Penatai Iban 1: Ukai ari Batang Kapuas.


PENATAI IBAN : 1

Nyadi penatai Iban tu ditulis bepelasarka bup Peturun Iban ka ditulis niang Benedict Sandin  dalam taun 1966 enggau bup The Iban of Borneo before the White Rajah Rules enggau mega abi jari niang Benedict Sandin ka penudi dikeluarka dalam Sarawak Museum Journal “Source of Iban Traditional History”, Part 1, 2 & 3.

Penatai Iban tau dibagi ngagai tiga bengkah, ianya;

  1. Ari segi anthropologi (ka dipejuraika ila)
  2. Ari Batang Kapuas (ka dipejuraika ila)
  3. Ukai ari Batang Kapuas

Penatai Iban ka ukai ari Batang Kapuas bepun ari siku tuai nama Merom Panggai ka berumah  di tisau langit.   Reti jaku nya madahka iya datai ari menua jauh, laban iya kenu ka kenang tuai datai ari Gunung Mensuat tanah Mekah, pangkalan Jeddah. Merom Panggai tu dipelaba ka serambau enggau Sebatin ka rembus tepawah ari tasik di Tanjung Datu.  Penatai Merom Panggai tu baka tu;

1. Dayang Laing x Bunsu Ribut

/

2. Saliman

/

3. Semarugan

/

4. Sera Gindi

/

5. Sera Gindam

/

6. Sera Gindah

/

7. Merom Panggai

/

8. Abang Musa

/

9. Pateh Simpung

/

10. Pateh Rejab

/

11. Pateh Rendah

/

12. Pateh Rasiek

/

13. Pateh Ayu

/

14. Pateh Gurang & Dayang Patri

/

15. Pateh Gurang =Pateh Sayat

/

16. Pateh Sayat

/

17. Pateh Ismail

/

18. Pateh Sulaiman

/

19. Pateh Menaul

/

20. Pateh Menegir

/

21. Pateh Teliang

/

22. Radin Tanjong

/

23. Pateh Ambau x Remias

/

24. Pateh Iri x Nain

/

25. Nunong x Lampai

/

26. Chaong x Lantong

/

27. Tindin x Tida

/

28. Rinda x Demong

Dalam tusut disebut munyi tu; Merom Panggai ka beranakka Abang Musa kenu ka jerita ari Mekah pindah ke Pulau Jawa bedagangka pinang seleka beregaka ulun  dua sama berambau mansang.  Abang Musa beranakka Pateh Simpong ke tau ajih, tau nyimpung lumpung tekalung rengung-rengung nyadi sengkilung  tedung kumbang.  Angkat iya ari nya pindah ngagai Pulau Magista. Ari nya iya pindah baru lalu diau di Pulau Semakau, kena pegai perintah Singapura ka diatu.

Ari Pulau Semakau iya angkat baru lalu diau di Munggu Merudu seberai Nanga Brunei. Dia  baru iya beranakka Patih Rejap. Nyau besai Pateh Rejap nya baru iya nguji mupu ke Bintulu, tang enda nyadi laban iya bisi utai nanggul deka dibunuh orang tauka bisi tegal  bukai ka enda disadang iya.  Tuju iya ka mupu tu ka nudukka diri nyadi Raja ngumpul chukai.

Nyadi Pateh Rejap beranakka Patih Gurang. Patih Gurang beranakka Patih Sayat.  Patih Sayat beranakka:

17. Pateh Ismail

/

18. Pateh Sulaiman

/

19. Pateh Menaul

/

20. Pateh Menegir

/

21. Pateh Teliang

/

22. Radin Tanjong

/

23. Pateh Ambau x Remias

/

24. Pateh Iri x Nain

/

25. Nunong x Lampai

/

26. Chaong x Lantong

/

27. Tindin x Tida

/

28. Rinda x Demong (Beketan)

Dalam rintai tuai Pateh Ambau disebut Patih Ambau mungkal diau di Pengkalan Tabau peling lanting Tawang bedagang, Nyadi pengkalan tu ari ulu Lubok Antu enggau lalu ari ili Wong Mutan ka nyadi pengerembus bansa Tawang ari Danau nyin agi kelia mansang bedagang ke Batang Ai.

Nyadi pangkat ka dikumbai Pateh nya diberi perintah Majapahit kelia maya menua tu apin kena perintah Belanda, Brunei tauka bansa Inglis. Pangkat nya ukai gelar diberi Merom Brunei.

IBAN BETAMPIL ENGGAU BEKETAN

Datai ba tubuh Nunong ti mega peturun Merom Panggai sida iya diau Kumpang, pati Batang Ai, udah parai Nunong  anak Pateh Ambau seduai Remias, anak Nunong ka benama Chaong angkat enggau anembiak iya pindah ka Skrang lalu diau  di Tanjung Lipat. Nyau ka lama udah parai Chaong, nya baru anak iya ka benama Tindin Bragah Ngindang  angkat ari Tanjung Lipat enggau anembiak iya pindah kulu Skrang lalu berumah di Nanga Akup.

Ba rumah tu sida tusah bendar laban siga Baketan. Nyau kapuas sida siga bakanya, malam suah bendar sida    mindah ngagai perau, awakka belabuh ditengah ai rarika Baketan nyumpit ngena ipuh.

Nyau kapuas ka merinsa diau dia, Tindin mai anembak iya pindah baru ngagai endur ka dikumbai Seraka Dua dalam Tebat, pati Skrang. Sekumbang sida diau dia bakanya ga penusah sida agi siga Baketan. Sida rari baru ari nya;

Tindin lalu pindah ka Enteban berumah di Meram. Sekumbang diau ditu sida pan udu amat ga siga Baketan.  Laban nya sida pindah kulu agi, ngulu Enteban lalu berumah di Batang Galau. Lebuh iya bumai di Ulu Galau Wong ba tanah ka dikumbai Sungai Lungun, Tanah Degum, iya nadai agi dikachau munsuh. Tang deh lebuh tu enda muka-mukai rumah Buau Nyada, menantu Buau Lembu dilahka munsuh datai ari Sebuyau. Nama Buau Nyada tu bendar nya Maling.

Nyadi bala SebuyaU ka ngalahka rumah Maling nya enda lalu ngalahka rumah Tindin. Kabuah sida enda ngalahka nya ku kenang tuai, laban Bunga Nuing udah ngentak ka ragai sakayu kena melepa rumah Tindin ari peda mata munsuh.  Udah nya lebuh agi diau di Ulu Enteban, Tindin manjuk burung ngaki umai iya di Bukit Ensanga antara ulu Enteban enggau ulu Buai pati Padeh dalam Layar. Lebuh iya ngabas panjuk pagi siti, peda iya mata panjuk disintakka orang papung kayu magang. Dua tiga pagi udah nya lebuh iya ngabas panjuk agi ga orang beduan iya chara nya.

Nyau kapuas bakanya, malam siti iya lalu bemalam ngipa orang ka beduan iya. Agi urap ari lebuh iya ngabas panjuk iya lalu betemu enggau orang siku ka ngumpul burung ulih panjuk ka lalu nganti burung enggau papung punggu. Meda orang nya Tindin lalu numbuk iya ngena beruak, tang enda kena.  Seduai lalu sama bebalas numbuk pangan tang sama enda kena. Nyau ka leju seduai udah betumbuk endur Tindin nanya ka nama munsuh nya ka lalu nyaut ku iya: “Aku tu Entingi bejuluk Keti Aur Tulang. tuai Baketan Paku ka diau di tuchong bukit Saban Tinggi kadiri nadai nenjang.”

Entingi lalu nanya ka nama Tindin. Tindin lalu madahka nama diri, Tindin bejuluk Pimpin Bragah Ngindang, tuai Iban Sekrang ka diau di ulu Enteban.

“Enti munyi nya badu agi tua bebuti unggal,” ku Entingi nganu Tindin, “laban tua sama sereta nyilak ka kibung  Kumang.” Sereta Entingi udah nyebut jaku nya seduai sama-sama nyeliah rarika pangan lalu sama pulai ka rumah din.

Enda bangat lama udah nya alai Tindin mai anembiak iya ngayau ngalahka rumah Entingi dalam Paku pati Saribas di tuchong bukit Saban Tinggi. Nyadi rita sida Tindin ka deka ngayau jampat bendar kena dinga anembiak Entingi. Laban nya iya lalu ngumbai anembiak iya baum. Bala anembiak iya Baketan Kampung enggau Baketan Temuda. Reti nya Baketan ke enda bumai enggau ka bumai. Udah datai semua bala Baketan, Entingi lalu mai sida berunding nan ka menua ari Ianggar Iban ari Sekrang. “Aku, ka Entingi, “bisi ninga rita Tindin tuai Iban ari Skrang udah ngempuruka bala deka nyerang bansa kitai dalam Batang Paku enggau bala besai.”

“Nyadi aku ka ngempuru ka kita mayuh tu kitu bakanya ga, deka mai kita berunding ka jalai kitai nan ka menua tu an Ianggar Iban. Nyadi Iban mayuh tubuh, kital mimit, nya alai kitai ngelaban sida enda tau enda enggau chukup akal. Aku sayau bendar ka menua tu,” ku Entingi, “laban ditu semak apung, mayuh pantu asal, sereta enggau tanah manah bendar. Nambahka nya ka iya, di menua tu ikan enggau jelu mayuh bendar.”

Ninga jaku Entingi munyi nya Agan tuai Baketan ari Nanga Gelu Penuan di Ulu Paku nyaut. Ka iya, “aku nadai runding mayuh, dibai kita ngansak ka munsuh deka, dibai nan ka menua ba menua kitai empu pan deka. Semina utai dikenggai aku nya nyau menua dirampas orang enti kitai enda ngelaban.”

Udah Agan bejaku nya baru Entigu tuai Baketan Kampung di Ulu Paku lalu bejaku, ku iya, “aku nadai meh panjai penemu, tak nitihka runding kita mayuh. Nanka indu anembiak ba menua kitai empu ditu aku deka, dibai ngansak ngagai menua munsuh pan aku deka. Semina utai dikenggai aku,” ku iya, “rari ninggalka menua enda ngelaban.”

Ninga jaku semua tuai sida udah senutuk magang. Entingi lalu bebai sama nyikap diri mansang  gansakka munsuh. Bala Baketan enggau iya ngayau anembiak Merajuong ari Ulu Bu’ut, anembiak Merajillan an Ulu Serudit, anembiak Bangkit ari Paku Tengah, anembiak Agan ari Nanga Gelu Penuan enggau anembiak Entigu ari Ulu Paku. Sida nurun bedarat ngili Paku lalu nguluka Sekundong enggau ngili ka Pasa ngulu ke Layar. Datai di Nanga Padeh sida lalu ngulu Padeh lalu betiki ngulu ka Geraji mansang ka Sekrang.

Nyau ka lama udah sida bejalai datai sida ba Bukit Kayu Ukir ba empelai tinggi bandir dia sida besatup enggau bala Tindin. Sida lalu bamuk betumbuk ngena seligi, ngena sangkuh. Balat bendar sida belaban tang enda tealahka pangan.

Nyau ka lama sida udah belaban alai Entingi ngangau ka iya, “0 isan .Tindin ngetu dulu kitai bamuk.”

Ninga Entingi ngangauka iya isan, Tindin lain nyaut nanya ka kabuah iya ngumbai iya isan. “Kati nuan bisi anak hujang alai nuan ngisan aku?” ko Tindin.

“Bisi,” ko Entingi. “Kati nuan deh bisi anak dara?” ko iya.

“Bisi,” ko Tindin.

“Enti munyi nya manah tua anang agi belaya, manah tua lalu bejadi anak tua belaki bebini,” ka Entingi, “awak ka laya tua abis.”

Ninga jaku Entingi, lalu ka Tindin. “enti nuan deka bejadi anak tua, aku pen deka ga enti nuan deka ngisi derian pinta aku.”

“Nama derian pinta nuan deh?” ka Entingi.

Tindin lalu madahka din minta derian palit mata pala sigi engkabai tutup enggau guong kategal seduai betampil ari dulu udah bebunuh. Entingi madah ka din deka ngisi derian nya, tang maya iya kia ka baru nganti peranama bulan ke deka datai.

Tembu jaku nya sida ari sapiak-sapiak sama mulaika diri. Tang bangkai Bikup ka parai bamuk lalu dibai Baketan pulai lalu ditumbakka sida di Bukit Bikup antara Ulu Sekundong enggau Ulu Serudit enda jauh an tinting antara menua Paku enggau Layar.

Apin lama udah pulai nya, Entingi mai anembiak iya ngayau ngiga pala munsuh kena ngisi derian palit mata pinta Tindin. Pulai sida ngayau peranama bulan nya baru iya mai bala iya nganjong derian ngagai Tinting Kayu Ukir, empelai tinggi bandir, pali bukit Ensanga antara Ulu Buai enggau Ulu Enteban, alai Tindin enggau anembiak iya ka nganti nitihka semaya.

Datai sida din bala Tindin endang udah ngati. Udah sida tembu besurung ka derian, bala Entingi pen lalu enggau Tindin ngagai rumah iya melah pinang Rinda anak dara Tindin enggau Demong anak bujang Entingi. Udah tembu melah pinang Entingi lalu mai menantu iya pulai ka Paku nitihka endang adat melah pinang  bejadi bansa  Iban belaki bebini. Pia mega nunda derian palit mata tu, dudi ari tu enti sema tuai-tuai bejadi anak sida helaki bebini ari dulu udah bebunuh, sida minta derian palit mata. Apin lama udah bekau melab pinang  tu, Tindin lalu nemuai ngagai isan iya Entingi ka Batang Paku. Datai iya din, Entingi lalu mai iya nemuai meda ka menua Paku, Samu enggau Anyut.

Sekumbang seduai ka bejalai meda menua Tindin lalu dibai Entingi betemu enggau Agan tuai Baketan Paku Tengah, betemu enggau Entigu tuai Baketan Kampung di Ulu Paku. Rindu bendar ati Tindin meda pemanah menua. Iya lalu madahka ati din ngagai Entingi deka pindah ka Paku enti Entingi enggau tuai Baketan bukai deka nerima iya enggau anembiak iya sida. Ka saut Entingi, “Manah bendar enti nuan sama deka diau ditu, laban menua agi mayuh puang.” Ninga saut isan iya Entingi, Tindin lalu mulaika diri ka Skrang ngambi anembiak iya pindah ka Paku.

Datai iya di Sekrang, Tindin lalu nusui pemanah menua Paku ka dipeda iya mayuh ikan, mayuh jelu, semak apung enggau mayuh tapar,. Iya madahka diri deka pindah kin ka laban Baketan Paku deka mai sida begulai diau enti sida deka. Ninga jaku nya, semua anembiak Tindin deka magang enggau iya pindah.

Nyadi sida pindah ari Sekrang merau ngilika Batang Ai, lalu ngelayang ka Nanga Layar. Dalam Layar sida bemalam di Telok Semaruang, ari nya bemalam baru di Tanjung Orang Tuai ka dikumbai Tanjung Pendam tauka Tanjung Rangka. Angkat ari Tanjung Rangka sida datai di Nanga Penggan dalam Paku ka alai sida terubah berumah. Nyau ka lama udah sida diau dia, sida pindah kulu agi lalu berumah di Lubuk Berutan. Ari Lubuk Berutan sida pindah baru lalu diau di pun Tanjung Melanyut ka alai Tindin mati tuai.

Nyadi Rinda seduai Demong endang udah beranak lebuh Tindin mati. Semua anak seduai lima iku ka benama Kalanang, Kalimbang, Bundak, Jawai enggau Bakak ka bensumbar Asu Rangka

Lebuh Rinda bekindu ka Bakak iya parai JeIT bekindu kena tinggang kasau indu kena bubun iya. Bangkai Rinda ditumbakkabegulai enggau apai iya empu dipendami banchak Nanga Beduru.

Udah parai Rinda, Demong bebini baru. Sakali tu iya enda agi bebini bansa Iban tang bebini indu bansa iya empu nama Lemia ka enggau iya beranak mayuh bendar.  Enggau bini baru iya tu, Demong pindah ka Julau, ninggal ka anak dulu iya diau begulai enggau Iban dalam Batang Paku.  Nyadi anak indu iya ka benama Jawai lebuh iya nyau dana parai. Tusah ati ka pemarai iya, nya alai Demong  enggau anak dulu iya lalu ngelumbung iya ba tuchong Lumbong enda jauh an ulu Nanga Matop dalam Paku.

Nyadi anak bunsu iya ka benama Bakak bebini Iban dalam Paku, tang iya bebini ka Batang Ai. Kejang iya deka bebini kin ka kabak antu pala iya ditumbakkaiya ba Nanga Tumbai atas pala Lubok Tembop dalam Paku

Nyau tuai Demong skali lebuh iya nemuai ngundang anak dulu an Julau ka Paku, iya mai batu siti lalu ujak ka iya ba Nanga Entaih ari ili Nanga Awas di Ulu Krian ka tanda antara menua anak dulu enggau anak dudi iya diau. Ka sumpah iya Ieboh nanam batu tu: “Nyadi anak dulu aku tau pindah ka ujung jalai meraka batu tu, tang anak dudi aku enda tau nikal ngelui batu tu ka pun jalai.”

Nyadi Demong mati di Julau. Tang bangkai iya ddiambi bala anak dulu iya lalu ditumbakka sida kena mungkal Pendam Pejok ari ili Nanga Samu dalam Paku.  Sumpah Demong maya ka nanam batu nya kelia amat; laban pendiau bansa Iban nyau ngansak ke Julau, Kanowit, Ngemah, Poi dataika ulu Batang Rajang tang Bansa Beketan (anak dudi) lalu jauh-sejauh ari menua asal sida di Batang Paku. (aku empu udah meda Batu Tanam tu)

Udah mati Demong anak iya Kalanang, Kalimbang enggau Bundak lalu nyadi tuai ngintu menua Paku. Rambau tu tubuh sida apin mayuh lalu penyakit nganu nyawa mensia apin bisi mayuh macham baka ka diatu. Nya alai sida lantang diau laban menua agi manah, munsuh pan nadai, Seru enggau Beketan semakin jauh ngejang ari Iban.

Jaku pengarang: Ajar ka pemadu besai ari jerita tu iyanya kitai Iban mesti beserakup sesama kitai sereta beserakup enggau bansa buka di Malaysia. Kitai mega mesti nyikap diri ngena penemu tauka pemandai, kelimpah ari ka nyikap diri ngena pengerajin, pemagas enggau pengeih kitai ngidupka diri diau di menua tu.

Enti bala aki ini kitai kelia enda beserakup, enda bagas enda kering ngenanka pengidup bansa kitai, kada enda bansa kitai ka nyau jauh-sejauh ngejang ka menua tu, mimit-semimit lalu lenyau ari dunya tu (baka bansa Seru).  Diatu, amat kitai enda ngejang, enda mimit-semimit tauka enda pupus tang enti kitai enda nyikap diri enggau penemu (knowledge is power) kitai ka tingal-setinggal ari arus pemansang nuju Tinjau 2020 ila.

5 responses

  1. Amat meh munyi ko Pnegarang nya kitai mesti beserakup…anang baka iban kelia jeman cdak Rentap…laban ka bc iban “bepaling tadah” munyi ko jaku laut nya meh ngasuh Rentap senang d alah ka rajah ribai.

  2. Sarawak Mariner/Diver | Reply

    Aku udah ngabas Batu Tanam Demong tu di Ulu Krian, enda jauh ari Rh. Jamit suba. Diatu aku enda nemu sapa nama tuai rumah sida iya. Aku lalu ngambi Gambar Batu Tanam tu, tang bisi utai nyelai maya gambar nya udah di tuchi aku. Tak nyelai amat. Enti deka nemu penyelai utai dalam Gambar nya, tau email ngagai aku.

    1. Rumah Ulu Krian pchah 2….sebagi nitihka Langan anak Jamit lalu sebagi betuaika siku ai aku enta tentu ingat. Manah menua Ulu rian diatu udah bisi line talipaun. enda lama agi isi karan

  3. uji baca kita ba bup injil penyanggup lama terubah dunya digaga. diak mh kitai patut arap ke semua bansa di dunya tu bepun ari menua arab. menua ti terubah endur Allah Taala nurun ka adam ngau hawa. Ari peturun adam aki ini kitai nyepar ngagai semua pelusuk dunya…

  4. 1 . Iban mencipta sendiri besi dan ada pihak pengkaji barat mengatakan bahwa iban telah mencipta besi seawal 900 thn ( b4 Christ )

    2 . Iban ada ilmu kaji bintang ( bintang 3 & 7 ) ilmu kaji bintang iban ini setanding dgn ilmu
    Bintang suku kaum Aztec purba dan tiada terdapat di bangsa lain di asia ini. Perkiraan
    Bulan padam – kembang penuh versi iban adalah lebih akurat dari perkiraan bangsa cina
    Org barat dan timur tengah.

    3 . Iban ada cerita lagenda bumi pernah alami bah besar dan ada cerita ttg pusat lautan dibumi
    Ini, ( pada masa itu iban blum sampai ditengah lautan bumi ) penemuan the golden triangle
    Segi 3 bermuda oleh dunia moden membukti lagenda iban ini bukan cerita dongeng.
    Bangsa lain diasia mengetahui bah besai ini dari old testement dan alquran . Ole itu
    Berkemungkinan besar Iban ini adalah termasuk dlm ( the lost tribe of israelites ).

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: