulah mensia ti ngundan reti besilup.

Chunto: Baka cherita Kumang Nupi Sawa.

aliterasyen – Munyi konsonan ti betandu ba siti-siti baris ayat dalam karya. Munyi konsonan nya tau ba pun tauka tengah leka jaku.

Chunto:

i. betemekup munyi baya butang;

ii. asap melap menuhka menua

iii. gansai buluh bala Indai Bilai

alonim - Nama orang bukai ke tebilang ti dikena pengarang ba karya sida.

alusyen - Sebansa jaku kelaung dikena muji tauka nyindir ngena jalai ti alus.

Chunto:

i. Baka Kumang.

ii. Baka rumah Bunsu Bubut.

ambiguiti - Mai mayuh reti, pelaba tauka jangka.

ambivalen - Asai ati siku-siku mensia ti beserekang pasal orang tauka pekara.

Chunto:

Rebak sida ke tuai agi mayuh ambivalen pasal pengawa lama; ketegal pengawa nya mai mayuh penanggul ba dunya moden tang tusah dilengkaka laban sida udah tebalan enggau chara idup tradisional.

amfibologi - Ayat tauka jaku ti bisi dua iti reti bebida.

amplifikasyen - Penerang tambah dikena ngelenakka karang kreatif.

anafora – Leka jaku ke beulang ba pun ayat tauka baris. Tuju iya endang dikena ngemanahka munyi lalu meri pengelentur ti senipak enggau buah kenang dalam penerang tauka entelian.

Chunto:

i. Udah labuh peluh laban antuh;

Udah parai mensia lenyau nyawa.

anagogi - Jurai pasal reti leka jaku, rambai jaku tauka teks ti kudus, spiritual sereta mistik.

Chunto: Batang Mandai. Dalam leka sabak Batang Mandai nya menua sebayan. Menua tu chukup manah sereta kudus alai pemulai semengat orang ti udah parai.

Batang Mandai (Ngerara Menua Sebayan)

Peda nuan pemanah gilik tasik nyerupa,

Peda nuan pemanah pengkalan

Tak gendam-gendam lapis singkap papan segala,

Tangga laka ti ngena dipeda numpu ke nanga.

Peda nuan pemanah parit,

Beempit-empit jalai raya.

Peda pemanah jalai tak bebesai buka tiga,

Peda pemanah padang tak gegenang

Dibandung batang pinang laka.

Peda pemanah semin batu beringkat,

Baka lipat tikal setera.

Peda pemayuh polis baris mansang jaga.

Peda pemayuh soldadu,

Beribu-ribu chukup bansa.

Peda pemayuh kerani

Duduk dikerusi megai kunchi kira-kira.

Peda bala tuan tak betatam duduk bechara.

Peda nuan tali tendu

Ngibun pun puchuk ensuna.

Peda nuan pemanah tali dawai,

Tak bejurai ke pantai Api Rupa.

Kubau ke giau-giau tinggi Astana,

Beatapka singkap batu bata.

Tengah laman bandung tembuan kampung bunga.

Di kaki tangga engkahka chura gambar singa.

Lawang tetukang berimbai dua,

Diengkahka sentaka, sedia nganti mansang.

Nya ga Astana Sultan Tuan Raja,

Peda pemanah menira iya

Ke taja remba-remba ke tanda megai orang.

analogi – Jaku banding tauka sempama ti dikena nyemaka gaya enggau pendiau.

Chunto:

i. Angkut semut – analogi dikena nyemaka pengawa ti dikereja enggau chara

pupuk dataika tembu.

anekdot – Cherita pandak ti manah sereta ngelugi.

Chunto:

Rentayan cherita Apai Salui. Cherita Apai Salui tu mayuh bendar rentayan lalu ditusui nitihka pengelandik orang ti becherita. Watak lurus pintar Apai Salui mengkang disebut dalam pemayuh bengkah rentayan cherita ti sama.

antanaklasis – Leka jaku tauka rambai jaku ti diulang tang mai reti ke bebida dalam ayat tauka beberapa baris ayat tauka entelian.

Chunto:

Buah pengerindu seduai iya nyadi buah jaku orang mayuh.

antitesis – Leka jaku ti betimbal reti ke dikena ba sebaris ayat ngambika empas retorika ulih diasaika.

Chunto:

Indu lelaki, tuai biak, mit besai endang diambi ngabang magang.

antologi – Karang, leka main tauka cherita ti ditulis siku orang tauka lebih ke digumpul lalu

digaga nyadi siti bup.

Chunto:

Gempung Jerita Tuai Bansa Iban nya siti antologi ti dikeluarka Pegari Iban

Production.

antonim - Leka jaku ti belaban reti.

Chunto:

chelap – angat

antu pala – Pala munsuh ke udah disalai. Dalam leka main antu pala tu suah disebut ngena nama bukai.

Chunto. i. igi balang.

ii. igi rirai balang begumba.

iii. leka begumba balang begundai.

iv. leka begumba balang bedabung.

v. leka begumba igi ranyai.

vi. leka balang berang.

vii. leka begumba balang begeman.

viii. leka begumba balang bedai

ix. leka begumba balang bedagu

etb.

Antu Rua – Sebansa roh ti jai ke mai pengerua, pengerugi enggau pengerusak.

Chunto sampi kena muru Antu Rua:

‘Nyah…, tu beri ngagai Antu Rua, Antu Rangka,

Taban rinan, ngagai menua kita,

Anang agi minta, anang agi nanya,

Anang ngachau, anang ngeregau.

apresiasyen

Belematika pemanah elemen estetik dalam siti-siti karang enggau pengabis ati.

aris -

i. Peturun nitihka tusut.

ii. Nampung pengawa enggau adat aki ini sereta turan ti diajar sida.

arung beradung – Sengkapan dada ti disebut dalam leka main.

asonan – Munyi vokal ti betandu ba siti-siti baris ayat dalam karya. Munyi vokal nya tau ba pun tauka tengah leka jaku.

Chunto:

Mimpi meda kaban semawa enda jena-jena,

Betekua ngelingi takang.

audien - Orang ke meda, macha tauka ninga sesebengkah asil karya, baka orang ke meda kelulu cherita, ningaka radio enggau macha jerpan.

autobiografi - Cherita tusun pengidup penulis ti ditulis iya empu.

alah ayu – Sakit ketegal pengawa ti dikereja diri empu ti lunggar ari patut lalu tau ngujungka pemati.

B

balang bedai – Antu Pala ti diserayung ngena pua kumbu ‘Punggang Ampang Bali Menyeti’ ba pandung lebuh Gawai Burung.

batang enteli – Munyi patah sebut ti disadang berima ba ujung ayat dalam entelian jaku tapis tauka leka main.

benda basa – Bansa benda ke diberi nyadi ke adat dikena masa orang ti benung ngulit.

Chunto: mungkul, jabir, panding, etb.

belelang – Bejalai ngagai menua bukai ketegal ti deka ngiga penemu, pengeraja tauka ketegal pengeringat tauka ketegal pengasa ati.

berangan balut – Mantaika leka main ti enda nitihka atur tauka rurun ketegal ti enda tentu nemu (ngerichau).

biau – Sebengkah leka main invokasyen ti dikena ngenataika peminta ngagai Petara.

Chunto:

O.. ha, O..ha, O..ha,

Aku ngangau, aku nesau,

Aku ngumbai, aku ngelambai,

Aku madah, aku nelah.

Kita ari langit sampal datai meraka tuchung,

Kita ari ili mudik sebuah barung,

Kita ari ulu undur sebuah bangkung.

Aku ukai ngagau ngapa, ngagau pia

Piring lapan, piring semilan,

Piring penganan, piring penyaram,

Piring tujuh, piring penuh.

Udah sedia, udah nyengenda,

Di tikai wi, tikai peradani,

Di tikai rutan, tikai bemban.

Kami minta embap, minta chelap,

Minta gerai, minta nyamai,

kami minta bidik, minta lansik,

Minta betuah, minta belimpah.

Bejual bebeli kami bulih duit, bulih ringgit,

Bumai kami bulih puli, bulih padi,

Ngambi kami raja, nyadi mensia,

Betuchung kami baka bukit,

Ngebung baka langit,

Gayu guru, gerai nyamai nguan menua.

 

biografi – Karang pasal tusun pengidup siku-siku mensia ke ditulis orang bukai.

bombastik – Leka jaku ti besai bendar seregah tang reti iya balat belebih enti dibandingka enggau reti iya ti bendar.

buah jaku – Leka kenang tauka batang pekara ke dikenang.

bunga/bungai lepang – Sebansa leka main dikena nimang tauka merindang anak mit.

Chunto:

Lepang-lepang bebunga lepang,

Liut-liut daun entemut,

Puputka ribut sabung petang,

Lepang-lepang bebunga lepang.

Lepang-lepang bebunga lepang,

Aya Uman selalu bejalai malam,

Ngiga pangan peransang tulang,

Lepang-lepang bebunga lepang.

 

bungai jaku – Gerinek jaku ti dikena nerangka pemanah elemen munyi ti ditambahka enggau pemetul empas leka jaku dalam karya tauka lebuh maya bejaku.

buai batu

i. Enda ingatka semaya

ii. Badu ngundang/beguang

burung/beburung – Bansa burung ti nyadi peduman dalam daya idup Iban. Pengawa Iban ti belalauka burung tu disebut ’beburung’.

Kelia, lebuh ngereja pengawa bansa Iban bepegai ngagai tunjuk ajar Tuai Burung. Tiap-tiap bansa burung tu enda sebaka padah; burung manah ngasuh pengawa mujur tang burung jai nagang pengawa dikereja.

Bansa burung bisa ti nyadi peduman dalam daya idup Iban nya ditusun baka tu:

Iban – English – Nama Saintifik

i.      Ketupung Rufous Piculet Sasia abnormis (alarm cry)

ii.     Beragai Scarlet-rumped Harpactes Trogon duvauceli

iii.    Papau Diard’s Trogon Harpactes diardi -(Kelabu/Senabung) (alarm cry)

iv.   Bejampung Crested Jay Platylophus  galericulatus

v.    Embuas banded Kingfisher Lacedo pulchella

vi.   Pangkas Maroon Woodpecker Blythipicus (Kutuk) (alarm cry) rubiginosus

Vii. Nendak White-rumped Shama Copsychus  Malabaricus

Sekeda bansa burung enggau jelu ti tau dikena beburung iya nya:

i.      Burung Malam

ii.     Beriak

iii.    Raja Burung (Kung/Kuang Kapung)

iv.   Tuchuk

v.    Kijang

beburung -  Beburung tu pengawa dalam daya idup Iban ti pechayaka animisme.

butang antu – Butang enggau orang ti apin diambi tebalu tauka orang ti agi ngulit.

butang basah (nyentuk) – Butang nyeruga tauka terang. Pengawa salah udah nyata dipeda sereta disangkaika enggau darah manuk lalu dipansutka butang.

butang besangkung – Lelaki ngelalaika identiti diri tauka madahka diri bujang lalu butang enggau bini orang. Udah tebantai pengawa dia identiti iya ditemu orang. Lelaki nya deka betimbang nyangkung indu nya setengah ari tunggu iya.

butang betampik (homoseksual/lesbian) – Butang enggau orang ti sama seks. Indu beleman enggau indu

butang betumbang – Beleman enggau lelaki tauka indu ti ukai laki tauka bini diri empu.

butang enggau bini diri – Tama ke kibung napatka bini ti udah dulu nindukka diri ninggalka temuai ti enggau berandau. Temuai agi dedugau nganti iya ti pansut enggau berandau baru. Pengawa ti enda manah nya tau ditunggu temuai nya. Tunggu patut diisi ngena sesingkap mangkuk batu. Mangkuk nya ditangkupka temuai ba pucuk tuga/ tunggul tauka kayu ti entakka tuntun punggung ba tengah laman rumah pesalah nya tauka endur ti dipansa mensia mayuh agi kandang kair manuk ari rumah pesalah. Tunggu nya dikumbai Apai Salui Belabung Jalung.

butang ilum – Butang ketegal ngilum pinang ke laki tauka bini orang.

butang ngambu – Ngambu tauka ngaku diri bisi butang enggau bini tauka laki orang tang nadai chukup penerang. Iya ti ngambu nya aja ti ditinggang penyalah.

butang ngeladang – Lelaki tauka indu kampar butang enggau laki tauka bini orang ti alai iya diau.

butang perarang – Butang ti enda terang tauka nyata ti ngujungka orang melaki bini sarak. Mayuh agi beserak enggau ninding pangan diri.

butang rangkai

i.      Udah terang butang tang apin bulih tubuh pangan

ii.     Lelaki tauka indu ti nundi bini tauka laki orang ti enggai ditundi. Iya ti nundi nya salah kediri.

 

butang tinchin – Butang enggau tunang orang ti udah nerima tauka dipelepa ngena tinchin.

butang uduk – Butang enggau rambang diri. Rambang iya nya endang udah belaki tauka bebini baru, udah ti sarak enggau iya.

C

chai juai – Sebengkah ari main asal anak mit dikena sida merindang diri lebuh maya bebakih. Tiap iku nembiak ti ngambi bagi ngengkahka tunjuk antu besenutuk ujung enggau enggi pangan diri. Tuai main lalu nyebut leka main tu sambil negu tunjuk jari siku-siku. Sapa empu tunjuk ti ditegu iya kepenudi nya deka pampam. Reti leka jaku pampam nya ningkapka diri ba tikai enggau mata pejam. Lebuh tu orang bukai teruan. Iya ngangau kena nentuka bala udah terenah teruan. Udah orang bukai nadai nyaut agi iya berengkah ngiga endur sida teruan. Sapa dulu temu, nya mih nganti iya pampam. Main tu nadai tatak pengelama tang bepanggai ba pengerindu sida.

Chunto:

Chai juai belabung binjai,

Pancha ruga gendang nyala,

Ai sudik benung mantik,

Tanam rian buluh bala,

Tibak adung kelambung duku,

Indai Migang Indai Migu,

Din siku ditu dua.

chenaga -Pengawa mela tauka ngintu rumah, tanah enggau ti bukai ari pengamah tauka penyai.

Chunto:

Nyenaga Tanah (taba alai berumah)

Bechuanka atau babi kena ngabas taba endur deka berumah, enti atau babi jai dia tanah nya enda tau alai berumah laban endur nya angat tauka berantu.

cherita – Bansa karya ti betukuhka leka main enggau prosa.

cherita sains – Karya (fiksyen) ti ngundan pengamat penemu sains.

cherita sejarah – Karya ti ditengkebang belalauka fakta sejarah.

cherita asal – Karya ke nerangka pun penatai tauka penyadi utai ti bekaul enggau pengidup mensia, jelu enggau tempat baka cherita asal, Padi Ribai ditulis A. Alli Majang.

cherita dalam cherita – Cherita ke dicheritaka watak dalam karya.

cherita jelu – Karya ti ngenang ulah jelu ke diberi ulah baka mensia. Cherita tu tau nyadika lalau sereta teladan ti manah baka cherita Jelu Nubai ditulis Micheal Buma.

cherita antu – Karya ti ngayanka pengawa antu kena mekuh pengelikun ulah mensia baka cherita Antu Raya, Antu Kamba enggau Antu Kelansat.

cherita jenaka – Cherita ti ngayanka ulah mensia ke ngelusu, pintar, pandai enggau ngelakar lalu ngundan elemen humor baka Apai Sali ditulis Harry Nyangoh.

cherita lama – Cherita ti ditusui ari serak siti ngagai serak siti baka Engkeratong Ayam Raja, ditulis Lionel Frederick Mawar.

cherita nyelai – Karya ti mantaika ulah nyelai, ngenakut sereta ulih ngeruga ati mensia ketegal pengawa ti ngelipak ari jelan selama. Cherita tu nadai ngembuan asal penatai ti bebatang baka cherita Keling .

 

cherita rumpas – Karya ti mantaika elemen ti jai, baka konflik gender, pemanggar tauka pemula enggau pengasar baka Aji Bulan ditulis Andria Ejau.

cherita rayat – Karya tebilang ti ditusui ngagai sesebengkah raban bansa. Dalam cherita bansa Iban, nyengkaum cherita lama, cherita antu, cherita jelu enggau cherita beambai baka Danau Alai ditulis Mervyn Skipper (disalin Gerunsin Lembat enggau Pancras Eddy).

 

cherita pandak (jerpan) – Karya ti ditempa kena ngenataika siti-siti mesej tauka pekara ke ngeruga runding sereta bisi ngundan elemen drama.

D

dandi (bedandi inda-inda) – Main anak mit kena merindang diri empu. Anak mit betayun ba wa sambil nyadaka leka main tu.

Chunto:

Ka aku nyapit dit,

Ruai sebelah kilah nya dit,

Takutka Rintik bedama Ala,

Bedandi inda-inda dit.

Ka aku nyapit dit,

Ruai sebelah kilah nya dit,

Takutka Gupi anak Kana,

Bedandi inda-inda dit.

 

danjan – Parai, mati tauka lesi.

danji - Semaya tauka sempekat

darah getah – Purih tauka tiris pantis ti agi nyempil. Ba bansa Iban, kaul ti bansa tu endang meruan dikingat ngena tusut. Nama diangkat nitihka peturun/serak, dikena bansa Iban ngetanka kaul peturun diri.

darah mang – Darah ti ngasuh ati keru lalu seruran bemunsuh.

denjang – Sebansa pengap ti dikereja ba pengujung Gawai Ngemali Umai, Gawai Batu, Gawai Pangkong Tiang etb. Lebuh lemambang bedenjang, iya muji sereta ngajihka orang ti didenjang iya kaya raja, bulih pangkat; iya ke lelaki tampak rita jelai nama, iya ke indu gerai nyamai sereta bulih orang ke menyana enggau ngidupka diri. Bisi dua bengkah denjang;

i. Denjang Indu

ii. Denjang Lelaki

Chunto: (Denjang Indu)

….Nya alai malam nya nuan bisi mimpi,

Mimpi betemu enggau Intan Kumang Inja,

Mimpi betemu enggau Lulong bini Laja,

Udah nya baru nuan digagaka sida,

Mengua karung berada nuan,

Panggau ke begurau tuntun dada.

Disamak enggau belabak jayau bunga,

Nya alai udah nya sida Serian pen bisi ga

Mai pesan nusui berita,

Sida Lawas pen bisi ga ngabas deka ngelala,

Sida Sibu pen bela sampal nemu

Ari ulu datai ke nanga.

Orang Layar pen bisi ga datai ngampar,

Mai bekal chukup tengkira.

Nya alai mayuh orang nuntung nuan endu,

Digendung papan segala,

Tang ka siku dibai nuan berandau,

Mungkauka kukuk manuk banda,

Enda ga nya sengapa iya,

Endang orang ke pugu antu kalu menua,

Laban nuan ke endang ngiga orang,

Ke bisi kereja sedia makai gaji.

deklamasyen - Chara ngenatai tauka nyadaka leka main.

deksologi - Jaku pemuka sesebengkah asil karya lama/ klasik.

depersonafikasyen – Gaya jaku ti betimbal reti enggau personafikasyen. Personafikasyen nya sebansa bungai jaku ti meri ulah enggau pendiau mensia ngagai objek tang depersonafikasyen tu nuduhka mensia nyadi objek tauka utai.

Chunto; (dalam leka sabak.)

Aku pulai ngagai asal, nyadi tanah.

Ngagai orang di Genting Tinting Tambai,

Rintai tangkai kayu regang.

deram - Munyi ti inggar sereta bedauh dalam; baka munyi guntur betigung.

derian - Adat ti diisi lelaki diletak nitihka pinta indu dalam pengawa melah pinang. Dulu menya, derian diisi ngena antu pala, tawak tauka tajau. Pemesai derian endang bepanggai ba status orang nya ba masyarakat. Kemaya hari tu, derian diganti enggau mata duit.

deru/derut – Madahka penginggar munyi.

Chunto:

Munyi deru guntur betigung.

dinding bulu – Pengaruh ti dikembuan kena nyaga diri ari kena empa pengaruh orang bukai.

dungai - Sebengkah leka main pemerindang ti selalu dikena bebuti lebuh maya gawai.

dunju – Langkau arau.

dut - Getar tauka dauh pangkung setawak.

denotasyen - Leka jaku tauka rambai jaku ti ngundan siti reti.

deskripsyen - Penerang ti lenak ngambika pekara ke dicherita dalam karya mudah diperati, diasai, didinga enggau nyemetak.

determinisme - Pechayaka semua utai ke nyadi nya endang udah nasit tauka diatur Petara.

dialog - Randau antara dua watak tauka lebih dalam karya.

didaktik - Ajar tauka lalau pendiau ti menuku.

didaktisisme - Elemen ti meri ajar dalam karya litaricha.

dikotomi - Bida dua raban tauka pekara ti beserekang.

diksyen - Milih sereta ngena leka jaku ti seriran enggau konteks ngambika mai reti ti nyemetak.

dilema - Beselak tauka tusut runding nentuka pemutus.

disfemisme – Leka jaku ti kasar kena nganti jaku ti alus dikena ngemediska ati orang.

distikon - Leka main ti ditulis dua baris setelian.

dokmatis – Kih enggau runding diri tauka prinsip.

doktrin - Ajar agama tauka pengarap ti nyadi prinsip enggau malin pengidup.

drama – Karya litaricha ti dikeluluka ngena dialog ke dilakunka ba panggau.

dramatisasyen – Karya tengkebang baka novel enggau jerpan ti dibali nyadi drama .

drama puitis – Drama ti ditagaka sereta dipandangka ba panggau ngena leka main.

drama satira – Drama ti dikenataika ngena chara sindir.

E

edisyen – Chara ngira penyuah bup dichelak.

efek - Biuh runding, emosyen enggau spiritual ti dikenataika penulis ngagai ati sereta runding orang ti macha karya iya.

eksposisyen - Teknik ti dikena pengarang ngepunka cherita ti alai iya ngayanka watak, plot, tema etb.

elegi - Leka main ti mai serabana sereta penyinu ati ngagai orang ke udah ninggal baka dalam leka sabak serabana.

elipsis - Sebansa gaya jaku ti ningkil tauka ngelengka sekeda leka jaku tang nadai ngubah reti ayat.

Chunto:

Aku deka nemuai ke Kuala Lumpur.

Aku ke KL.

embap - Nadai penusah tauka penyakit

Chunto:

Chelap embap: gerai, nadai pemedis tauka penyakit.

empalai - Umai.

empalai kasai – Genteran timang gawai burung ti pemadu tinggi lalu pengabis dudi dikereja.

emperaja mata – Ambai. Sulu ati.

enchabuh arung – Gawai nikika pala munsuh ti baru ulih ngayau.

engkabai - Tibang mit.

engkalan jaku – Jaku ti nadai begantung tauka dipelalaika.

engkubang - Pengawa nyerungkai belalai.

enteli - Munyi ti senimbal ba ujung baris tauka genteran leka main.

entelian – Stanza tauka renggat dalam leka main Iban.

ensera – Cherita tempa ti ditusi, dibacha, tauka dikanaka orang.

ensumbar – Gela ke diberi ngagai bujang berani.

Chunto:

Libau Panggau Dara,

Rentap Tanah Rentap Menua.

 

epanortosis – Pekara ti disebut ngena chara betanduka leka jaku dikena pengarang negapka reti ti deka dikenataika tang udah nya iya ngubah penemu diri empu tekala nya. Chunto:

i. Aku mih orang ti keterubah. Ukai!, Ukai! Nuan mih orang ti keterubah.

ii. Kala aku ninga rita nya. Enda! Enda! Cherita bukai.

 

epanalepsis – Sebansa jaku tauka klausa betandu ba sebarang endur dalam ayat.

Chunto:

Ku Jang “Bulan beganti bulan, bedau ga pengawa kitai tu kemas”.

epifora - Leka jaku betandu ba ujung baris ayat.

Chunto:

Enti deka ngambu,

Tau ga ngambu,

Tang anang baka ambu kayu tebelian punggu,

Jadika sulu nganjung parai.

epigram - Penerang rumpas ti meri lalau pengidup ngena jalai ti alus ke bisi dikena dalam leka main. Sebengkah sempama ti ngena entelian pandak.

Chunto:

Enti bejalai betungkatka adat,

Enti tinduk bepanggalka pengingat.

 

epik - Sebansa cherita naratif ti panjai ke ditulis enggau chukup pemanah sereta bepelasarka cherita Bujang Berani.

epilog - Jaku simpul pengarang ti ditulis ba ujung karya.

episod – Sebagi ari peristiwa dalam cherita ti ulih bediri kediri.

epitet – Jaku ti dikena nerangka gamal orang tauka pekara. Penerang deskriptif tu dikena ngelaungka pendiau orang tauka pekara ke dipadah.

Chunto:

i.      Kesulai nutu bungai ti benung ngerembai.

ii.     Gemian ikan banta nyambut jerua ai kembai,

ii. Pesilar ular sudu nyambut pupu pasang lemai.

eponim – Leka jaku tauka nama ti diangkatka ari nama orang ke tebilang.

era - Maya tauka jeman (era 60-my, – maya/ rambau taun 60 menya )

erotesis – Gaya jaku begembar enggau tanya sereta peragam saut ti nyemetak. Iya suah dikena dalam asil betulis tauka pidato kena pengarang ngulihka efek ti dalam lebuh nekanka fakta tang enda begunaka saut tekalanya. Gaya jaku erotesis tau mega disebut gaya jaku tanya retoris lalu dalam jaku nya bisi diperagamka saut ti patut diberi.

Chunto:

Nama ke semetap munyi ngitar,

Nama ke betengah munyi kapal,

Eh…. Nya nyawa anak uda, anak mensia,

Nyawa anak laki anak mensali.

erotika - Karya litaricha ti betemaka elemen gidan tetenguk, beraie sereta merampau.

estetik - Penemu pasal pemanah enggau pengalus jaku dalam karya.

eufemisme – Jaku silup dikena ngelipakka leka jaku ti kasar tauka nyentuk.

Chunto:

Udah nadai dikena madahka orang ti udah mati tauka parai.

 

F

fantasi - Cherita ti ditempa ngena imaginasyen sereta jauh nyelai ari pendiau ba dunya nyata.

farsa - Bula ketegal udu diumba lebuh nyebut utai. (Datai ari jaku Latin)

fiksyen – Karya tempa ti betukuhka prosa tauka leka main baka novel, jerpan, ensera etb.

filologi - Pansik saintifik pasal struktur, pemansang sereta kaul jaul jaku enggau litaricha.

firasat - Pengasai ati lebuh sesebengkah pekara deka nuntung tauka nyadi.

formalisme - Sebengkah rapat tauka chara pansik litaricha.

fragmen - Sebagi ari elemen dalam karya litaricha.

futurisme - Arus litaricha ti berubah ari arus tradisional ngagai arus moden

G

ganu – Sebengkah leka main Iban ti dikena bebuti kelebih agi kena nyambut temuai.

gaya - Stail ti dikena pengarang ngemanahka karang.

gaya jaku – Chara nusun leka jaku ti ngundan elemen estetik.

gajai - Sebengkah buah anyam tauka tenun.

gagau – Sekuh tauka pengeringga ke enda patut.

galai - Sama reti enggau gali.

galui - Melangkan.

gambi – Gamal mua ke betingkat laban kelalu gemu tauka besai.

ganchil jari – Jampat jari ngayah tauka enchuri utai orang.

ganchil mulut – Galak bejaku, lanchat betanya tauka besadungka berita .

ganggam - Besai sereta tegap.

ganja - Leka jaku ke suah dikena ngaga enteli dalam leka main.

Chunto:

Ganja ai bisa ngasuh mata enggai ngantuk,

Ganjai ai nyamai ngasuh gerai enda tinduk.

 

gawai - Pengerami besai dalam daya idup Iban.

gelana - Pengidup ti tebunsa ketegal penusah tauka bebadi.

geliga – Jaku tangkan tauka lalau maya bisi pengerami.

Chunto Geliga:

Nya alai tu, baka nya ga Punggal,

Tak berasai gaga aku meda bala kita,

Ke betatam mayuh bebala,

Deka niki ngagai penyurai rumah raya,

Enggi kami di gelenggang Batang Sebangkui Jaya tu,

Tang aku tu enggai enda bejaku seleka dua,

Laban udah dipaduka sida ti empu pengawa pun kereja,

Nyebut geliga jaku tangkan.

Nyadi enti kita bisi mai sunti mai teguli,

Anang sekali-kali kita mai iya niki,

Ngagai peretang rumah lelenggi enggi kami ditu,

Uji anjung kita ngagai menyaung tuchung Bukit Garu tinggi,

Endur mayuh jelu engkuli,

Ngambika jelu engkuli tak tejelepi parai teduduk.

Enti kita bisi mai penungkam gayung dalam,

Nya pen enda mih tau dibai niki ngagai peretang

Rumah nyapan enggi kami ditu,

Uji anjung kita jauh-jauh ngagai menyaung tuchung Bukit Kayu Malam,

Endur mayuh jelu jugam,

Ngambika bala jelu jugam abis lesi bebadi laya danjan,

Badu nyengkuran ngerumbak sampuk.

Pia mega, enti kita bisi mai emperegam bisu kumpang beduju,

Anang mih kita mai niki ngagai peretang penyarang

Rumah merundu enggi kami ditu,

Uji anjung kita ngagai ulu langgai Kantu,

Ngambika kayu temesu di ulu langgai Kantu tak punggu mati puchuk.

Baka nya mega, enti kita bisi ngembuan ambar mati ngeli antu gerasi,

Anang sekali-kali kita mai niki ngagai peretang rumah menchegi kami tu,

Uji anjung kita ngagai menyaung tuchung Bukit Seligi,

Kena munuh jani jelu babi,

Ngambika jani jelu babi nadai agi neriang ubi tisi panduk.

Nya alai pemerani, anang sekali-kali ditusi,

Laban iya tau ngasuh bedengki mungkal laya.

Dengah enda tau dipadah,

Laban iya tau muka kubah bungai pemula.

Pengeraja anang dicherita,

Laban kemaya tu pengeraja ukai semina ulih ari tuah.

Nya alai enti pangan diri nadai ruti, anang ngelanyah,

Nyangka Tambi nadai hari begaga ripang.

Enti pangan nadai gula, anang serebana,

Nyangka China nadai daya alah beperang.

Enti pangan nadai asi, anang ngeransi,

Nya ga tanda umai kudi padi banggang.

Enti pangan nadai penganan, anang rawan,

Nyangka Iban kiruh beranyam garung gitang.

 

genre - Bansa tauka tukuh asil karang litaricha.

gemala - Sebansa batu ke perenching ti bisi kuasa ajih.

H

haplologi – Pakan leka jaku ti nyadi ba sekeda jaku, iya nya lebuh dua patah sebut ti sama munyi disebut sekali aja.

Chunto:

garing-garing nyadi gegaring;

redup-redup nyadi reredup;

kesap-kesap nyadi kekesap.

hiperbola - Umba tauka kelangkung leka jaku ti dikena madahka siti-siti pekara ngena chara ke balat bendar belebih ari pematut ti dikena meri tempias estetik.

Chunto:

Peluh baka tengkujuh ujan sehari.

homograf -Leka jaku ti sebaka sepil tang enda sebaka sebut.

Chunto:

i. mata ti mai reti siti ari rengka tubuh mensia

ii. mata, iya nya apin mansau.

homonim – Leka jaku ti sebaka sepil sereta sebaka sebut tang enda sama reti.

Chunto:

i. mulung nama bagi sebansa utai tumbuh.

ii. mulung pengawa ngumpul buah.

humanisme - Gaya pengidup ti ngemeranka pemanah sereta pengelikun pendiau mensia ti menuku sereta menyana.

humor – Elemen jenaka ti tau ngelugi ati.

I

idiom - Raban jaku ke ngembuan reti ti bebida ari selama.

Chunto:

i. Ngandung di betis. Reti iya nya lelaki ke nama diri ngagai indu.

ii. Labu banggar. Reti iya nya bula.

ilusyen - Seremang ati tauka runding ti enda disadang datai.

imaginasyen – Sagam ati dikena nyengkuran idea bepelasar ba sesebengkah imej tauka chara.

imej - Gambar dalam ati tauka runding ti konkrit tauka abstrak.

imejan - Ngena imej ke bendar ari dunya asal.

Chunto:

Sungai, kayu, bukit, burung etb.

imitasyen – Konsep ti nganggap sesebengkah asil karya diasilka ari pengawa ti bechuanka asil karya ti dulu.

implisit – Reti isi sesebengkah asil karya ti enda diayanka ngena chara ti nyata (besilup).

indu asi, indu ai – Indu ti pemulih padi, reta tengkira sereta ngembuan pengelandik ngidupka diri.

inspirasyen - Daya pengentap sereta pengering runding pengarang dikena nempa sesebengkah karya.

inti pati – Pekara ti nyadi kah sesebengkah asil karya.

inuendo – Jaku sindir tauka entis.

inversyen - Rurun leka jaku ti tunsang ari selama.

Chunto:

i.      Patah dan enggau dan patah.

ii.     Jai ati enggau ati jai.

ironi - Jaku ti ngembuan reti ti betimbal enggau reti leka jaku ti disebut.

Chunto:

i.      Bulih endar sida nya nyetik, bulih kenyalang bulih enggang. Reti ke bendar sida nadai utai ulih.

ii.     Enda ibuh belajar mih nuan anak ngambika nuan pandai jemah ila.

J

jaku denotatif – Jaku ti nyengala sereta bebatang.

jaku figuratif – Jaku ti bebungai-bungai dikena ngelagu pekara tauka orang.

jaku karung – Jaku berambai dikena ngemanahka rurun leka jaku ke bebungai sereta besenimbal. Jaku karung nyerangkung semua sempama, jaku kelaung, jaku silup, jaku sema, jaku sebar enggau leka main ti bukai.

jaku ngare – Jaku ti mudah lalu dikena besehari-hari.

jargon - Leka jaku tauka rambai jaku ke dikena sekeda raban orang ti mar diperetika orang bukai.

Chunto: ‘stool ‘ – dalam jaku bidang perubat reti nya tai kitai mensia.

jawang - Sebengkah leka main Iban dikena bebuti lebuh bisi pengerami

Chunto: (Jawang Puji)

Endai tinda, naka pengesal aku dijungkal kandang dada,

Nerantangka punggang dabung seleka,

Tak enda munyi tungguk dara,

Nyabakka perenama la bulan mingkai,

Aih…la jawang wai.

jenaka – Leman estetik ti ngelugi lalu ngasuh ketawa.

jambai – Leka utai ti ditabur sebedau pengabang niki maya gawai antu

jamban - Sebengkah ari adat basa ke dikena bansa Iban ngatur orang melaki bebini

lebuh pengerami melah pinang ba sekeda endur di menua Sarawak.

jejuluk - Gela ke nyeremin ulah, perangai enggau pengawa siku-siku watak dalam asil karya.

jayau - Pugai pengasih ti dikena bujang dara nganta tauka ngulihka pangan diri.

Chunto:

i. Batu gula – pemanis ngasuh tampak sereta manah dipeda.

ii. Batu maram – pemanis ti ngasuh orang tepaut ati enda lama.

iii. Batu singut – pemanis ti ngasuh orang tekuing ati beputar runding.

jedian - Enda rua.

jelungan – Pengelebu tauka pemuntan ketegal ulah diri ti nakah, jaku ti chabul lebuh pengawa ngasu beburu, nubai mansai ba menua ti agi latung.

jeman - Takah maya.

Chunto:

i. Kelia tauka menya.

ii. Jeman taun 60.

jereki - Nasit manah tauka tuah.

jeritan – Burung ti nyadi nyerumba maya pengawa ti dikereja berengkah. Ba pengarap Iban burung tu bisa, dia pengawa nya diketu kemaya nya tauka enda dipenyadi. Enti dipajak tau mai pengerusak ngagai orang ti empu pengawa. Iya tau diintu tauka diperurus ngena atur ngintu/ makai burung bisa.

Chunto:

Peda pimpin enggau raup.

jerukan atap – Adat pemeri ngagai anak mit ti bedau tumbuh ngeli ke terubah nemuai

tauka tama ngagai bilik orang, kena nyeliahka ari renga-pedera.

(Chunto: sesingkap pinggai, chabi, beras etb).

jurai – Pengawa ti berurus tauka betukarka penemu dikena mutarka siti- siti penekul.

K

kaligrafi – Seni ngasilka tulis jari ti manah ke bisi ukur estetik.

karikatur - Gambar ti dilukis dikena mandangka ulah mensia enggau niat ngelese.

kayau anak – Kayau ti dikereja ngena chara nerubuk tauka beripaka munsuh ba sebarang endur enggau maya.

kebuah enggau empas – Rurun pekara ti nyadi bepelasar ba kebuah enggau biuh dalam rurun plot karang estetik.

klimaks – Pemantup konflik dalam siti-siti cherita.

konflik - Dua bengkah kuasa tauka watak ti beserekang ketegal pekara ti enda seriran.

konotatif - Jaku ti ngundan mayuh sagam reti.

Chunto:

Bidik – reti nya benasit.

Bidik – Bidik endar ga nuan, kengka ke enggau kami ngasu nadai ga utai ulih.

kontradiksyen – Gaya jaku ti besakal enggau pekara ti disebut.

Chunto:

i.      Amat nadai bedilang nadai jangkang mih kami ditu,

Tang nyelai bendar, tak tau bisi asap ke menyadi repuk-repuk,

Amat nadai ruai nadai balai mih kami ditu,

Tang bala temuai bisi ga alai duduk.

ii.     Aku tu amat ga dipeda bisi lengan tang pandak jari,

Enda ulih enggau kita bepegai di puli tali merunda.

Bisi betis tang pandak kaki,

Enda berani aku enggau kita beuji-uji niti tali lalau nyemerai.

konvensyen - Atur tauka gaya sereta tusun litaricha ti endang udah diterima orang mayuh.

konsonan litaricha – Tandu munyi konsonan dalam leka jaku ke ngundan vokal ti bebida.

Chunto:

Daun limba-limbi,

Ikan lumba-lumbi.

kreativiti - Pengelandik nengkebang ti nyelai sereta ngelui ari asil orang bukai.

kronologi - Tusun peristiwa ti nyadi nitihka rurun maya.

kuta pentik/engkeramba – Kuta ti diaduka ba tengah laman rumah ti deka ditiki lebuh pengerami nikah.

kuta pengelalu - Kuta ti diaduka ba pala tangga ti dikena nganti bala pengabang.

klise - Leka jaku ti selalu dipelunjakka lalu ngujungka jaku nya enda popular.

L

laba - Jelu ti nyadika burung ti tau mai nasit manah tauka jai.

laba nganjung – Burung manah. Laba nganjung tu burung nganjung tuah.

laba nyubuk – Burung jai. Iya nunjukka tanda orang deka datai bepadah sakit tauka mati.

lamba - Kayu ke agi mit ti benung mansang bebandung enggau kayu ti udah besai tauka bisi kah.

Chunto: lamba tebelian

landu - Jampat mantul ngereja pengawa.

langgai -

i. Ulu sungai/entigis sungai.

ii. Sebansa kayu ti deka sama enggau kayu engkabang.

iii. Ujung kemudi perau.

iv. Ujung lelanjang.

v. Iku manuk/ burung ti panjai.

langgak -

i. Ngirup berumban tauka sekali nuntum.

ii. Bukit ti renjan/tebiang/lidih.

langgar -

i. Ngelaluka penatai pengabang/temuai ngena chara meri ngirup ai bisa, ai tuak tauka ai bukai lebuh maya sida ke bejalai niti rumah.

ii. Berengkah nyerang.

langgu -

i. Antin, engkerabu enggau lukit.

ii. Buah ti agi muda.

langkang -

i. Rangkai ketegal kemarau panjai.

ii. Suntuk.

langkung – Orang ti galak diumba/dipuji.

lanjan –

i. Sakit ti tau ngasuh parai tauka sakit raya.

ii. Sebengkah gendang ti dikena manang tauka dukun sebedau berengkah belian

tauka berubatka orang sakit.

lanji - Leka jaku ti suah dikena dalam leka main kena nerangka pemajik gamal enggau pemanah raras tubuh.

lanting - Reta pesaka ti diungkupka ngagai orang ti ngibun bilik tauka orang tuai nyadi ke pemai bilik tauka tubuh.

lap – Perangai mensia ti suah enda sekena.

lasit – Deras tauka laju.

latar – Penerang dikena madahka maya, endur tauka tempat enggau raban bansa.

latar maya – Maya sesebengkah pekara tauka peristiwa nya nyadi cherita.

latar tempat – Endur tauka tempat peristiwa nya nyadi.

latar raban bansa – Ulah, pengawa, pengarap enggau ti bukai dalam sesebengkah raban bansa ti dipandangka dalam siti-siti cherita.

latung - Menua ti agi kudi.

layu - Pendiau orang ke tebunsa ketegal alah ayu.

lebu - Munyi ujung genteran leka main dikena ngaga pemanah enteli.

Chunto:

i. lebu bedaja/asa

Enteli genteran leka main ti beujungka munyi a glottal.

Nya alai enti sema kita ngasuh aku

Nyakang pasang indu bena,

Dulu aku madahka diri enda,

Laban aku tu ukai penyikar landik bepencha,

Kaki enggi aku tu enda tentu tau bekenji suah kejingka,

Mata enggi aku tu pen enda tentu ngelala lansik meda,

Indah bejalai dih aku tu tak suah gapa-gapa,

Nangi endar aku tu enggaika diri tak tejula lalu telentang.

ii. lebu nagai

Enteli genteran leka main ti beujungka munyi ai.

Aku agi ngengkahka batu tanduk gajah

Mati tulah tengah jalai,

Nya ga karung gemala,

Lua naga panggum beluai.

Bisi dibai kitai nandang nurun nandai,

Bisi dibai kitai ke menua Batang Ai Gegiai,

Beri kitai ngagai sida ti gawa main begawai,

Ngambika peda sida din ila mua pemesai-mesai,

Nyadika ubat pengeraja pemandang ruai,

Pemandang tikai, tau ngumbai utai,

Ke Pematak barang.

iii. lebu nangi/ asa nyeni

Enteli genteran leka main ti beujungka munyi i

Nya alai tak berasai kesal meh aku ti jungkal kandang ati,

Aku ti bediri di tengah bala rami,

Patut malam tadi wai menyadi tak bisi nyangkut jai mimpi,

Pasuk aku tanchut, peda runggut kena changgut resam ransi,

Pasuk aku baju, peda tak enda manah linsu kurang bichu tabak dubi,

Pasuk aku jam, peda tak teganggam gerah kunchi,

Pasuk aku selapuk, peda tak pesuk kena tebuk bara api,

Pasuk aku kasut, peda kasut enggi aku tak merurut setukin gerah tali,

Nya meh kebuah aku tak sanggu mansutka jaku ngarika bala kami.

 

iv. lebu ngambat

Enteli genteran leka main ti beujungka munyi at.

Dinga tak ketawa udu balat,

Nerais penapat inat,

Sida melanyi bujang sigat,

Betatika paji papan disukat,

Ninga gumi sida dara mereti ke udah magi diri

Ari sida mengandai karung menyimat,

Kumbai pugai, batak minyak belabak dara biak,

Bujang orang Tengalat ngambu diri datai bejimat,

Datai ngundang naka pampang simpang Bulat.

v. lebu ngidan

Enteli genteran leka main ti beujungka munyi an.

Dinga tak ketawa depan-depan,

Sesikuk batuk nerakan,

Sida melanyi bujang ganggam,

Batak belabak minyak jayau jematan,

Ninga gumi sida dara mereti ke udah magi diri

Ari sida mengandai karung menyimpan,

Nya bujang orang Kerian betati keran,

Datai nyagam ngumbang tiban Nanga Kumpai.

vi. lebu nginak

Enteli genteran leka main ti beujungka munyi ak.

Kubal saharitu udah ditangkal diambi pak,

Kebun ambika chelak,

Enggaika kena jaku orang Kubu

Mayuh udu banyak serak,

Kedengki sungai enda tau ditubai,

Parai jelawai ikan tengadak,

Kumbai orang beliung lajung

Simpak mata sepiak,

Dikena mubuk tebelian landak,

Ga, iya kedengki diuding sing atap burak

Pedis udu mangkang menua Ulu Baleh sepiak,

Nyamai agi mangkang menua Ili bebatu lemak.

vii. lebu nyangkung

Enteli genteran leka main ti beujungka munyi ung.

Nya alai perapang pedang bejengkung , tu Unggal,

Keba enteran sangkuh agung,

Dibai kami ngabang mansang ngindung,

Bejadika nanyi bunga belitung,

Ti deka melah pegagah pinang peradung,

Ngagai kita di batang gelenggang Pasai matung,

Tu ukai duku ngapa duku sepia, tu ga duku

Enggi aki kami ke lama udah rimpi dulu pumpung,

Enti agi menya endang disadang dikena iya nyerang Batang Kayung.

Kena gasan iya mangku luan indu bangkung,

Dikena iya berebutka telinsu nyiur nyintung,

Tang kenu ku timang sida mengandai tangkai kerubung,

Ukai nya telinsu langgu nyiur nyintung

Nya ga leka begumba balang beradung,

Ke benyawa kaung-kaung

Mesanka kerubung tangkai menginang.

viii. lebu ngadang

Enteli genteran leka main ti beujungka munyi ang.

Dia nuan digalika Indai di tikai bebuah bekebirai

Baka bungai jelumpang tumbang,

Dibumbu enggau kumbu bali tengkebang,

Dibamah enggau buah pinang mekang,

Disembur enggau chekur pemantuk burung rindang,

Dia nuan ditelentangka indai nuan dalam dulang tapang,

Lalu diretat enggau ubat seribu sakang,

Lalu digagaka pedara lima piring kelingkang,

Dinga lalu begigit tawak mit ngilah jerit tatai bintang,

Aih, peda lelenggi dih Meni datai ari dalam ai

Menyadi Beriak Bujang Sepuchuk Benang,

Ada lelanji Kunchi Hari mai sugi ngentudika lepi sanggul lintang,

Jejindung Mabong begagung kulit tegung remaung lubang.

ix. lebu ngambu

Enteli genteran leka main ti beujungka munyi u.

Enda aku busung laya pambu,

Miauka selanjau ijau manuk kelabu,

Ba mua kita ke bekechanguk duduk gempuru,

Dikena miau pamping piring padi runtu,

Laban aku endang nitihka ajar nampung jaku,

Enggi niang aki kitai ke benama Rekaya Chabu,

Nya endang orang ke ngemeran ke adat tuai dulu,

Nemu endar bejaku, nadai kala saru bekalih tunsang.

x. lebu ngining/ lebu empating

Enteli genteran leka main ti beujungka munyi ing.

Deka nuan diasuh aku

Ngambi Sengalai Lai Muking?

Enda ninga aku,

Pia ku aka Bungai Nuing.

Enti di asuh nuan

Meling sukung manding,

Mutai ditali jingan beempan tubuh ramping,

Aku nganjung tatau isah kingking,

Ngagai tengah laman Kayau menua Ping

Datai din ila aku entiring, Gunting ngempurung aji.

lebuan - Pengenap tesati nerangka pemayuh setawak, lambar pua kumbu enggau tikai.

lelangan – Umbak ti nyadi beduduk ari fenomena baka bena tauka pangka ribut.

lengayun – Jaku siru dikena nyebut sida ke indu.

lengayan - Jaku siru dikena nyebut sida ke lelaki.

lelenggi – Nengkadah tauka malik ke atas.

lelenuk – Nerangka pemajik.

lelingut – Gaya pejalai ke leliut enggau kekimut.

lemambang - Orang ti nemu ngangauka leka main.

Lemandau – Petara Iban benama Tutong ti pandai ngambuh ke beensumbar Tutong Ulop Demong Bujang Lemandau Gendang, Lemandau Kesindau Lama Bujang.

Lempai - Manggaika jaku tauka minta penemu ngagai orang.

lidi - Chara alus tauka siru dikena nyebut lelaki dalam leka main ganu.

lintang batang – Kuta basa ti digagaka ba ruai di tengah rumah maya bisi pengerami nikah.

lelinang -

i. Nerangka ai ti enda rarat.

ii. Nerangka gaya ai mata ti begenang sebedau labuh bekeberai.

linda - Panchar mata hari ti nyau deka padam.

lindap - Ayung tauka enda tampak panchar mata panas tauka orang ke dara ti nadai kala dipansa bala bujang.

lis i. Gaya buk ti dipisin manah sereta likun.

ii.  Gamal kulit ti lichin sereta alus.

litotes – Rambai jaku tauka jaku sebar dikena ngelalaika penau diri.

Chunto: Makan bai kita makan ga aku, tang meh aku tu apin nemu makan rutan anak,

Ngambuh bai kita ngambuh ga titihka aku, tang bedau ga aku tu nemu nukuh pedang besampak. (Janang Ensiring 2006: 27)

Lua Limban -

i. Antu Rua.

ii. Nyemaka orang ti tegar makai.

luchuk – Jaku silup madahka orang ti alah ba siti-siti pengawa tauka orang ke punas.

lumba lumbi – Bini Raja Nabau ti ditiu dalam leka main.

lung – Sebansa indu utai ti bemunyi dalam babas .

lupung – Sarang dikena manang nyimpan kereban kena berubat/belian.

luya – Pendiau indu ke tebunsa ketegal diayah tauka dibasau orang ke bujang.

luyang – Pengawa numbak lubang ba tanah.

M

mangkung tiang -Gawai ti didirika dikena ngelai pemindah ngagai rumah baru.

meayu-ayu – Orang ti sakit lama lalu nadai tentu dikarapka tau pulai gerai. Belayan tubuh orang ti sakit bakatu makin lama makin kusut dataika nyawa ditaban parai

melah pinang – Pengawa rami bejadika orang belaki bebini.

mesodiplosis – Jaku betandu dalam baris ti beturut-turut.

Chunto:

Bisi aku enda mih tampak,

Nadai aku enda mih rawak

metafora - Jaku banding terus ti dikena ngemanahka karya.

Chunto:

i. Mirah kesumba

ii. Chelum kanggan

metonimia – Jaku karung ti bekaul enggau reti pekara ti disebut.

Chunto;

i.      Petenah nya tajam ari mata duku.

ii.     Jaku iya bisa.

miga -Gentilang remang.

mimesis - Ngasilka karya bechuanka ulah enggau peristiwa ti amat bisi nyadi di dunya tu.

mitos Jerita - tauka ensera ti dipelabaka amat nyadi.

monolog - Bejaku kediri berandau nengali.

monolog dalam ati – Bejaku dalam ati.

motif Batang kenang ke nyadi pelasar ti ngidupka jalai cherita.

motivasyen – Peransang ti nyadi berindik ari peneleba watak enggau lalau pendiau dalam karya ke dibacha ti ulih nyadika teladan dalam pengidup.

N

naratif – Ngarang karya sechara prosa.

Chunto:

Novel , Jerpan, Cherita, Ensera Pandak, Drama etb.

naku – Nyangkah antu pala lebuh maya nirika Gawai Burung, Gawai Sandau Hari tauka Gawai Enchabuh Arung.

Chunto: Leka Taku Antu Pala

Aih! Ngambi agi!

Ngambika aku sigi agi!

Aih! Nambah!

Udu pemalu aku naku antu pala lama rangkah,

Enda meda bedau bedarah!

Malu aku, wai sulu,

Naku antu pala lama.

Jentang Indu aku inang

Ada balut pukat empelawa.

Aih! Ngambi agi!

Ngambika aku sigi da!

Aih! Nambah!

Malu aku, sulu, aku naku

Antu pala rangkah.

nampai -

i. Ngulihka runding kena ngaga siti–siti karya.

ii. Meda tauka merening.

nyangkah - Langkah tauka chara bejalai mai antu pala lebuh naku.

nengkebang - Penau tauka pengelandik ngasilka karya tauka pengawa nyelai ari asil bukai.

ngading -

i.      Proses nyendia enggau mela piring.

ii.     Ngenang lalu nyerita pengawa ti suah dikena dalam jerita, ensera tauka sekeda leka main.

ngalu Petara - Pengawa ke bejalai bebala mayuh niti ruai dikena nyambut penatai bala petara lebuh maya gawai. Pengawa tu dikereja bebida nitihka menua. Tu sebengkah ari chara Ngalu Petara ke suah dikena di sekeda endur ba bagi menua Betong. Siku tuai (pungka lelaki) matak bala iya bejalai niti ruai. Ripih sida ti bejalai nya baka tu. Siku orang mai setunggul (menira) matak jalai, ditangkanka pungka lelaki (tuai), dientudika enggau dua iku indu, siku mai rendai lalu siku mai piring lalu ditangkanka raban bukai ti bengepan sekalika indu tauka lelaki. Raban ti kepenudi nya sida ti begendang tauka betabuh. Lebuh tu rendai ditaburka sepemanjai ruai lebuh sida bejalai. Orang ti empu ruai deka nanya kebuah sida bejalai bebala mayuh. Tuai ti matak bala bejalai niti rumah deka nyaut tanya ninting iku orang ti nanya ba tiap-tiap belah ruai sepemanjai rumah. Pengawa ke bejalai niti ruai tu dikereja tiga kali besundang.

Chunto:

Tanya: Nya alai tak rindu bendar ga tu punggal,

Bayam kita ti bejalai niti penyurai rumah raya,

Meda sida ke tuai udah kepai-kepai nyan setunggul menira raja,

Meda sida ke indu betegunu ngena ngepan chukup gaya,

Sida ke lelaki udah betekenji nyingkang sereta,

Bala nembiak nyau udu pengeragak-ragak mangkung tawak

Ngambi nyawa wuk empeliau dara.

Nya alai enggai enda nanya,

Kita ti bejalai tu dih punggal,

Ngiga burik kesa tauka banda pipit antu,

Bejalai pia aja, tauka endang meruan tuju?

Minta kita nyara meh tu,

Ari ni panyun bedaun, senggang betunjang, nibung bepandung?

Enti utai tu semina inang kamba inang selua,

Manah iyar ke tisi buang ke lubang,

Tang enti iya inang Keling Bungai Nuing, Laja Bungai Jawa,

Ngambi kitai sama empu, sama emparu.

Saut: Nyadi … kami ti bejalai betubuh mayuh tu,

Ukai bejalai ngapa, bejalai pia,

Tang kami tu bisi padah bisi kebuah,

Madahka petara udah datai, udah sangkai,

Sida iya mai ubat serangkap genap,

Mai pengaruh gembar tubuh,

Ngasuh bumai kitai bulih padi,

Ngasuh bedagang menang bebeli,

Ngasuh gerai nyamai

Lantang senang nguan menua.

ngayap – Pengawa lelaki ti agi rumpas nguang indu dara lebuh malam hari enggau pengarap deka madu pengerindu. Pengawa tu dikereja enggau pengabis basa. Bebasaka bilik penaik indu, sida sebilik tang lebih agi indu ti empu tubuh.

ngambi ngabang

Udah aum gawai tembu, rumah ti diambi ngabang pen udah mega diputuska, dia dua iku orang diasuh ngambi ngabang ke ulu ai lalu dua iku mega ke ili ai. Kelia sida ti ngambi ngabang mai temuku tali enggau piring. Timpuh ngabang nitihka penyampau temuku tali. Tiap-tiap hari temuku tali nya tadi dibuka datai ke maya nurun ngabang. Suah agi, timpuh enam hari puang lalu hari ketujuh gawai nyadi. Lebuh kandang tu pengabang nyendiaka diri ngabang. Nyadi ba rumah ti begawai nya sehari apin gawai nyadi bini tuai gawai mai bala indu bukai nyendiaka perengka ti bakatu; Asi (asi pulut kuning enggau chelum), penganan, lauk, ai (tuak) enggau bansa pemakai bukai naka ulih diri empu.

ngelembung – Pengawa seraban lemambang ti nandu leka main ti udah disadaka tuai lemambang tauka pematak jalai. Penyampau sida ti ngelembung tu tau tiga ngagai tujuh iku orang.

ngelumpang asi – Pengawa nyendiaka asi pulut nyadi beram tuak. Lebuh tu gendang rayah dipangkung tiga renggat. Asi pulut dichampur enggau ragi lalu disimpan dalam tajau; sekurang-kurang iya dua minggu nya baru beram nya mansau.

ngelalau - Pengawa ngelalau tu dikereja udah tembu ngerandang jalai. Tuai Gawai tauka pungka lelaki ti dikarapka ba rumah nya deka berayah niti rumah ‘ngelalau’. Ngelalau reti nya nirika lalau (sechara imageri) kena nyaga bala lemambang ngambika sida nadai kena penusah lebuh nimang.

ngempas (nuntung)- Klimaks ba leka main –  Nandaka leka main nya udah sangkai.

ngerandang -

i. Pengawa orang ke dulu nentuka jalai ti patut di tengah.

ii. Tuai lemambang ti matak raban iya mantaika leka main.

ngerandang jalai –

i. Berayah niti ruai tiga kali besundang. Pengawa tu dikereja kena ngupas jalai ngambika semengat bala lelambang ti deka nimang nadai utai ngachau.

ngeraran - Raran nya endur ngelulun tauka mansuh asi pulut. Lebuh ngereja pengawa tu tuai gawai miauka manuk niti ruai kena nesau sida serumah pengawa ngaga raran berengkah. Raran digaga muak ke ulu rumah panjai. Maya ngaga raran gendang rayah dipangkung tiga renggat.

ngerintai tuai – Siti ari renggat pengap ti dikereja lemambang lebuh maya gawai. Ba pengap sida ngerintai Tuai Laut, Tuai Dayak, Tuai Antu enggau Tuai Gelong. Ba pengap sida lemambang nyebut tauka nusun pengelandik tiap-tiap iku tuai.

Chunto:

i. Ngerintai Tuai Laut

Nya baru giut-giut mambung di laut,

Puputka ribut diguyang gumbang,

Nya baru ngerintai tuai laut,

Ke disebut nama Abang,

Ni nuan Patinggi Datu Julak,

Ke enggau kami ngintu,

Leka begumba balang simpak,

Nuan ga sidi dijari tunjuk anak,

Tau netak buah temedak,

Sesetak nyadi anak lantang orang…

ii. Ngerintai Tuai Dayak

Nya baru aku ngangkatka sida ti lama udah parai,

Tinggang lantai kelalin jarang,

Nya baru aku nyebut tuai

Nama Sera Gindah ke ngaga tanah,

Bisi ningkah, bisi nunggang,

Nya baru aku nyebut Sera Gindi ke tau ngaga ai,

Ke bepati mayuh bepampang.

Nya baru aku nyebut tuai,

Nama Sera Ginda ke tau bedua hari antara siang.

Nya baru aku nyapa Lau Mua,

Mungkal Nanga Batang Sekerang.

Nya baru aku nyebut tuai benama Langkup,

Tuai Undup dudi jadi dulu setamang…

iii. Ngerintai Tuai Antu

Nya baru riu-riu mambung di batu,

Ni Nading Panas Kuning,

Baka perenching bunga besi,

Nya ga Sepit Api Gila Gundi,

Pengetis kaki simbang terabang.

Bejalai selilit nisau langit besabung gelang,

Nya berada apai nuan Keling Aji,

Ke berani tau serang,

Tuai orang di Panggau Libau,

Menua luchak lunyau,

Kena biau jila isang. ..

nimang – Ngangauka leka main ngena serengut nyawa. Lebuh nimang seraban lelambang deka mantaika timang sida lalu bejalai besundang niti ruai. Ba sekeda bansa timang bisi mega awak endur sida duduk nunga orang ti empu gawai. Ambika chunto, lebuh bedenjang (denjang indu tauka denjang lelaki).

nimang pantar – Nimang pantar tu dikereja ba malam sebedau gawai nyadi. Lebuh tu, lelambang deka nimang ruai/ balai ngambika nadai pulaika penanggul tauka penusah lebuh gawai nyadi.

novel - Karang cherita ti panjai (lebih 10 ribu leka jaku) ti ngundan mayuh watak, konflik, peristiwa, enggau latar.

nyambut orang nasak - Nyambut penatai Pugu Berani ti dipaduka megai piring. Pugu Berani ditanya sekalika iya bisi ninga burung jai lebuh serantau jalai iya mansang ngabang. Enti sema iya bisi ninga burung jai, dia tiga belas gelas tuak deka disediaka kena nabarka burung nya. Pugu Berani ti megai piring nya deka ngirup enam gelas lalu tujuh gelas deka diirup Tuai Gawai. Tuai gawai lalu bebiau munyi tu:

Chunto:

Aku miauka manuk tu,

Minta ngagai petara,

Ngasuh kitai tu gerai nyamai lantang senang,

Nada apa nada nama,

Enti burung kita jai,

Ba manuk tu mih iya tepantup magang.

Enti burung kita manah

Manuk tu ngasuh iya manah agi.

nyaru -

i. Pengawa mali diri nyadi orang bukai. (Chunto: Keling mali diri nyadi Engkeratung).

ii. Maya ikan ngaban tauka ngempaska kamai mansutka telu.

nyeradak – Ngelanggak ai irup tauka tuak. (suah dikereja lebuh ngirup ai pengayu)

O

oksimoron - (Peda ngagai leka jaku ironi)

onomatop - Leka jaku ti nyau deka sama enggau munyi tauka sada nyawa. Chunto:

Munyi utai ti mereding disebut reding-reding.

P

padung –

i.      Peninduk orang lelaki ti digaga ari atas panggau.

ii.     Tempat alai jelu enggau ular diau.

pagar api – Kereban ti didirika manang di ruai sebedau iya belian.

pali - Nama petara Iban kelia.

Chunto:

Aya Kumpang Pali- iya suah nulung orang ti tusah.

pampat (gendang pampat) – Sebengkah tabuh ti semina ngena ketebung. Lebuh gendang pampat ditabuh dia Orang Panggau deka nurun ngabang. Gendang Pampat tu sama kategori enggau Gendang Rayah lalu semina tau dikereja enti bisi piring diayanka. (ketebung ti dikena datai ngagai tujuh igi, ditempap besaut-saut)

pamping -

i. Jaku kaling sebut enggau piring.

ii. Paung tauka tambak.

pana -Pemakai ke ditaga ngagai orang ke ngulit.

panah-Dipadu tauka diasuh.

panggul -Kereban piring kena minta jereki sebedau ngepunka pengawa bumai ba tanah ti ditaga alai bumai.

pang kelipang -Sebengkah ari leka main anak mit.

panjap -Adat bebunuh babi di kaki tangga dikena nyambut penatai pengabang.

pantang -

i. Pengawa ti enda tau dikereja/penti.

ii. Jaku terus terang.

iii. Ngelantak paku.

iv. Ukir ba tubuh.

 

pantar Penyurai – Ruang penuduk temuai ba ruai.

pantun Sebengkah ari leka main ti dikena bebuti, meransang tauka merindang pengabang tauka pangan diri lebuh maya bisi pengerami.

Chunto:

Melan semelan tanah enggau lintan

Lalu aku ngaga emperian enggau kita, Sidan,

Ngenang bujang sesinu ngenang,

Nadai nyayau nya aku meda Kubu Seputin,

Udah pechah cheremin penuduk Tuan,

Dipandam Iban belayaka rega batang.

Dinga kita bansa Iban,

Orang Putih bansa Beritan,

Kita ke ngembuan diri di bilun

Nurunka ambun nali kelindan,

Ga, kekayang kita soljar mansang beperang,

Bepasangka senapang bedil meriam,

Enggaika Malaysia alah menua,

Komunis bunuh abis dalam utan,

Sereta aku bejaku enggau kita wai,

Datai di bejenggai ai beram,

Enggau kitai niki ke langit

Ngeringka Iban.

para - Endur nyalai tauka endur engkah kayu api atas dapur kayu.

paradoks – Gaya jaku ti belaban reti enggau fakta ti nyata. Paradoks tau mega dikumbai pekara ti ngembuan pengamat.

Chunto:

i. Rumah nya besai tang nadai orang nguan.

ii. Dara nya bajik sereta ngembuan pemandai tang tak baka pulau pantak pulau

engkerawai.

paralelisme - Ngulang baris tauka leka jaku ti dikena nekanka reti jaku ti diterangka dalam ayat.

Chunto: Sunggaka singit rarat jerit bintang tiga

Sunggaka tungkup semetup darup guntur begerancha

pebayu - Ambai tauka sulu ati.

pechal - Pichit ngena gerempung ujung tunjuk jari

pelian – Leka main manang kena ngubat orang ti sakit.

Chunto:

Raja Petara bela ngemata

Seragindah bela madah,

Ngemeranka subak tanah lang.

Seragindi bela meda

Ngemeranka ai mesai buluh

Gerunung sanggang.

Seleledu bela meda

Ngemeranka jumpu mesai jugu

Jambul Bejampung.

Seleleding bela meda

Ngemeranka tinting rurus pematang.

Selingiling bela meda

Ngemeranka pating sega enseluang.

Segunggung bela meda

Ngemeranka bungkung

Mesai benung tajau bujang.

pelandai karung

Sebengkah ari leka main ti bekarung kena ngenang sesebengkah pengawa.

Chunto:

Geli sageli dua tiga hari,

Utai tak enggai badu geli sageli.

Nemu nya nama lindung nangi,

Utai tak enggai badu geli sageli,

Dua tiga hari tak geli sageli.

Keba urat diambi rechap Manang Menani,

Keba bandir diambi Suil Apai Basi,

Tengan Batang diambi Ngumbang,

Dan panjai diambi Nangkai Apai Duri,

Puchuk lenuk-lenuk

Nudukka Aki Ungkuk nabu tali.

Dan pating diambi Keling ke ubat berani,

Jari kiba sua aya,

Simpulang Gana ke ubat padi,

Jari Aki Suil Apai Basi,

Aki Ngumbang sigi orang berani,

Udah ngibun Asun diambi Tuan Adi.

Keba kemari ninga ruik anak babi,

Enda nyadang Amang mumpung kenyalang,

Keba tiang betelegang nadai pakai api,

Orang gawa nirika sandau hari.

pelandai ara – Sebengkah ari leka main ti dikena bebuti lebuh maya bisi pengerami.

penyengkuran (persoalan) – Pekara bukai ti dikenataika pengarang dikena nyangking tema.

pu alu - Sebengkah ari leka main anak mit.

pugai -Sebengkah jayau

pantis – Jaku kaling sebut enggau tiris. Sama reti enggau suku juru.

papa

i. Nama antu gerasi.

ii. Ruang bilik ti nadai orang nampung ketegal nadai purih tauka ketegal orang ti nampung biliknya senika pendiau tingujungka biliknya abis reta tengkira.

pedang – Sebansa senyata tajam. Bekabih enggau ilang tauka nyabur tang iya panjai agi.Sebengkah ari bansa duku.

Pechunggai-  Tunjuk jari.

pedara -

i. Piring.

ii. Palan alai berapi maya nganjung antu.

pedera – Ngelu pala ketegal ditanya antu sebayan.

pejuh – Tesat tauka pejalai ti kelalu jauh.

pajuh – Ngiding tauka ngerujak. Sebansa ari jaku sakarsme/ jaku kasar.

palan -Endur/alai.

paralipsis -Gaya jaku tauka formula ti dikena madahka reti utai ti disebutnya enda nitihka reti/tuju ti bendar.

Chunto:

i. Iya muji nuan?

Endang amat iya muji nuan!

Muji pengelansang nuan!

ii. Kenu ku nuan iya rinduka nuan

Amat bendar iya rinduka nuan?

Iya semina rinduka duit nuan

Ukai nuan! –

paronomasia – Leka jaku ti sama tang manggum reti ti bebida nitihka konteks iya dikena.

Chunto:

Padi sida – Jubong udah mansau tang apin diketau ketegal pisa apai Jubong nyau mansau .

pelepa

i.    Pesindang tauka tanda ti dipelepakaka ba mua pintu ke tanda ba bilik nya orang udah belian.

ii.   Kelai dikena nanda indu dara ti udah ditunang orang. Orang indu dipelepa ngena tinchin emas tauka barang berega bukai.

iii. Buah mega tau dipelepa ke tanda iya bisi orang empu.

penaik –

i.              Nerangka pemesai buka bilik/langkau/rumah.

ii.             Jaku bekaling sebut enggau bilik (bilik penaik)

perabubuk – Sintak kangau nyawa orang ti ngepunka renung tauka pengap.

perabeni – angin / gas ka pansut ari dalam ai enti kitai ngindik rebuh

pendai - Palan ba tebing sungai endur orang mandi.

pendam – Palan endur numbak ka orang ti udah mati.

pengabang – Orang ti diambi ngabang maya gawai.

penguang -

i. Orang ke datai mantu lebuh maya kitai bisi pengawa dikereja.

ii. Pengabang ti datai ukai ari padah.

pengaruh - Utai jai tauka rachun ti tau nganu orang.

pengayu: (ai pengayu) – Pemanjai umur orang. Ai tuak ti diseradakka maya Gawai Dayak dikena ngenataika niat enggau peminta ngagai Petara ngambika gayu, guru, gerai nyamai sereta lantang senang.

pengedang – Sebengkah tunggu tauka ukum.

pengkuan – Anak ti pengabis biak.

penungkam – Sebansa pengaruh ti tau nganu nyawa.

penyandih – Adat ti disuaka ari sepiak indu ngagai sepiak lelaki lebuh rami melah pinang.

penempa -

i. Jaku dikena nanya sekalika anak ti ada nya indu tauka lelaki.

ii. Tukang kambuh.

pulut betelaga – Nanam padi pulut ba tengah-tengah umai padi amat. Pengawa tu mali lalu tau nganu nyawa enti dikereja.

perenama - Jaku adjektif kena madahka bulan kembung nyentuk.

perenching – Jaku adjektif nerangka utai ti dipeda tampak leliau.

pegari –

i. Jaku adjektif madahka mata panas ti manchar.

ii. Madahka orang ti tampak rita jelai nama.

perantu - Adat asal Iban kena ngintu semengat orang ti udah mati.

peruji - Ambai tauka sulu ati.

personifikasyen - Sebansa bungai jaku ti meri ulah enggau pendiau mensia tauka kualiti batang tubuh mensia ngagai objek tauka utai bukai ti enda benyawa. Reti nya personafikasyen meri tukuh mensia ngagai objek enggau idea ti abstrak.

Chunto:

i.      panchar bulan perenama nyapa ati iya enggau lembut.

ii.     Tak lalu dipesan angin selatan ribut raga,

Gang-gang selulut ribut biau bajang,

Bua bepangka sabung petang,

Mangkaka batang Tapang Undang rebah tegadang,

Ninggang lembang tanah sebaka,

Rari pesiri laki ular belalang,

Nadai agi benyawa gang-gang,

Enggau orang nginang batang pinang laka.

iii. Sema indai nuan Jawai enggai,

Sema apai nuan Kunsi enda nyagi,

Biar tua besimpan tengah malam

Meleka pukul lima dini hari,

Ngasuh tikai nuan dara jawai nyabak rerengai,

Ditinggalka nuan bejalai nurun pegi,

Panggal enggi nuan nyebak ngekal,

Nadai agi manggal serungkung kaki,

Pua enggi nuan nyabak tegunsa,

Badu agi map jangka ruang ati,

Kibung enggi nuan nyabak reraung,

Sebana badu begantung malam hari,

Tikai perampan nuan nyabak nyedan,

Badu dikena beritan nganchau padi,

Bilik enggi nuan nyabak kekisik

Tinggal nuan ke tasik betaban rari,

Genuk enggi nuan nyabak sesikuk,

Badu agi disauk mandi pagi,

Tungku enggi nuan orang indu,

Madahka diri badu disampu dikena berapi.

pewatak: (selangkuh watak) – Gaya pendiau, pemai ulah enggau ati watak ti dikelala ari aksyen, jaku, runding enggau dialog ti dibantaika iya enggau watak bukai (orang bukai).

pesingan - Jari.

Petara - Tuhan ti dikarap sereta disembah kitai Iban dulu kelia.

piring - Tengkira tauka perengka ti dikena ngading peminta ngagai Petara.

pimpin (burung pimpin) – Burung ke ngelimpas mua ti datai ari kanan jalai meraka ke kiba (burung pimpin baka ular bisa, jelu, tauka burung bisa)

plot - Rurun peristiwa ke nyadi pelasar cherita. Bansa plot dibagi ngagai dua bengkah iya nya

kronologi ( nitihka tusun maya) tauka ukai kronologi ( enda nitihka tusun maya)

plot asal -Plot ti nguasa jalai cherita.

plot sangking – Plot ti ngerembai ari plot indu tauka asal.

plot gerah – Plot ti ngundan bengkah ke enda diguna dalam rurun cherita. Tau ditinggalka lalu nadai ngachau jalai cherita.

plot niki – Plot ti ngerembaika isi cherita ari siti bengkah ngagai siti bengkah.

plot organik – Plot ti nyemetak lalu enda limpang ari plot asal.

pudas - Pengawa mela sereta ngintu burung ti dijangka manah udah lepas nunu umai. (suah nyadi lebuh maya ngebak enggau nugal).

puchau -

i.      Pengeringat.

ii.     Leka sampi ti dikena minta ngagai ’kuasa roh’ ngambika orang ti sakit tau gerai tauka peminta iya ulih diberi.

punggang -

i.      Muak/ ngalih ke sepiak.

ii.     Puting rumah panjai.

pugai – Sebengkah jayau.

pungkang – Suntuk tauka lapar.

pukung penyai – Dibalut pengamah tauka penyai ketegal ulah diri empu.

pun bilik - Tuai bilik

puni – Penusah ti nyadi ba orang ketegal ti enda nachuk tauka negu pemakai lebuh orang mai makai.

puni jaku - Udah kelanjur nyanggup.

puni rapas – Ampir bulih penusah ketegal ti bisi buya puni

puyang jagang – Pesaka lama

plagiarisme-Engkubang penemu ngena chara enda beradat ari karya bukai. (literary theft).

propaganda - Sebengkah penemu ti disadung dikena ngambi ati orang bukai.

Q

Quintain - Seentelian leka main ke ngundan lima baris ayat.

R

rabat - Pengawa nyenggai orang ti udah nadai. Lebuh maya tu adat orang ti ninggal diletak nitihka pengawa iya sekumbang ti agi idup. Ulit mega deka dikejaku.

ramban - Sebengkah leka main dikena beperindang. Pengawa beramban tu bisi dikelembung sereta diumba enggau entak tungkat lelambang. (Chunto: ramban uti enggau ramban gawai)

Chunto:

Nurun ga kubu, burik bulu, burung ga ketupung,

Masuk kelambi baju beludu,

Sap ga bulu… lidi… lidi ambai tupai ma…

Kelembung :

Aih… lidi ka dambai anang kaya berandau tua laja,

Enggaika indai ninga randau tua singgai (2x)

Tupung ga sida apai semalam ga singgai nadai,

Asaika setaun enda diundang di tupung

Tupung aku ngentudi laki ga ambai diri,

Jaku emperaja ga subuk,

Endu cherebuk mangkuk china,

Kedua bali nama, emperaja tawak utang ga siba,

Aih… ka dambai anang kaya berandau tua laja,

Enggaika indai ninga enda alah lalai (2x)

rampang bungai – Jayau ke bisa dikena orang indu nyayau lelaki ti balat dikerinduka iya.

raup Burung ti datai ari kiba jalai lalu meraka ke kanan jalai (burung raup baka ular bisa, jelu, tauka burung bisa)

realisme Bansa penemu tauka arus litaricha ti ngetanka penulin sekalika jelan asal dalam cherita.

regionalisme Asil litaricha ngenang menua orang ti ngarang cherita (pengarang).

renung Siti ari leka main Iban ti dikena beperindang tauka besampi ngagai petara. Chunto:

renung semain – dikena beperindang lebuh maya bisi pengerami: renung sakit – dikena besampi ngagai Petara ngambika orang ti sakit tau gerai.

renggat -

i. Telian dalam leka main.

ii. Takah rurun pengawa.

repitisyen – Leka jaku tauka klausa ti diulang ngena chara melintang tauka lurus ba pun, tengah , ujung tauka ngulang ayat kena nyentukka niat. (repitisyen tau dipeda ba epizueksis, tautotes, simploke, mesodiplosis, apanalipsis, enggau anadiplosis).

Chunto:

Enti orang ke diperantu nya indu gar indu takar, indu puntang indu tengkebang, tebalu iya 12 igi jabir.

retorik - Sebengkah ari bungai jaku. Ayat ti enda menuku tang ngundan pemanah bungai jaku ti disengajaka dikena nyindir tauka nundi orang. Selalu dikena ngaluska munyi sereta najamka reti jaku.

Chunto:

” Naka meh penalam pengerindu penyayau nuan diatu?. Nuan nyau berani datai

jari nyentuk ka enda alah itung bekau jari nuan ba tubuh aku.

” Nuan tu baru tau dikumbai anak umbung apai indai. Pengidup nuan kaya raja

tang apai indai ditinggal merinsa seranta”

rima – Enteli ujung ba leka main ti sebaka tauka sama munyi (peda batang enteli).

romans – Prosa naratif senentang bujang berani, pengering, pengelelang enggau pengangkun iya.

romantik - Leka jaku adjektif ti dikena nerangka pengandal, pengasai ati sereta pengerindu mensia.

S

sabung Pengawa ti bebintihka manuk lelaki ke udah chukup umur ketungkah gawai deka nyadi. Kelia Sabung Gawai diatur ba ruai tauka ba tanju orang ti empu gawai. Pengawa tu dikereja endang kena ngandak penatai orang Panggau lalu nyadika pemerindang ngagai bala ti diambi ngabang.

sandau hari Renggat pengawa Gawai Burung ti pemadu baruh. (Gawai Mata). Pengawa tu semina dikereja sekali aja di tanju.

sanggai Leka main ti dikena bebuti enggau muji orang. Iya mega suah dikena orang indu enggau lelaki mantaika pengingin ati ngagai pangan diri.

(Chunto: sanggai meri ngirup; sanggai lelaki bebuya mata enggau orang indu; Sanggai Serebana enggau Sanggai Minta Beri Ngirup).

setunggul – Menira. Ba daya idup Iban setunggul tu tanda penaluk tauka basa ngagai petara enggau lambang penemegah bansa. Nya alai ba tiap-tiap pengawa Iban ti nuju ngagai petara tauka begempuru bebala mayuh dia setunggul mesti didirika tauka dituatka.

Chunto:

Ba pengawa ngelaluka petara. Orang ke dulu bejalai mai setunggul, ditangkanka orang ti mai manuk, dientudika orang ti mai piring, ditangkanka tuai gawai, udahnya baru dientudika bala mayuh enggau orang ti begendang di belakang sekali.

serengut Patah nyawa/ sura nyawa lebuh orang ngangauka tauka ngesuhka leka main.

sugi – Sebengkah ari leka main ti dikena nusi cherita. (Chunto: Cherita Bujang Sugi)

silak kibung/kelambu Renggat pengawa maya melah pinang. Pengawa tu dikena bala lemambang lebuh datai di bilik ngeluluka lelaki udah tau begulai enggau indu lebuh ti datai ba ruang bilik nya. (kibung endang meruan digantung lebuh lemambang ngereja pengawa tu)

senimbal Bunyi enteli ujung ke sama ba leka jaku, ba pun baris, tengah baris enggau ujung baris leka main.

sarkasme – Nyindir orang ngena jaku ti kasar.

satira – Karya litaricha ti ngemeli, ngelese tauka nyindir ulah orang ke dituju ti enda manah sereta enda menuku.

selaing (war cry) – Jaku peransang ti dikena ngeringka semengat.

semantik – Siti chabang penemu linguistik ti mansik reti enggau sejarah ubah leka jaku.

sempama – Jaku ti dikena nyilup gaya sereta ulah pengidup mensia.

semiotik – Penemu pelajar dikena mansik chara ngena tanda enggau lambang

simbol – Lambang ti dikena nyemaka sesebengkah pekara.

simile – Jaku banding ti dikena dalam ayat. Leka jaku ti suah dikena iya nya; baka, munyi, asai, mesai etb.

Chunto:

i. Baka pinang dibelah dua.

ii. Asai ti pansut ari nyawa baya.

iii. Munyi burung ti makai buah kara.

iv. Mesai leka semakau

v. Udah nya lalu dipandangka

Endu Lengayun Endun Kumang,

Dih mua terang enggi iya,

Ke begamal bendang-bendang,

Baka pesedan bulan tumbuh lemai,

Peda nyau pelu-pelu mua chiru,

Baka pajar sumbu lampu kedai.

Ah… dih…

Udah nya lalu beradu bujang nemu,

Masukka kepiu baju panjai,

Lalu pasukka tanchut,

Bujang lembut, meirut-irut,

Malut buntut nanggam kerigai,

Lalu dipandangka bujang mekang,

Mua terang enggi iya,

Ke begamal bendang-bendang,

Baka petakang bintang berintai,

Lalu dipisin buk gerintin begundai panjai,

Di cheremin ke bepusin dua berimbai.

Enti bansa tu,

Agi laku kami dua tu ila indai,

Baka seregiu tajau rawai,

Agi bulih mih kami dua tu ila indai,

Baka tebih ginti enseluai,

Agi tampak kami dua tu ila indai,

Baka temedak sarung binjai,

Agi lansau mih kami dua tu indai,

Baka kemayau bintih tajai.

simplok – Sebengkah bungai jaku dalam ayat ti ngundan anafora enggau epifora ba siti baris.

Chunto: nuan meh ambai ati aku

nuan mega sulu aku

nuan seput enggau nyawa aku

sinisme - Sindir ti ngasuh orang nyima tauka enda nyamai ati.

Chunto:

i.      Nama utai dikemisika aku?

Pengeraja ti dikenggaika orang,

Semina ati pedis enggau pemerinsa!

ii.     Ini kami Belangkat menya pandai kenu ku orang

Di chunggai tunjuk empat, rawang dilempuang dada entap,

Tang lebuh diasuh niap, dia jari iya katat-katat mulut kulap-kulap,

Enda teingatka penyampau tunjuk nyerekang.

Aki kami Ramba menya pandai kenu ku orang

Di chunggai tunjuk dua, rawang di lempuang arung dada

Tang lebuh diasuh macha, dia rang enggi iya tak tengganggam

Mulut semuti tak kimut-kimut nadai nyenggala benyawa,

Enda ngelala angka urup tunsang.

sinkope -Urat jaku ti dipuntang tang agi sama reti.

Chunto:

Aku nyadi ku,

Deka nyadi ka,

Bujang nyadi jang.

sinekdoke – Leka jaku ti dikena mida siku-siku orang ari bala bukai.

Chunto:

Igat endang dipadu nyadi manuk sabung sida sebuat.

sinonim - Leka jaku ti sama reti.

Chunto: gundai sama reti enggau buk.

sinopsis – Kedut cherita tauka lansa siti-siti cherita.

sintaksis – Chara nusun ayat dalam karya litaricha awakka seriran enggau tema.

slanga – Bida intonasyen menua siti enggau menua siti tauka ai siti enggau ai siti.

sosiologi litaricha – Pekara pasal kaul antara litaricha enggau raban bansa ti ngarang iya.

stereotaip -

i.      Imej tauka perangai ti seraris enda berubah pasal orang tauka utai.

ii.     Runding ti perjudis lalu nganggap semua orang sebaka.

stilistik – Penemu ti dikena mansik pasal guna enggau gerinek jaku dalam asil karya.

sukut tinjau pengarang Tinjau pengarang dalam cherita.

T

tabak – Sebengkah talam ti bekaki endur engkah piring.

taba – Palan alai berumah.

taban – Mai utai orang enggau nadai pemendar.

tabas – Pemakai ti disediaka dikena neruju/nawar/mampul ai bisa.

tabin – Enda tentu gerai.

tabi - Tanda basa enggau pangan diri.

tabu -

i.      Balut.

ii.     Gulung ubung enda tusut.

tabuh – gendang Iban ngena kereban setawak, engkerumung enggau bebendai

tachah - Gasak.

tachuk - Utai diempa ti diasuh orang pakai mesti ditegu enggaika puni.

taga -

i. Agih timpuh dikena ngereja pengawa.

ii. Utai ti udah diagih tauka ungkup orang bukai.

tagai - Tangguh tauka seraka

tajam ati Tunggang sereta berani ngereja pengawa ti jarang dikereja orang bukai

tajam runding Pandai

tajam nyawa Masuk makai bansa pemakai ti dikeenggaika orang bukai tauka enda milih makai.

tajam mata Lansik tauka jampat ngelala perangai mensia

tajau - Sebengkah kereban lama ti endur besimpanka beras, tuak enggau utai bukai. Ba tusun pendiau enggau adat Iban Tajau besai bendar reti ba pengidup bansa Iban. Tajau ganti seput bansa Iban laban pemesai adat ditanda ngena bansa tajau baka; mungkul, panding, alas, alas ngerang, rusa, menaga etb. (Peda Bup Adat Iban 1993)

takang - Tulang daun

tajuk – Kajang tauka dunju ti digaga atas perau.

taju - Bansa pemakai, barang tauka utai bukai ti ditemu dalam kampung lalu nadai temu penatai. Iya enda tau dikachau tauka diempa enggaika kitai kena penusah.

Chunto:

Ba siti endur, dia tak bisi buah rian mansau. Tang ngelingi nya endang nadai pun rian lalu pia mega ukai maya rian bebuah. Utai ti bansa tu tau bendar nyadi taju ba menua ti agi semak antu, semak jelu kelia.

taka - Tikas/ ikas .

tamang

i.      Orang ti sama nama.

ii.     Sebengkah nama buah ti tau dipakai.

taing Munyi ti mantik didinga.

tanya burung Leka main ti dikena nanyaka bala pengabang sekalika sida bisi burung tauka nadai.

tanya indu Leka main ti dikena nanya indu ti deka diambika bini/ menantu.

Chunto: Tibak leka sugi ba senentang Apai seduai Indai Rimbuti nanya

Sadinang ke bini Bujang Sugi.

Tanya:

‘Au Ibu. Tu deh pengelama kami tu

Udah diau di Gelong Batu Besundang,

Nyiur nyau bebuah nudukka kerang,

Nadai ga kita kala datai, kala nemuai.

Nama pejalai, nama penemuai,

Seduai aya, dih Ibu?’

Saut :

‘Au Endu. Bisi mih pejalai,

Bisi mih penemuai.

Kami duai aya nuan tu,

Deka ngamba puna, kami duai tu Endu,

Di puchuk tapang ara,

Ninga tak lenga-lenga,

Mesanka bara sempun lukai.

Deka manjuk imbuk, kami duai tu Endu,

Di puchuk tapang mikai,

Deka natuk puchuk tapang bekumbai.

Deka nekang tapang, kami duai tu Endu,

Tepan idang madu terebai.

Deka nikung adung,

Di ulu langgai sungai,

Deka mantil kaki, emperegam lawai.

Tanya:

’Au Ibu. Mua pemanah mih pejalai seduai aya nya.

Iya sapa ke dituju nuan dih, Ibu.

Nunda ulu langgai sungai?

Iya sapa ti diselinting nuan dih, Ibu,

Nunda genting sebarang panjai?

Sapa ditepat nuan dih, Ibu

Nunda bukit sebarang besai?

Saut:

Nanya Endu ke di Liu Nyatu Tapang,

Nanya Kumbau di Balau Belai Langkang,

Nanya Endu Dara Jawai ke Mensengai Dayang Kumang,

Nanya Sadinang Lantang Anak Umbung

Enggi kita dibaruh kurung perabung pinang.

Tanya:

Sapa mih lantang, ke ditanyaka nuan nya dih Ibu?

Saut:

Nanyaka Datu Siku Pemadu Nama Mansang,

Nanyaka Bujang Jelingau Mali Lenyau

Enggau orang ke leku tikal kajang.

Nanyaka Labung Panggai ke sakai jaku nyerang.

Nanyaka Bujang Sugi ke berani Malas Parang.

tanya temuai – Leka main ti dikena nanyaka pejalai bala temuai tauka pengabang.

telian (entelian) – Renggat leka main.

tema – Pekara ti nyadi batang kenang dalam cherita.

temuku – Simpul tali ti dikena orang ngitung hari awakka nemu timpuh siti-siti pengawa tauka gawai kelia menya.

terantang begerah – Pangkung tawak ti begangga serenggat aja dikena begerah.

terantang begau – Pangkung tawak ti bejarit panjai enda putus-putus. Nadai senggal munyi. Nya ti madahka pemesak orang ti minta sah ketegal ditinggang penusah.

terenah – Duduk jenuh.

tesa – Itung tauka tiap.

timang -Leka main.

timang jalung -Leka main ti dibantai lebuh maya Gawai Antu.

timang kenyalang -Leka main dikena ngintu Gawai Raja Berani tauka timang Gawai Kenyalang ti ditelah ari mimpi.

timang tapang – Leka main ti dikangauka/dikanaka lebuh orang muar manyi ngambika Bunsu Rembia (roh ti jaga tauka diau di dan pintu tapang) enda ngachau.

tuk tungguk – Leka main anak mit.

Tua – Leka jaku nama ti dikena madahka nama Petara, jelu tauka ular ti nulung tauka mandung kitai mensia.

tuchum lelegup -Tuchum ti semina ngelinsum.

tumpa -Kereban ngepan sida ke indu ti diengkah/dikena ba lengan (dekuan).

tunggu -Ukum ngagai orang ti ditinggang adat ketegal ngereja penyalah.

U

udung -Jaku nama kena nyebut bansa Melayu ti bebakih enggau bansa Iban lalu bisi kaul dagang (dagang tukar barang).

ujung -cherita Renggat penudi dalam siti-siti cherita pandak tauka novel sepengudah klimaks lalu sebedau cherita nya abis.

ujung ensera Jaku sebar tauka jaku minta ampun ari tukang ensera ngagai pemacha enggaika ensera ti ditusui iya bisi salah telah, tampung tauka sebut.

ulak mulai Kuta basa punggang setak rumah panjai ti diaduka dikena nganti tauka ngelaluka pengabang ti besundang ngagai pun ramu.

universaliti – Jurai litaricha ti diterima mensia mayuh sepemanjai jeman.

uti – Pengelandik betimbalka leka main lebuh ti bisi pengerami rambau Melah Pinang, Gawai Antu enggau gawai bukai.

(Chunto: pengawa bala lemambang ti nanka kuta (Melah Pinang) sereta muka kujuk maya Gawai Antu).

uting - Anak babi (anak ngut ti agi nusu).

W

wa -

i.      Ayun. Dulu kelia alai bala lemambang duduk mantaika leka main (renung). Digantung di tengah ruai.

ii.     Alai sida ke indu nindukka anak. Suah mega lebuh ngua anak indai nembiak nya ngena leka main.

wa bungkas – Pengap ti dikena nimang pengaruh ngambika ngasi sidi, bisa landa.

wang - Duit.

watak – Pelakun tauka pemai ulah ti ngembuan ungkup pengawa dalam cherita tauka ensera.

watak antagonis – Watak dalam cherita fiksyen ti endang selalu ngelaban watak protogonis.

watak protagonis – Pungka watak (orang) ke dicherita ari pun nyentukka ujung cherita. Selalu agi, watak protagonist tu watak ti manah.

watak selampur (round character) – Watak ti ulih mai mayuh macham ulah tauka leman gentura.

watak dinamik – Watak ke semampai berubah ulah ari ti jai ngagai ulah ti manah.

watak statik – Watak ti nadai tentu mayuh leman tauka enda berubah sepemanjai cherita tauka ensera.

watak sangking (flat character) – Pemai ulah ti semina mai siti tanggung pengawa.

wung -

i. Ai ti deras nengah gerugu batu tauka ai ti labuh ari tingkah batu.

ii. Sebengkah uti basa tidikena nyambut penatai bala pengabang.

Y

yang - Jelu ti ngiring tauka nyadi ayu, ngembing sereta tau nulung (manang enggau lemambang aja).

Z

zeitgeist - Semengat jeman. Pengarang ti ngasilka litaricha asal tang agi berindik ba semengat jeman sebedau nya.

SANDING PENEMU

Asmah Hj. Omar(1981). The Iban Language of Sarawak: A Grammatical Description. Kuala Lumpur: Dewan Bahasa dan Pustaka.

Benedict Sandin (1964). Raja Durong. Borneo Literature Bureau: Kuching Sarawak.

Benedict Sandin (1968). Pengap Gawai Batu. Borneo Literature Bureau: Kuching Sarawak.

Benedict Sandin (1968). Rajah Simpulang Gana. Borneo Literature Bureau: Kuching Sarawak.

Benedict Sandin (1971). Pengap Gawai Burong. Kuching: Borneo Literature Bureau.

Benedict Sandin (1972). Gawai Antu. Kuching : Borneo Literature Bureau.

Benedict Sandin (1972). Sengalang Burong. Kuching : Borneo Literature Bureau.

Benedict Sandin (1977). Gawai Burong: The Chants and celebrations of the Iban Bird Festival. Universiti Sains Malaysia: Pulau Pinang.

Curtis W. Hayes, Jacob Ornstein, William W Gage (1977). ABC’s of Languages and Linguistics. Maryland, Silver Spring: Institute of Modern Languages, Inc.

David Singleton (2000). Language and the Lexicon, An Introduction. Oxford University Press New York.

Freeman, J.D.(1960). ‘Iban Augury’ In The Birds of Borneo. Edinburgh: Oliver & Boyd

Harrisson, Tom, and Sandin, Benedict (1966). “Borneo Writing Boards” In Sarawak Museum Special Monograph. No.1, pp.32-286. Kuching

Hussein Jamil & Henry Gana Ngadi (1989). Kamus Bahasa Iban- Bahasa Malaysia. Kuala Lumpur: Dewan Bahasa dan Pustaka.

George Lakoff and Mark Johnson (1980). Metaphors We Live By. University of Chicago Press.

Gonzales, A (1987). Discourses Across Cultures. Englewood Cliffs, NJ:Prentice Hall.

Janang Ensiring and Robert Menua (2006). Jaku Dalam. Tun Jugah Foundation: Kuching Sarawak.

Janang Ensiring and Robert Menua (2001). Renung Semain. Tun Jugah Foundation: Kuching Sarawak.

Janang Ensiring and Robert Menua (2001). Renung Adat. Tun Jugah Foundation: Kuching Sarawak.

John Saeed (2003) Semantics. Wiley –Blackwell Press.

Lambert, W. (1974) Culture Factors in Learning. Bellingham: Western Washington State College

Otto Steinmayer (1999) Jalai Jako Iban. Klasik Publishing House: Kuching Sarawak.

Peter Kedit (1969). A Gawai Kenyalang (Bird Festival) at Wong Pandak, Lubok Antu Sarawak Gazette 95 (1336): 137-143.

Pusat Perkembangan Kurikulum (2007). Sistem Jaku Iban di Sekula: Kementerian Pelajaran Malaysia.

Richards, Anthony (1966). Leka Main Iban. Borneo Literature Bureau Kuching Sarawak.

Richards, Anthony (1981). An Iban-English Dictianary. Oxford University Press.

Scott, N.C. (1956) A Dictionary of Sea Dayak. School of Oriental Studies, University of London.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: